Read izere aKolosi 4 Bible Online

aKolosi 4 - izere bible

aKolosi 4

¹Yin átekasa nye yin be ásam yin gye̱r ne i se yin whiwhe̱ kamok yin ren yin ye yin gip yin be yin Atekasa akak kaye̱e̱r kaza.

²Ni te yin riku ninye aduwa, ne i nye yin tatan ne i nye yin riye̱ rikan be Adakunom.

³Nye yin aduwa kamok yir gip, nong ase̱ Adakunom tin karak yir iren kutaas rife̱ wu nong ta taas yir kanye̱k aKiristi kaya ka ta se nune̱re̱ng kafe sang akak ta ren baꞌ, kamok anong ne a min te nitso̱m.

⁴Ni nye yin aduwa nong mi ta kyem i taas rife̱ na gye̱r, kyo̱ndi mi tana kyem i nye.

⁵Sak yin riye̱ be kutseng yin kaye̱e̱r áner aya sang á ta nye áfikuus baꞌ. Ni nye yin itomong be koakye izen ife yin ta se̱ yin.

⁶Won rife̱ yin tu sas kufok nong ase̱ yin ta ren yin kuri iren iya yin tana fe̱ yin be koangan aya a tana ka nye yin kurip.

⁷aTikikus ta ka tak yin koakye kuri ike̱ng iya i ta sen tseng natoon'i. A nye agbang aroneng, aya a ta nye itomong be katsak ne a nye asam afudang itomong'i kaye̱e̱r itomong Agwo̱m Ágwo̱m yir.

⁸Mi tu ku tom nufe yin nong yin ta ren yin ike̱ng iya i tin se yir kaye̱e̱r'e ne a ka tsesek yin.

⁹A tà be̱ mak be aroneng yir akak aOnesimus aya yir tu ku shim yir ne a be kuse kutek. Ba ta ka tak yin koakye i ta sen tseng azena.

¹⁰Aristakus, aya i ta se yir nitso̱m mak ta nye yin ashou. aMarkus aronyining rifam aBarnabas ta nye yin ashou gip, wu ne yin kun fok yin itak natoon wu, ku shan yin ibo̱k ifa ke a be̱ nufe yin.

¹¹aYeso, aya a tú ku yis ye aZhostus ta nye yin ashou gip, igak áner aYahuda áya a ta se ni itomong rigwo̱m Adakunom mak be mi'ong.

¹²Abafaras a ta nye azining kaye̱e̱r yin ne a bun a nye asam aYeso Kiristi ta nye yin ashou. A yiir rus ne a ka nye yin aduwa dide̱ng koakye izen nong yin ta kyem i nyeseng yin be agap ne i nye yin ike̱ng iya Adakunom ta shim. Kyo̱ndi áya a ta min no̱o̱k katsak na Adakunom be riye̱ rizining.

¹³Mi be rice mi, mi ta kyem i fe̱ natoon Abafaras ye a so̱ risam nong a ta ka tobok yin ne áner aLaudikiya ne áfe aHirapolis.

¹⁴Aferime̱ yir aLuka aya a tá nye abok'e be aDemas cice̱r ba ta nye yin ashou.

¹⁵Nye shou yin ároneng á ta se na aLaudikiya be angasnyining yir aNimfa ne áfikuus á ta nyiis kari wu.

¹⁶Ke gang yin ku fa yin kufumung na ne i tom yin áner á ta se na Ikilisiya aLaudikiya'me nong ba gip ta ma fa. Yin gip ma fa yin kufumung ba tana ka tom yin'e gip.

¹⁷Tak yin Akipus ye a ra sak riye̱ nong a ta gang itomong'ong Agwo̱m Ágwo̱m tú ku no̱o̱k.

¹⁸Mi aBulus ne i zibir ashou na be kubo̱k'i, tu tiburum yin ye mi na aze nitso̱m baꞌ. Ritek Adakunom se mak be yin.