Read izere 2 aTimoti 4 Bible Online

2 aTimoti 4 - izere bible

2 aTimoti 4

¹Mi fe̱ be wan be agbang kuto̱ nasho̱o̱n Adakunom ne aYeso Kiristi, aya a tana to̱ atser be ikom amok, a tana bun a be̱ nong a ta te tsik rigwo̱m wu ye,

²wan ri tsesek ninye awazi rife̱ Adakunom, ko be izen ko dar izen. Nees ánerawe, kuzhe̱e̱r ba ne i kutsesek ba ne i ka bo̱so̱p ba'me kaye̱e̱r awhiwhe̱.

³Kamok izen ta be̱ iya sang ánerawe tana baꞌ, shim kufoos kubo̱so̱p kufe katsak baꞌ. Amma á ta nar kushim kufoos ike̱re̱ iya aye̱ ba tà shim ne kamok kuwhaan ato ba a tse̱r áner kubo̱so̱p nong á tu ku taas ba ike̱re̱ iya ba ta shim á ta foos.

⁴Ánerawe ta raba kufok katsak, amma á ta ban á shim kufoos atin afekasho̱o̱n ingya.

⁵Amma wan sak riye̱ be ike̱re̱ kuri iyong, naka tsesek kaye̱e̱r risam wan, ya kasho̱o̱n be kunye itomong aner awazi Rife̱ Ritek ne i ni sak riye̱ ni itomong iya a tá ka sak'e ye wan ra nye cice̱r.

⁶Kamok izen n nye a tanin sok a ta no̱o̱k kyo̱ndi asidaka igang'e, izen kutseng'i n nye.

⁷Mi n nye ike̱ng ife mi tana kyem i nye, mi n kon kuren kutek, mi n gang itsi'me, mi yiir kuno̱o̱k katsak mi ta be.

⁸Kyo̱o̱rna makong, a min sak ishorong ife ku se gye̱r'e nasho̱o̱n Adakunom, iya Agwo̱m Ágwo̱m, aner kuto̱ amok afe katsak tanin no̱o̱k Katuk'ong. Sang awan mi ne a tin no̱o̱k tsek baꞌ, amma be cice̱r áner aya a ta min te riye̱ nube̱ wu gip.

⁹Nye koakye ike̱ng iya wan tana kyem i nye nong tà be̱ nunaan gbashak,

¹⁰kamok aDemas min won kamok kushim kazatse na, nong a tá be na aTasalonika, aKirishen be na aGalati, aTitus be aDalmatiya.

¹¹aLuka wu ze̱r tsek ne a se mak be mi. Tse̱r aMarkus nong tà be̱ yin mak be wu, kamok wu tin se̱ mo ni itomong'e.

¹²Mi n tom aTikikus na Afisa.

¹³Nizen iya ne wan tana be̱ ne i ni cer awe̱n kukpiin'i mi ta won nufe aKarpus na aToruwas be afumung'i ákak, abanang áfe kukpa [2] kya baꞌ.

¹⁴Alekzanda a ta nye atu'me ti mo̱o̱r dide̱ng. Agwo̱m Ágwo̱m tú ku no̱o̱k ishorong wu tite̱re̱ be ike̱ng iya wu tá nye.

¹⁵Wan gip sak riye̱ be wu, kamok a shik rife̱ yir tá fe̱ yir dide̱ng.

¹⁶Nizen iya a tá tseng be mi naro̱ amok ni ime̱se̱ng'e, akak ti tobok baꞌ, koangan ti won. Mi mok ye Adakunom tà yiir iyong natoon rice ba baꞌ.

¹⁷Amma Agwo̱m Ágwo̱m se mak be mi, ayong a ti no̱o̱k agap nong ase̱ kamok mi rife̱ wu tà tseng cei nong áner aya a ta nye áner aYahuda baꞌ, cice̱r tà fok. A ti shesh nanu azaki fan a bin te̱n amok riku.

¹⁸Agwo̱m Ágwo̱m tin shesh kaye̱e̱r koakye kuri ike̱ng imaan'e i tana be̱ ne á tseng be mi gye̱k gye̱k ma kaye̱e̱r kasa rigwo̱m wu kaye̱e̱r kaza. Won kuyiik tu nye kufu ma izen izen! Anong.

¹⁹Ni nye shou aBiriskila be Akila ne áfekasa Onesiforus.

²⁰Arastus rusek na aKoranti, mi won aTaromus be kuro̱k na aMilitus.

²¹Te gbashak ta be̱ nizham izen kuwun ta ra nye. aYubulus be aPuden ne aLanus be aKalaudiya ne ribir ároneng cice̱r ta nye ashou.

²²Agwo̱m Ágwo̱m ra se mak be kabik yin. Ritek wu se mak be yin.