Read izere 1 aTasalonika 5 Bible Online

1 aTasalonika 5 - izere bible

1 aTasalonika 5

¹Ároneng, natoon izen ka katuk kube̱'me, sang ma yir ta ka zibir yin'e baꞌ.

²Kamok yin be rice yin, yin ren yin ye katuk kube̱ Agwo̱m Ágwo̱m yir bu se kyo̱ndi kube̱ akpatang ta be̱ natuk.

³Nizen ánerawe ta sen fe̱ ye, “Koakye se gye̱r ne kusor caang kuse,” nizen iyong ne ike̱re̱ imaan'e tà wor i be̱ kyo̱ndi kutes ta kpa aner abining. Ánerawe'me akak tà wher baꞌ.

⁴Ároneng, yin se yin nawhi baꞌ, nong kunom'me ta ka se̱ yin kyo̱ndi kube̱ akpatang baꞌ.

⁵Kamok yin nye yin áfe akanang cice̱r yin, ne i bun i nye yin áfe kunom. Yir nye yir áfe katuk ka áfe awhi baꞌ.

⁶Kamok anong sang tu men yir ida kyo̱ndi ákak baꞌ, amma won yir tu sor yir be ato yir kuye̱ ne i sak yir riye̱.

⁷Áya á tan mereng ida, á ra mereng natuk, áya a ta so̱ kugbe̱re̱ ma á feng'e, a ra feng so̱ natuk.

⁸Amma kum yir ta nye yir áfe akanang, won tu sor yir áfe kuyiir rice ne i sok yir kuno̱o̱k katsak ne kushim kyo̱ndi ikpaar yir. Kute riye̱ yir natoon kashesh tu se kyo̱ndi abong atso̱m.

⁹Kanye̱k Adakunom se nong amok tin ku ni yir baꞌ, amma nong yir ta se̱ yir kashesh kaye̱e̱r Agwo̱m Ágwo̱m yir.

¹⁰A ku kamok yir, nong ase̱ ko yir tuse yir nida ka yir tu di yir karo̱, yir tà sor yir mak be wu.

¹¹Kamok anong ya yin kasho̱o̱n be kutsesek yin áfudang yin ne i naka berek yin kyo̱ndi yin ta nye yin.

¹²Ároneng, yir ta nye yin izong ye, i ra fok yin áya a ta ka nye yin itomong kuto, áya a ta ka bo̱so̱p yin'e ne á nye kasho̱o̱n nufe yin kaye̱e̱r kusor aKiristi.

¹³Ku sok yin ba yiik dide̱ng kamok itomong ba. Sor yin caang be koangan.

¹⁴Yir bun i ka yis yin ároneng, zhe̱she̱k yin áya sang á ta shim kunye itomong baꞌ, tsesek yin áya a ta be kutsesek baꞌ, tobok yin áya sang á ta be agap baꞌ, se yin whiwhe̱ be koangan.

¹⁵Sak yin riye̱, sang tu ku karang yin imaan'e be rimaan'e baꞌ. Amma koakye izen se yin gye̱r be áfudang yin ne ánerawe cice̱r.

¹⁶Yiir nye yin riye̱ rikan koakye izen.

¹⁷Nye yin aduwa koakye izen.

¹⁸Koakye kuri ike̱ng ne i ta se̱ yin, tonong yin riye̱ rikan be Adakunom kamok iyong ne i nye kushim wu be yin áya a ta se kaye̱e̱r aYeso Kiristi.

¹⁹Sang tu roon yin Kabik Kazhe̱l'e kunye itomong baꞌ.

²⁰Sang tu zhe̱e̱sh yin rife̱ kuzarap baꞌ.

²¹Maas yin koakye kuri ike̱ng ne i yiir yin iya i ta nye itek.

²²Won yin iya i ta nye imaan'e.

²³Won Adakunom be rice wu aya a ta nyesek kameneng riye̱ tu sak yin tu sor yin zhe̱l kaye̱e̱r koakye kuri iren. Won kabik yin cice̱r be aye̱ yin ne iro̱m yin tu sor gugo̱k be rine̱n ma katuk kube̱ Agwo̱m Ágwo̱m yir aYeso Kiristi.

²⁴Wu aya a tá ka yis yin, a nye aner katsak, a fe̱ ne a shining.

²⁵Ároneng, nye yin aduwa kamok yir gip.

²⁶Nye yin ároneng ashou cice̱r be kushim dide̱ng.

²⁷Mi ta nye yin izong kaye̱e̱r riyerek Agwo̱m Ágwo̱m yir ye yin ra fa yin kufumung na nasho̱o̱n áfikuus cei.

²⁸Ritek Agwo̱m Ágwo̱m yir aYeso se mak be yin. Anong.