Read izere 1 aTasalonika 3 Bible Online

1 aTasalonika 3 - izere bible

1 aTasalonika 3

¹Kamok anong, sang yir ta kyem i tsesek yir baꞌ, iyong yir di yir i ti se yir gye̱r nong tá fan yir awan yir na Atina.

²Yir tom yir aTimoti, aronyining yir aya a ta nye itomong Adakunom mak be yir ne a taas Rife̱ Ritek aKiristi. Yir tú ku tom yir nong a tà be̱ a tà ka barang mo yin agap ne a ka tsesek yin, kaye̱e̱r kuno̱o̱k katsak yin,

³nong fan ákak yin bu ku bun kama kamok kutabak'e. Yin be rice yin i ren yin gip ye, Adakunom tsang a nye kanye̱k kutabak'e anong.

⁴Nizen yir tá se yir be yin, yir yiir i ka taas yin ye, a tin tabak yir. Kyo̱o̱rna'me yin di yin be rice yin.

⁵Kamok anong, mi ta di mi tana kyem i naka tsesek baꞌ, iyong mi tom nong a ta be̱ di kunyeseng yin kaye̱e̱r kuno̱o̱k katsak yin. Mi fok inyim ye ka Aner kuwo̱ro̱k ánerawe, aya a ta nye Ishetan m be̱ a tá ma ka wo̱ro̱k yin ma ta won yin iren'e nong itomong yir tà te kpe̱de̱ng.

⁶Amma kyo̱o̱rna'me aTimoti tá ne nufe yin, a ti be̱ yir be itak itek natoon kuno̱o̱k katsak yin be kuri kushim yin ta be yin, ye yin ru yiring yin be yir kaye̱e̱r aye̱ yin ye̱r ye̱r ne aye̱ yir ro̱ kyo̱ndi áfe yin ta ro̱ ye, ke yir ka di yin gip.

⁷Kamok anong, ároneng, kaye̱e̱r kudaam yir be kuso̱ risam yir, yir ti barang yir kuse̱ agap kamok kuri kuno̱o̱k katsak yin ta be yin.

⁸Kamok anong, yir te yir atser, kum yin ta ru nyeseng yin be agap kaye̱e̱r Agwo̱m Ágwo̱m yir.

⁹Kyo̱o̱rna yir ta kyem i tonong yir Adakunom yir riye̱ rikan yir kamok yin. Yir be yir riye̱ rikan be wu kamok yin.

¹⁰Katuk be kunom i nye yir aduwa dide̱ng be Adakunom ye, ke yir be̱ yir nufe yin anyisi be anyisi, nong i tà ba ka barang mo yin ike̱re̱ ife i ta raar kaye̱e̱r kuno̱o̱k katsak yin.

¹¹Won Ada yir Adakunom be rice wu ne Agwo̱m Ágwo̱m yir aYeso Kiristi tu nye iren nong i tà be̱ yir nufe yin.

¹²Won Agwo̱m Ágwo̱m tu sak kushim yin tin barang dide̱ng be koangan nong ase̱ tà naka shim yin be ánerawe cice̱r kyo̱ndi yir tá nye yir be yin.

¹³Won wu tu sak yin tu nyeseng yin be agap kaye̱e̱r aye̱ yin ne i sor yin zhe̱l, fan ákak bu fe̱ ike̱ng ikak imaan'e natoon yin nasho̱o̱n Ada yir Adakunom nizen Agwo̱m Ágwo̱m yir tana bun a be̱ mak be ázhe̱l'e áfu cice̱r.