Read izere aKolosi 2 Bible Online

aKolosi 2 - izere bible

aKolosi 2

¹Mi shim yin tu ren yin kuri iso̱r mi ta min te kamok yin ne ánerawe á ta se na aLaudikiya, ne áya sang á ta kun min di cice̱r baꞌ.

²Mi nye anong, nong ase̱ ba ta se̱ kutsesek kaye̱e̱r aye̱ ba, ne kushim kugung rice, kamok a nong á ta se̱ agbang kurum'ong, ku ta nye kuren ike̱ng cei, nong á ta ren kanye̱k Adakunom ka ta se nune̱re̱ng ka ta nye aKiristi.

³Kaye̱e̱r wu ne a ne̱r ayiik kukyem ne kuren ike̱ng cice̱r.

⁴Mi ta tak yin ike̱re̱ na nong fan akak ba ka wo̱ro̱k yin be kanu re̱m re̱m.

⁵Mi ren ye mi se mak be yin nuro̱m baꞌ, gye̱r tatan amma riye̱ mi se mak be yin. Mi be riye̱ rikan dide̱ng mi ta fok ye yin n nyeseng yin gye̱r ne i naka tsesek yin kaye̱e̱r kuno̱o̱k katsak yin na aKiristi.

⁶To̱, kum yin ta shan yin aYeso aKiristi a ta te Agwo̱m Ágwo̱m yin, ya yin kasho̱o̱n be kusor yin kaye̱e̱r wu.

⁷Nyeseng yin be agap natoon wu, a ta nye ribor'e ne i ni barang yin kurasak kaye̱e̱r kuno̱o̱k katsak yin, kyo̱ndi a tá ka bo̱so̱p yin'e ne i tonong yin riye̱ rikan dide̱ng.

⁸Sak yin riye̱ fan akak ba ka wo̱ro̱k yin be kuri kuto̱ro̱ng kuri kufe kazatse na nong ta won yin iren katsak. Kuto̱ro̱ng kuri kuyong nye kukpe̱de̱ng'e. Ku nye igo̱o̱n ánerawe ne iren kunye ike̱re̱ kuri kufe kazatse na sang kuri kufe aKiristi baꞌ.

⁹Kamok kaye̱e̱r aKiristi ne kuse Adakunom sor kaye̱e̱r kuro̱m,

¹⁰be anong ne yin shining yin kamok yin ta sor yin kaye̱e̱r wu. Wu ne a nye ako̱k kasho̱o̱n koakye kuri kukyem ne koakye kuri rigwo̱m.

¹¹Kaye̱e̱r wu ne a tá nye yin izhak kaye̱e̱r kabik gip, nong ta tun yin kuse kuri kufe rine̱n. Sang izhak kuri iya anerawe ne a ta nye baꞌ, amma kuri iya aKiristi ne a ta nye.

¹²Kamok nizen iya a tá ka nye yin abatisma ne a tá ne̱r yin mak be aKiristi ne a bun a ka dorok yin mak be wu kamok kuno̱o̱k katsak yin kaye̱e̱r kukyem Adakunom aya a tú ku dorok nure̱k be kutser.

¹³Nizen iya yin ta se yin kyo̱ndi ikom'e kaye̱e̱r rine̱n yin be kuwon dar kunye izhak ife kuse yin kufe rine̱n, Adakunom sak yin bun i te yin atser kaye̱e̱r aKiristi. A ti re̱ng yir rine̱n yir cei.

¹⁴A birik izibir a tá tsang zibir natoon rine̱n yir, a sok a ta tigak natoon kukon a tú ku tigak mo.

¹⁵A ti shan ares itsom ba afe kukyem ne áfe rigwo̱m ba, nong a tú ku no̱o̱k ba isum nasho̱o̱n ánerawe, a tu ku canang ba kamok riku wu natoon kukon.

¹⁶Kamok anong tu won yin akak ta ka to̱ yin amok natoon ike̱ng yin ta ya yin ka ike̱ng iya i ta so̱ yin, ka natoon riye̱ rikan igo̱o̱n áner aYahuda, ka natoon riye̱ rikan kunyeseng kufe̱n kufas, ka natoon kunom Asabar baꞌ.

¹⁷Ike̱re̱ na se kyo̱ndi nawu ike̱re̱ i tana be̱ tsek, amma aKiristi ne a nye kunik'e

¹⁸Aner akak shim ku tonong kuri kumees rice ba ta be ne á tonong ye ba ya ámaleka iben ne á shim ku ka zhe̱e̱sh yin ye kamok yin ta nye yin anong baꞌ, tin daam yin natoon ba baꞌ. Áner kuri ayong fe̱ ye ba ye̱re̱k ike̱ng ikak kyo̱ndi nabos, amma amaan kuto̱ro̱ng ba tu ku sak ba ta ya kuka kpe̱de̱ng tsek.

¹⁹Aner kuri ayong n kam be aner a ta nye rice'me, wu aya kuro̱m'e cice̱r ti fereng natoon wu ne ku se nagung ne ku rasak kyo̱ndi Adakunom ta shim.

²⁰Kum i tá kus yin mak be aKiristi ma yin kam yin be kukuus amaan nabik kazatse na, akye̱ sak yin bun i ru sor yin kyo̱ndi yin ru bun i kuus yin kazatse'me e̱?

²¹Kyo̱ndi itsi i ta fe̱ ye, Sang a tu ra baꞌ! Sang a tu fok baꞌ! Sang a tu yiir baꞌ e̱?

²²Itsi kuri iyuna fe̱ natoon ike̱re̱ iya i tana gang cei, kamok i nye itsi be kubo̱so̱p ánerawe.

²³Nasho̱o̱n ánerawe igo̱o̱n kuri iyong se kyo̱ndi i be kukyem, i be̱n be ife̱ng dide̱ng ne kumees rice nikuus Adakunom ne kunye be kuro̱m kpe̱de̱ng, amma katsak'e igo̱o̱n na be kukyem ku tana tobok anerawe nong a ta won kukuus kushim riye̱ wu baꞌ.