Read izere 2 aTimoti 3 Bible Online

2 aTimoti 3 - izere bible

2 aTimoti 3

¹Amma yiring ye: Kaye̱e̱r inom igang'e, risam tú ku se dide̱ng.

²Kamok ánerawe tà te áfe kushim rice, áfe kushim itso̱m dide̱ng, ne á te áfe ku ya kuka ne áfe kukok rice naza, ne á te áfe kukas naro̱ ne á gaar kufok átek ba ne á te dar kutonong riye̱ rikan ne á sor zhe̱l baꞌ,

³ne a te dar ku naka shim, ne á naka be kaye̱e̱r aye̱, ne á te áfe kubeseng ayerek ánerawe, ne á te dar kuyiir rice ne á fe̱ hash ne á te awan rishishim ne á raba koakye ike̱ng itek,

⁴ne á naka mo̱o̱r ne á shim kunye ike̱re̱ gbashak ne á kok rice naza ne á shim ike̱re̱ kazatse ne inar Adakunom,

⁵a tu ku ye̱re̱k ba kyo̱ndi á ren Adakunom, amma á raba kukyem Adakunom kuya ku ta tonong kuse kutek baꞌ. Kam be áner kuri ayong.

⁶Kaye̱e̱r ba ákak kuse á ta tse̱r iren ku no̱o̱s kaye̱e̱r nasa ánerawe nong á ta wo̱ro̱k ányining áya a ta be ritseng baꞌ, áya rine̱n tan sok rice ba ne amaan iriri kushim ike̱re̱.

⁷Ányining kuri ayu shim kubo̱so̱p ike̱re̱ ifas, amma á ra kyem á ren katsak baꞌ.

⁸Áner'e se kyo̱ndi aZhenis be aZhabanis [1] A tá shishim aMusa, anong ne áner'ong raba katsak gip, kuto̱ro̱ng ba wei cei ne kuno̱o̱k katsak ba te kukpe̱de̱ng'e.

⁹Á ta ra bo̱ karo̱ baꞌ, kamok koangan ta di rifunam ba zizirik kyo̱ndi a tá di rife̱ aZhanis be aZhambanis.

¹⁰Kyo̱o̱rna wan ren kuri ibo̱so̱p'i ne kuse mi ne ike̱ng mi ta se be kanye̱k'e, ne kuno̱o̱k katsak'i, be kuwhiwhe̱ mi, ne kushim'i be ku naka tsesek mi ta be.

¹¹Wan ren kuri kutabak ne amaan risam mi ta so̱, abaan aya mi tá so̱ nizen iya mi tá se na Antakiya ne na Ikoniya be aListira baꞌ. Gip be anong Adakunom ti shesh kaye̱e̱r'e cei.

¹²Katsak'e koangan afe a ta shim a ta sor kusor kuri kufe Adakunom kaye̱e̱r aYeso Kiristi ta so̱ risam.

¹³Amma ámaan aner ne áner á ta sok rice ba á ta gor karo̱ ba tu kuse tin barang kute amaan'e dide̱ng ma a tà wo̱ro̱k ánerawe whe̱r ne á ma ka wo̱ro̱k ba.

¹⁴Amma, wan aTimoti, ya kasho̱o̱n be ike̱ng iya a tá ka bo̱so̱p'e, wan ren kunye katsak kamok wan ren kuri áner aya wan tá bo̱so̱p nufuba.

¹⁵Yiring, kum izen iya wan tá ru nye igon, wan tsang i ren rife̱ Adakunom rizhe̱l'e, riya ri tana kyem ka bo̱so̱p iren kuse̱ kashesh ke anerawe no̱o̱k katsak na aYeso Kiristi.

¹⁶Koakye ike̱ng iya a tá zibir kaye̱e̱r kufumung rife̱ Adakunom nye isong Adakunom. Izibir'e se gye̱r kamok kubo̱so̱p, ne kuzhe̱e̱r anerawe ne kunees kuse anerawe be kubo̱so̱p anerawe iren kuse gye̱r nasho̱o̱n Adakunom,

¹⁷nong ase̱ koangan afe a ta nye afe Adakunom ta shining ne a se be kanye̱k kamok koakye kuri itomong itek.