Read izere 2 aTimoti 2 Bible Online

2 aTimoti 2 - izere bible

2 aTimoti 2

¹Kamok anong, wan igon'i, nyeseng kpa kaye̱e̱r ritek riya ri ta se kaye̱e̱r aYeso Kiristi.

²Cice̱r ike̱re̱ iya wan tá fok nunaan nasho̱o̱n ánerawe whe̱re̱, bo̱so̱p ánerawe áfe a ta be katsak nong ba ta ma kyem a bo̱so̱p ákak'e gip.

³Naka tsesek kaye̱e̱r risam na mak be yir, kyo̱ndi asozha atek afe aYeso Kiristi.

⁴aSozha akak kuse a ta se kaye̱e̱r itomong a tana bun a te rice wu ni ike̱re̱ kazatse baꞌ, kamok ike̱ng ife asozha ta shim nye a tu kare̱p atekasa wu riye̱.

⁵Anong ne i se be aner aya a ta se be kuyo̱ro̱k itsi, a ta se̱ ishorong baꞌ, ma ke a kuus ike̱ng iya a tá fe̱ ye a ra nye.

⁶Anong ne aner ikap aya a ta nye itomong riko̱ wu dide̱ng, ta se̱ naya wu ni ime̱se̱ng'e, nizen'e gip.

⁷Ni i nye kuto̱ro̱ng natoon ike̱re̱ iya mi ta sen fe̱ be wan kamok Agwo̱m Ágwo̱m tà ka barang mo akanang nong tà ren koakye ike̱ng.

⁸Yiring be aYeso Kiristi aya a tú ku dorok nure̱k, aya a tá nye aner kasa aDauda kyo̱ndi Rife̱ Ritek riya mi tá taas, tá fe̱.

⁹Kamok anong ne mi ti so̱ risam na ma a min te nitso̱m gip kyo̱ndi aner aya a tá nye amaan ike̱ng, amma a ta kyem a ta rosom rife̱ Adakunom baꞌ.

¹⁰Kamok anong mi tsesek kaye̱e̱r koakye kamok áya Adakunom tá kasa nong ba gip ta ma se̱ kashesh na a ta se̱ kaye̱e̱r aYeso Kiristi ne kuyiik kufe izen izen.

¹¹Rife̱ na nye katsak, rita fe̱ ye, “Ke yir kus yir mak be wu, yir tà bun i sor yir mak be wu;

¹²ke i naka tsesek yir, yir tà bun i nye yir rigwo̱m mak be wu. Ke yir ton yir ye sang yir tu ren yir baꞌ, wu tà ton'e gip ye sang wu ti ren yir gip baꞌ.

¹³Ke yir be yir katsak baꞌ, wu tà sor afe katsak kamok wu tà kyem a ton rice wu baꞌ.”

¹⁴Ya kasho̱o̱n be kuka yiring ba ike̱re̱ na. Ku zhe̱e̱r ba nasho̱o̱n Adakunom ye, á ra won kuya nanan natoon naban azhizhe̱k rife̱. Rife̱ kuri riyong ti barang ike̱ng ikak baꞌ, ma ke ri bu beseng áya a ta foos tsek.

¹⁵Nye koakye kuri ike̱ng iya wan tana kyem i nye nong ta tonong ye wan nye aner aya Adakunom tá kasa. Sang tu sor aner itomong aya a ta fok isum baꞌ, ne i bo̱so̱p rife̱ katsak gye̱r.

¹⁶Kam be akpe̱de̱ng rife̱, rife̱ kuzhe̱e̱sh Adakunom, kamok kuse kuri kuyong tà tseng be ánerawe kaye̱e̱r kuse kuri kuya Adakunom ta shim baꞌ.

¹⁷Kubo̱so̱p ba tà ya kasho̱o̱n kyo̱ndi kufor ku tan te inyo̱o̱r. Kaye̱e̱r áner kuri ayong'e akak nye aHimenayus ne aFiletus,

¹⁸áya a tá won iren katsak'e. Ba fe̱ ye izen kudorok ikom nare̱k n gor ma á sak ákak won kuno̱o̱k katsak ba.

¹⁹Gip be anong, katsak rife̱ Adakunom'me ri ta nye itsik'e rusek kpa be izibir natoon'e ye, “Adakunom ren áya a ta nye áfu,” be, “Koangan aya a ta fe̱ ye wu nye afe Agwo̱m Ágwo̱m a ra won amaan kunye wu dim.”

²⁰Kaye̱e̱r agbang kasa a sak awan izinariya ne azurfa tsek baꞌ, amma ike̱re̱ a ta nye be ikon ne riro̱p gip. Kamok ike̱re̱'me ikak i nye ife itomong i ta nye ife kuyiik ne ikak nye ife kuyiik baꞌ.

²¹Ke aner aya a kam be amaan ike̱re̱'ong mi tin fe̱ natoon'e, a ta sor kyo̱ndi ike̱re̱ iya a tin nye itomong iyiik'e, ne a se zhe̱l nong Atekasa wu tin nye itomong be wu. A ta sor be kanye̱k kamok koakye kuri itomong itek.

²²Kam be kushim amaan ike̱re̱ kuri ife ricam ne i ni te rice ni itse̱r kusor kuzhe̱l'e, ne kuno̱o̱k katsak be kushim ne kusor caang, mak be áfikuus áfudang wan á ta yis kaye̱e̱r riyerek Adakunom be riye̱ zhe̱l.

²³Sang ike̱ng ikak ta ka gung be kuya aduk nanan baꞌ, kamok wan ren anong be̱ be aduk riwo̱ng.

²⁴I se gye̱r aner itomong Agwo̱m Ágwo̱m ta sor aner riwo̱ng baꞌ, a ra se gye̱r be koangan ne a nye aner a tana kyem a bo̱so̱p ánerawe'me sang afe riye̱ rife̱ baꞌ.

²⁵A ra bo̱so̱p áya a ta gaar kubo̱so̱p wu'me whiwhe̱ kamok kashim Adakunom ta ka no̱o̱k ba iren kushishing kuse ba nong á ta ren katsak,

²⁶nong ke á tu ku bun kaye̱e̱r kuto̱ro̱ng ba, ne á se̱ ku wher kaye̱e̱r agunung Amaan Aner, aya a tá tsang a ka yiir mo ba nong á ta kuus kuto̱ro̱ng wu.