Read izere 1 aTasalonika 2 Bible Online

1 aTasalonika 2 - izere bible

1 aTasalonika 2

¹Ároneng, yin be rice yin ren yin ye kube̱ yir nufe yin se kpe̱de̱ng baꞌ.

²Amma kyo̱ndi yin tá ren yin ye yir so̱ yir risam ne á ni kas yir na aFilipi gip be anong Adakunom yir ti tsesek yir nong tá ka tak yin Rife̱ Ritek wu, cei be kuri amaan rishishim á tá shishim yir.

³Itabak yir tá ka no̱o̱k yin nye abo̱o̱s ka i be̱ yir be amaan kuto̱ro̱ng baꞌ, ka yir ta ka wo̱ro̱k yin baꞌ,

⁴Yir ban i fe̱ yir kyo̱ndi áner aya Adakunom tá kasa ingya nong a tin no̱o̱k yir itomong kunye awazi Rife̱ Ritek wu. Sang yir fe̱ yir nong tà kare̱p yir ánerawe riye̱ baꞌ amma Adakunom aya a tá ren kuto̱ro̱ng yir.

⁵Yin ren yin ye, sang yir be̱ yir nufe yin be rife̱ re̱m re̱m tsek baꞌ, ka kamok yir ta be yir rinyisi rikan baꞌ, Adakunom ne a ren.

⁶Sang yir tse̱r yir nakerek nufe ákak ka nufe yin ka nufe ánerawe baꞌ. Yir ta nye yir ámanzo, yir shim tá ka sor yin acer baꞌ.

⁷Amma yir se yir tatan be yin kyo̱ndi anyining inoon tin sak riye̱ ni inoon wu.

⁸Kamok yir ta ka shim yin dide̱ng iyong ne i sak sang yir ta ka nye yin awazi Rife̱ Ritek tsek baꞌ, amma yir no̱o̱k yir kutser yir cei gip.

⁹Ároneng, mi ren tse̱ng tse̱ng ye yin ru yiring yin be kuri itomong ne risam yir tá so̱ yir. I nye yir itomong katuk be kunom kamok fan i ba ka no̱o̱k yin risam nizen yir tá sen ka nye yin awazi Rife̱ Ritek.

¹⁰Yin ta kyem i fe̱ yin be rice yin, Adakunom gip a ren kuri kusor kuya yir tá sor yir nasho̱o̱n yin áfikuus, yir sor yir zhe̱l be katsak a kun ni se̱ yir be kudaam baꞌ.

¹¹Yin ren yin ye yir tá ka tonong yin kuse kutek kyo̱ndi atek inoon ta nye be inoon wu.

¹²Yir ta nyesek yin itabak ne i ka tsesek yin ne i bun i ka nye yin akusuk nong ta sor yin kuri kusor kuya Adakunom ta shim kamok wu ne a tá ka yis yin kaye̱e̱r kuyiik wu ne rigwo̱m wu.

¹³Kamok anong ne yir tonong yir riye̱ rikan yir be Adakunom koakye izen, kamok nizen yin tá shan yin rife̱ Adakunom riya yin tá fok yin nufe yir, sang yin sok yin kyo̱ndi ri nye rife̱ anerawe tsek baꞌ, amma yin shan yin be katsak kamok rife̱'me ta nye rife̱ katsak. Rife̱'me sen nye itomong kaye̱e̱r yin áya i tin no̱o̱k yin katsak.

¹⁴Ároneng, kamok yin te yin ike̱ng kumaas nufe ánerawe, ikilisiya Adakunom niben aYahudiya kaye̱e̱r aYeso Kiristi, yin n so̱ yin risam nubo̱k áner iben yin, kyo̱ndi ba tá so̱ risam nubo̱k áronyining ba áner aYahuda.

¹⁵Ba ne á fe̱r Agwo̱m Ágwo̱m yir aYeso be áner kuzarap Adakunom agbugbang'e, ba ne á ti ro yir. Á beseng Adakunom riye̱ ne á te ámaan'e be ánerawe cei.

¹⁶A ti roon yir kutaas ánerawe áya a ta nye áner aYahuda baꞌ rife̱ Agwo̱m Ágwo̱m yir nong fan á bu se̱ kashesh. Be kunye anong ne ba ti barang kutusung rine̱n ba, amma kyo̱o̱rna riye̱ kubeseng Adakunom n min tiik natoon ba.

¹⁷To̱, ároneng, a ti kam yir kaye̱e̱r kaban izen cie̱k, amma a ti kam yir be yin nuro̱m tsek sang kaye̱e̱r kuto̱ro̱ng baꞌ. Riye̱ yin n ro̱ dide̱ng, yir nye yir kanye̱k ku ka di yin.

¹⁸Kamok anong, yir n shim yir kube̱ nufe yin dide̱ng, atuk mi aBulus baꞌ, mi n shim kube̱ dide̱ng, amma Ishetan ti roon'e.

¹⁹To̱, akye̱ ne i nye ike̱ng kute riye̱ yir ka ike̱ng riye̱ rikan yir ka ike̱ng yir tanin tsor yir kafok katuk kube̱ Agwo̱m Ágwo̱m yir aYeso Kiristi e̱? Aser, sang yin aꞌa?

²⁰Katsak'e, yin ne i nye yin ike̱ng iya yir tanin tor yir kafok ne ike̱ng iya yir tanin nye yir riye̱ rikan yir.