Read izere 2 aTasalonika 2 Bible Online

2 aTasalonika 2 - izere bible

2 aTasalonika 2

¹To̱, ároneng natoon izen kube̱ Agwo̱m Ágwo̱m yir aYeso Kiristi ne izen a tanin tusung yir cice̱r nasho̱o̱n wu, yir ta nye yin izong ye,

²sang tu te yin titak, ka aye̱ yin tu dorok baꞌ. Kunom kube̱ Agwo̱m Ágwo̱m n nye baꞌ. Kashim akak fe̱ anong nizen iya yir tá se yir be kunye kuzarap ka izen iya yir tá se yir be kutaas rife̱ Adakunom'me ka kaye̱e̱r i zibir yir ayi, ye kunom kube̱ Agwo̱m Ágwo̱m n nye.

³Sang tu won yin aner akak ta ka wo̱ro̱k yin niren ikak baꞌ, kamok kunom kube̱ aYeso'me ta nye baꞌ, ma ánerawe whe̱re̱ raba Adakunom ne agwo̱m kushonong be̱ nizham, wu nye aner aya a tá tsang a sak ye a tù ku shosh.

⁴A ta rawu Adakunom ne a tiyiik rice wu natoon koakye kuri ike̱ng ife ánerawe ta yis ye Adakunom ka iya a tu ku ya iben ayi. A tà sok rice wu naza nutu kuya Adakunom iben ne a yis rice wu ye wu nye Adakunom.

⁵Aser, yin ba ru yiring yin izen afe mi tá se mak be yin, mi yiir i ka taas yin ike̱re̱'ong aꞌa?

⁶To̱ kyo̱o̱rna, yin ren yin ike̱ng ife i tu ku te̱ne̱ng kube̱'me, a tà be̱ nizen iya Adakunom ta di i se gye̱r.

⁷Kamok amaan aner'ong n kpaan kunye itomong wu kyo̱o̱n kyo̱o̱n amma aner aya a tu ku te̱ne̱ng iren'e ta ya kasho̱o̱n be ku kute̱ne̱ng ma izen iya a tana ku tun azong.

⁸Nizen iyong ne a tà di agwo̱m kushonong ame, aya Agwo̱m Ágwo̱m yir aYeso tana ku fe̱r be isong kanu wu, ne a ku beseng be kuyiik wu nizen wu tana be̱.

⁹Agwo̱m kushonong'e, tá be̱ be kunye ike̱re̱ kuri ife Ishetan, a tà nye ike̱re̱ azhing ne kukyem ne kubok be abo̱o̱s,

¹⁰be iriri itomong ife kuwo̱ro̱k ánerawe áya a ta se niren kuwei. Á ta no̱ niwei kamok á raba kushim katsak nong á ta se̱ kashesh.

¹¹Kamok anong Adakunom tu ku tom ba be kutitak nong ba tin no̱o̱k katsak nabo̱o̱s'e,

¹²nong ase̱ a tà to̱ áya a tá gaar ku nino̱o̱k katsak amok cice̱r, ne á ta shim amaan kunye.

¹³Ároneng, gye̱r ke yir nye yir riye̱ rikan be Adakunom ye̱r ye̱r kamok yin, yin áya Agwo̱m Ágwo̱m ta shim kamok kum ni ime̱se̱ng'e Adakunom tá kasa yin nong ta se̱ yin kashesh ne ku te zhe̱l kamok itomong Kabik ne kamok kuno̱o̱k katsak yin be agap.

¹⁴Adakunom tá ka yis yin be Rife̱ Ritek'ong, rife yin tá fok yin nufe yir, nong yin tà se̱ yin kuyiik Agwo̱m Ágwo̱m yir aYeso Kiristi.

¹⁵Kamok anong, ároneng, nyeseng yin be agap, yiir yin ike̱re̱ yir tá ka bo̱so̱p yin'e, iya yir tá fe̱ yir be kanu ne iya yir tá zibir yir ayi.

¹⁶To̱, won Agwo̱m Ágwo̱m yir aYeso Kiristi be rice wu ne Ada Adakunom yir, aya a tin shim yir, ne a bun a ni no̱o̱k yir kutsesek dar gang, ne ku te riye̱ kutek kamok ritek wu,

¹⁷tà ka tsesek yin, ne a ka sak yin ta nyeseng yin kpa kaye̱e̱r koakye itomong ne kufe̱ kanu gye̱r.