Read izere aFilipi 3 Bible Online

aFilipi 3 - izere bible

aFilipi 3

¹Ni igang'e ároneng, nye yin riye̱ rikan be Agwo̱m Ágwo̱m yir. I ti daam i ta bun ta ka zibir yin'e natoon ike̱re̱ mi tá tsang ka zibir yin'e gbak baꞌ, amma nong yin tà nyeseng yin be agap.

²Nye yin tatan be ágabu'ong, [1] áfe á ta nye ámaan ike̱re̱. Á tsang á tse̱k iro̱m ba kpe̱de̱ng ye, ba sen naka nye izhak.

³Kamok yir ne i nye yir áner a tú ku nye ba izhak ife katsak áya i ta ya yir Adakunom iben kaye̱e̱r Kabik wu. Ne i ni tsor yir kafok nuyiik aYeso Kiristi, áya afe sang i tin fereng yir ni itomong kuro̱m yir baꞌ.

⁴Mi fe̱ anong kamok, mi be rice mi, mi ta kyem i ni fereng ni itomong iya anerawe ta nye. Ke aner akak kuse a ta di ye, wu kyem a tin fereng ni itomong wu tá kyem a nye, to̱, mi tu nar.

⁵A ti nye izhak ne mi be inom ikara be kutes. Mi nye aner Isarela, kaye̱e̱r kasa aBanyami. Mi nye atuk kunik aner Ibrani. Natoon kukuus Itsi áner aYahuda, mi se nigung rice áner aFarisi.

⁶Natoon kukuus Adakunom dide̱ng, mi tabak áfikuus, natoon ku te zhe̱l be kukuus Itsi aMusa, mi raar azong baꞌ.

⁷Amma gip be ike̱re̱'ong mi sor ye, mi tin se̱ ishorong natoon'e, mi sok cei kyo̱ndi ike̱ng ikak baꞌ kamok aYeso Kiristi.

⁸Akye̱ nar anong'e, mi sok koakye kyo̱ndi ike̱ng ikak baꞌ ke mi ti maas be kuren aYeso Kiristi a ta te Agwo̱m Ágwo̱m mi. Mi nyosong ike̱re̱'ong cei kamok wu. Mi sok cei kyo̱ndi awha nong ta se̱ aKiristi,

⁹ne i te azining be wu, sang be kukuus Itsi mi nong ta te zhe̱l baꞌ. Mi se̱ kamok kuno̱o̱k katsak na aKiristi, kuzhe̱l kuya a ta se̱ nufe Adakunom kamok kuno̱o̱k katsak.

¹⁰Mi shim ta ren aKiristi, mi shim tù ku ren be kukyem wu a tin dorok nure̱k ne mi gung rice be wu kaye̱e̱r risam wu ne riku wu.

¹¹Kamok nong, nong ko a tu nye ane̱ Adakunom tin dorok be kutser ke mi ku.

¹²Sang i se ye mi n wor i se̱ ike̱re̱'ong cei ka mi fe̱ ye mi n shining cei baꞌ, amma mi ya kasho̱o̱n be kucan kaye̱e̱r kuno̱o̱k katsak'i, nong ta se̱ ike̱ng iya aYeso Kiristi tin yis mo.

¹³Ároneng, sang mi fe̱ ye mi n wor n se̱ ike̱ng'e baꞌ, amma ike̱ng ikak kuse mi ta nye, mi nye burum be kama ne mi ni te iso̱r nike̱ng iya i ta se nasho̱o̱n.

¹⁴Mi ya kasho̱o̱n be kuni te iso̱r nong ke mi ya ne i se̱ ishorong iya Adakunom tin yis mo kaye̱e̱r aYeso Kiristi a ta se naza.

¹⁵Kamok anong, yir áya i tan te yir ánerawe cice̱r kaye̱e̱r kabik, kuto̱ro̱ng yir ra se anong. Amma ke akak yin be kuto̱ro̱ng kukak ze̱e̱r, to̱, Adakunom tà ka tonong yin.

¹⁶Ike̱ng iya i ta nye igbang'e nye, yir tu sor yir kyo̱ndi Adakunom ta shim.

¹⁷Ároneng, kuus yin ane̱e̱ mi cice̱r yin, ne i ye̱re̱k yin kuse áya a ta kuus ike̱ng iya yir tá fe̱ yir be yin.

¹⁸Kyo̱ndi mi tá yiir ka taas yin, kyo̱o̱rna mi bun i fe̱ ma be nanyisi ye, ákak yin n te kyo̱ndi ámudo̱n riku aKiristi natoon kukon.

¹⁹Igang ba nye á tà wei, adakunom ba nye nafa ba. Á ni tsor kafok ni itomong isum ba. Aye̱ ba se natoon ike̱re̱ kazatse tsek.

²⁰Amma yir, yir nye yir áfe kaza, azong ne yir min sak yir anyisi ye, aner kashesh tà ne, a ta nye aYeso Kiristi Agwo̱m Ágwo̱m yir.

²¹Wu ne a be kukyem a tanin nye rigwo̱m natoon koakye. Be kukyem wu'me ne a tin shishing kuraar yir nuro̱m nong ku tà te yiik kyo̱ndi kufu.