Read izere aFilipi 4 Bible Online

aFilipi 4 - izere bible

aFilipi 4

¹Kamok anong, ároneng afe riye̱ mi, aya mi ta min te riye̱ ke mi ka di yin ne mi ni be riye̱ rikan ne mi niya kuka, ye i ra nyeseng yin kpa ni ikuus Agwo̱m Ágwo̱m yir aYeso. Yin áya mi ta shim.

²Mi nye Ayodiya be aSintiki izong ye kuto̱ro̱ng ba ra se kuzining natoon itomong Agwo̱m Ágwo̱m.

³Ei, mi bun i fe̱ be wan afudang itomong'i afe katsak, ye i ra tobok ányining'ong kamok á gung rice be mi ni itomong i taas Rife̱ Ritek Adakunom, anong ne aKelemen be ribir áfudang yir áya i ta nye yir itomong mak, áya ayerek ba ta se kaye̱e̱r kufumung kutser.

⁴Nye yin riye̱ rikan kaye̱e̱r Agwo̱m Ágwo̱m koakye izen. Mi bun i fe̱ be yin gbak, ye i ra nye yin riye̱ rikan.

⁵Won koangan tu di kutatan yin. Agwo̱m Ágwo̱m yir n be̱ barak a ta be̱.

⁶Sang tu daam yin be ike̱ng ikak baꞌ, amma kaye̱e̱r koakye tak yin Adakunom kudaam yin, be kunye aduwa ne kunye izong, mak be ku tonong riye̱ rikan be Adakunom.

⁷Be anong ne kameneng riye̱ kuri kuya Adakunom ta nyesek kuya ku ta nar koakye kuri kuren ánerawe, tà sak aye̱ yin be kuto̱ro̱ng yin ta nyeseng kpa natoon aYeso Kiristi.

⁸To̱, ároneng, nigang'e, koakye ike̱ng i ta nye katsak, koakye ike̱ng ánerawe ta di yiik ne koakye ike̱ng i ta se gye̱r, be koakye ike̱ng i ta se zhe̱l ne koakye ike̱ng ánerawe ta shim be koakye ike̱ng i ta be riyerek ritek, kaꞌ, koakye ike̱ng kuse i ta nye itek dide̱ng ne i be nakerek. To̱ yin natoon ike̱ng kuri iyu.

⁹Koakye yin tá bo̱so̱p yin nunaan ka i se̱ yin nunaan ka i fok yin nunaan, ka iya yin tá di yin nunaan, iyong ne yin tá nye yin. Be anong ne Adakunom aya a ta nyesek kameneng riye̱ ta se mak be yin.

¹⁰Mi be riye̱ rikan dide̱ng kaye̱e̱r Adakunom dide̱ng kamok yin ta bun i tonong yin kudaam yin natoon'i. Katsak'e mi ren yin daam yin be mi, amma yin ra se̱ yin izen nong tá nye yin baꞌ.

¹¹Sang i se ye mi tse̱r ike̱ng ikak yin baꞌ, mi min me̱ be kusor ko ane̱.

¹²Mi ren kuri kusor mi ta sor ke mi se̱ ike̱ng ife mi ta tse̱r baꞌ, mi ren kuri kusor mi ta sor ke mi se̱ dide̱ng. Mi n bo̱so̱p kaye̱e̱r kusor kaye̱e̱r koakye iren iya ne mi se̱ rice mi, be riwha ka be izong ka ke mi be whe̱r ka i se kaye̱e̱r kutser.

¹³Mi ta kyem i nye koakye kamok aKiristi aya a tin nyesek agap kunye'me.

¹⁴Amma yin nye yin gye̱r i tin tobok yin kaye̱e̱r risam mi.

¹⁵Yin áfikuus aFilipi kyo̱ndi yin ta tsang i ren yin, kum a tá san ku ka taas yin Rife̱ Ritek ni ime̱se̱ng'e, nizen mi tá won kaben aMakidoniya. Ikilisiya ikak kuse i ta gung rice be mi kaye̱e̱r itomong na be kunyesek ike̱re̱ ze̱e̱r be yin baꞌ.

¹⁶Nizen iya mi tá tsang i se kaye̱e̱r kuwo̱p aTasalonika, yin ti tom yin be itso̱m sang kutak kuzining ka kutak kufa tsek baꞌ nizen iya mi ta se nutser.

¹⁷Sang i se ye mi fe̱ anong nong yin ta yiir ni nyesek yin ike̱re̱ baꞌ, amma mi shim ishorong Adakunom ta se natoon yin kamok mi.

¹⁸A min karang cei, ma i nar ike̱ng iya mi ta tse̱r. Mi ma se̱ ike̱ng mi ta tse̱r makong, kyo̱o̱rna mi ta shan ike̱re̱ iya yin tá no̱o̱k yin Apafurotus. Ike̱re̱'me se kyo̱ndi name iko̱o̱n itek, asidaka aya Adakunom ta shan ne a fok kusas'e.

¹⁹Adakunom mi tà ka no̱o̱k yin koake̱ yin ta tse̱r yin kaye̱e̱r kuyiik wu kuwhe̱r'e kaye̱e̱r aYeso Kiristi.

²⁰Kuyiik nye kufe Adakunom yir ne a nye Ada yir ma izen izen. Anong.

²¹Kunye shou yin azhe̱l'e kaye̱e̱r aYeso Kiristi cice̱r. Ároneng áya a ta se aze be mi ta nye yin ashou.

²²Áfikuus aze cice̱r ta nye yin ashou, atuk áfekasa aKaisar baꞌ.

²³Ritek Agwo̱m Ágwo̱m yir aYeso Kiristi se mak be yin. Anong.