Read izere Afisa 6 Bible Online

Afisa 6 - izere bible

Afisa 6

¹Yin inoon, kuus yin ike̱re̱ iya áda yin kaye̱e̱r Agwo̱m Ágwo̱m ta fe̱ be yin, kamok i se gye̱r yin ta nye anong.

²Itsi Adakunom ife ime̱se̱ng'e iya a tin no̱o̱k kuto̱ natoon'e fe̱ ye, “Tiyiik ada wan be ango̱ wan.”

³Ke wan nye anong “Wan ta fok kusas kusor wan ne i bun i se̱ kuko̱s kuso̱p nazatse.”

⁴Yin átek inoon, sang tu sak yin inoon yin ta nye riye̱ kubeseng baꞌ, amma ku kunees yin ba be itabak ne i kubo̱so̱p yin ba iren Agwo̱m Ágwo̱m.

⁵Yin ásam, kuus yin ike̱ng iya átekasa yin áfe kazatse ta fe̱ be yin be inyim ne ikap kutiim be riye̱ rizining kyo̱ndi aKiristi ne yin sen ku nye yin'e.

⁶Sang tu nye yin nong ta ka kare̱p yin ba aye̱ ka kamok ba ta ka ye̱re̱k yin tsek baꞌ, amma kyo̱ndi ásam aKiristi ne i nye yin ike̱ng iya Adakunom ta shim be riye̱ rizining.

⁷Nye yin itomong yin be ifeng kyo̱ndi yin sen nye yin Agwo̱m Ágwo̱m'me sang anerawe baꞌ.

⁸Kamok yin ren yin ye Agwo̱m Ágwo̱m tà no̱o̱k koangan ishorong wu kamok koakye kuri ike̱ng itek aner'e tá nye ko a tu nye asam ka aya a ta sor washak.

⁹Yin átekasa nye yin anong be ásam yin gip. Sang ta ka shirik yin ba baꞌ. Ren yin ye yin be ba cice̱r Atekasa yin se kaye̱e̱r kaza, wu kasa akak ze̱e̱r baꞌ.

¹⁰Ni igang'e cice̱r, nyeseng yin be agap kaye̱e̱r Agwo̱m Ágwo̱m be agbang kukyem wu.

¹¹Te yin ares itsom kuri áfe Adakunom cei nong ase̱ ta kyem i nyeseng yin be agap ne i te̱ne̱ng yin kanye̱k amaan aner.

¹²Kamok sang kuren yir se be naso̱k be rinam baꞌ, amma be amaan nabik á ta se natoon kaza ne áfe rigwo̱m ne áfe kukyem ne áya rigwo̱m awhi kazatse na ta se nubo̱k ba.

¹³Kamok anong, te yin ares itsom kuri áfe Adakunom cei nong ase̱ ta kyem i nyeseng yin katuk amaan kunom'ong, nong ke yin gang yin koakye ne a ka se̱ yin nunyeseng kpa.

¹⁴Kamok anong, nyeseng yin be agap, katsak tu sor ike̱ng kurosom kutin yin ne kuse zhe̱l nye kukpiin kutso̱m kufe itsom yin.

¹⁵Kanye̱k kutaas Rife̱ Ritek, tu sor kyo̱ndi akpatak na atak yin.

¹⁶Awan anong tsek baꞌ, won kuno̱o̱k katsak tu sor ikpaar [3] yin, iya yin tanin riming yin kuro̱ng afer amaan aner'ong.

¹⁷Te yin kashesh yin kyo̱ndi ribong kutso̱m ne awe̱n itsor ife Kabik Kazhe̱l'e iya i ta nye rife̱ Adakunom.

¹⁸Yiir inye yin aduwa koakye izen kaye̱e̱r kukyem Kabik. Nye yin aduwa ne i rip yin koakye kuri ike̱ng iya yin ta tse̱r yin. Sor yin be kanye̱k koakye izen ne i ya yin kasho̱o̱n be aduwa kamok ázhe̱l'e.

¹⁹Nye yin aduwa kamok'i gip, nong ase̱ Adakunom tin no̱o̱k ike̱ng iya mi tana fe̱ nong mi tà taas ánerawe Rife̱ Ritek riya ri ta se nune̱re̱ng dar inyim dim.

²⁰Kamok Rife̱ Ritek na ne mi te aner kutom, aya a ta se kaye̱e̱r izining. Nye yin aduwa nong ase̱ nizen iya mi ta sen taas kutom'e mi ta taas dar inyim kyo̱ndi mi ta shim.

²¹aTikikus, agbang aronyining yir ne a bun a nye asam Agwo̱m Ágwo̱m, aya a ta be katsak, tà be̱ nufe yin nong a tà ka tak yin koakye natoon kutser'i be kuri ike̱ng mi ta sen nye'me aze.

²²Agbang ike̱ng i ta sak mi ta sen ku tom nufe yin se, nong yin ta ren yin kutser yir ne wu bun a ka tsesek yin.

²³Ároneng, mi mok ye Adakunom a ta nye Ada yir ne Agwo̱m Ágwo̱m yir aYeso Kiristi tà ka no̱o̱k yin kameneng riye̱, kushim be kuno̱o̱k katsak yin ni ibarang.

²⁴Ritek se mak be áya a ta shim Agwo̱m Ágwo̱m yir aYeso Kiristi cice̱r ne kushim kuya sang ku tana gang baꞌ.