Read izere 1 aTimoti 1 Bible Online

1 aTimoti 1 - izere bible

1 aTimoti 1

¹Mi, aBulus, amanzo aYeso Kiristi, nu kushim Adakunom, Aner Kashesh yir, ne aYeso Kiristi aya yir ta min te yir riye̱,

²aTimoti, igon'i kafe katsak ni iren kuno̱o̱k katsak. Ritek be kuro̱ riye̱ ne kameneng riye̱ Adakunom a ta nye Ada yir ne aYeso Kiristi, Agwo̱m Ágwo̱m yir se mak be wan.

³Kyo̱ndi mi tá tsang i fe̱ be wan nizen iya mi tá se niren kutseng na aMakidoniya ye, wan ri fan kaye̱e̱r kuwo̱p Afisa nong ta te̱ne̱ng áner'ong á ta bo̱so̱p ánerawe abo̱o̱s.

⁴Ku tak ba ye á ra won ku foos atin natoon átukop ba agbugbang'e ne ku kuus á ye̱re̱k ba dar igak. Kunye anong ti barang nanaan tsek sang ku tà be̱e̱n kuya kasho̱o̱n kanye̱k Adakunom kuya a ta se̱ kamok kuno̱o̱k katsak.

⁵Ike̱ng i ta sak mi ta fe̱ anong be agbang kuto̱ se ye nong áfikuus tà shim ánerawe be kushim kuri kuya ku ta ne kaye̱e̱r riye̱ rizhe̱l'e ne riye̱ rizining be kuno̱o̱k katsak kufe katsak baꞌ.

⁶Ánerawe'me ákak n taam an won iren itek á tá mu ku bun nikuus akpe̱de̱ng rife̱.

⁷Á shim á ta tonong'e ye ba nye áner kubo̱so̱p Itsi Adakunom, amma á ren ike̱ng iya ba tin fe̱ natoon'e baꞌ, ka ike̱re̱ iya ba ta yiir ding ding baꞌ.

⁸Yir ren yir ye Itsi se gye̱r ke a ti nye itomong niren itek.

⁹Yir bun i ren yir gip ye, sang a nye Itsi kamok áner á ta tseng gye̱r baꞌ, amma kamok áner aya a ta shonong ne á gaar kukuus Itsi'me. Itsi se kamok áya a ta raba iren Adakunom ne áfe rine̱n be áya a ta se zhe̱l baꞌ, ne áfurin ne áfe ku fe̱s ánerawe ne áya a tá fe̱s ada be ango̱ ba,

¹⁰be áfe kunye rikuna ne átek á ta mereng be átek afudang ba ka ányining á ta mereng be ányining áfudang ba, ne áfe kure̱e̱s ánerawe be áfe abo̱o̱s ne áya a ta ya kushu natoon abo̱o̱s ne koakye kuri ike̱ng i ta se ze̱r be kubo̱so̱p katsak.

¹¹Kubo̱so̱p na se natoon ayiik Rife̱ Ritek Adakunom aya ánerawe tu ku kerek, a tin won'e nubo̱k nong ta no̱o̱k ákak.

¹²Mi be riye̱ rikan be aYeso Kiristi Agwo̱m Ágwo̱m yir, aya a tin no̱o̱k agap. A di ye mi be katsak iyong a ti sak nong ta nye itomong wu.

¹³Mi tsang i nye aner kuzhe̱e̱sh Adakunom gye̱rtatan ne i tabak áfikuus ne i nye awan kuren, gip be anong Adakunom tin tonong kuro̱ riye̱ kamok mi nye kaye̱e̱r kudun kuren sang mi tsang i ni no̱o̱k katsak na aYeso baꞌ.

¹⁴A ti shining be ritek Agwo̱m Ágwo̱m yir dide̱ng, ne a ni no̱o̱k kuno̱o̱k katsak ne kushim kuya ku ta se kaye̱e̱r aYeso Kiristi.

¹⁵Rife̱ a tá fe̱ ye, “aYeso Kiristi be̱ kaye̱e̱r kazatse nong a ta shesh áfe rine̱n,” ri nye katsak ne ri nye ike̱ng kushan cice̱r kamok kaye̱e̱r áfe rine̱n cice̱r mi ne i nar'e.

¹⁶Amma Adakunom ti tonong kuro̱ riye̱ dide̱ng kamok mi tsang i nar rine̱n, aYeso Kiristi tonong kutsesek wu dide̱ng natoon'i nong ku ta sor ike̱ng kumaas nufe áner aya a tanin no̱o̱k katsak ni wu ne á se̱ katser kafe izen izen.

¹⁷Won kuyiik ne nakerek tu sor nafu ma izen izen, wu aya a tana sor Agwo̱m ma izen izen, a ta be igak baꞌ, aya sang a ta kyem a ku di baꞌ. Wu ne a ta nye Adakunom wu ze̱r tsek. Anong.

¹⁸aTimoti, igon'i, mi ta no̱o̱k itabak na be agbang kuto̱ nong ta shining iriri kuzarap a tá nye natoon wan. Kamok ke wan kuus rife̱ na wan ta kyem iko̱n, wan ta ko̱n kuren'e kutek kyo̱ndi asozha aYeso,

¹⁹yiir kuno̱o̱k katsak wan ne i sor be riye̱ rizining. Ákak shim ike̱re̱ iyong baꞌ, iyong kuno̱o̱k katsak ba beseng.

²⁰Ákak kaye̱e̱r ba nye aHimenayus be Alekzanda, áya mi tan won Ishetan'e nubo̱k nong a tu ku tabak ba nong á ta won kuzhe̱e̱sh Adakunom.