Read izere aTitus 1 Bible Online

aTitus 1 - izere bible

aTitus 1

¹Mi, aBulus, asam Adakunom ne i bun i nye amanzo aYeso Kiristi. A tin sak mi ta te amanzo nong ta tsesek kuno̱o̱k katsak áya Adakunom tá kasa, ne i kutobok ba nong á ta ren katsak kaye̱e̱r ikuus Adakunom,

²kamok kute riye̱ natoon kutser kufe izen izen. Adakunom, wu a ta be abo̱o̱s baꞌ, ne a no̱o̱k kuto̱ natoon kutser kufe izen izen nizham a ta ra san ízam.

³Nizen iya wu ta di i ta se gye̱r, a tana tonong kaye̱e̱r rife̱ wu riya mi ta sen nye awazi'me riya a ti no̱o̱k amana'me kaye̱er rife̱ wu be agbang kuto̱ Adakunom Aner kashesh yir.

⁴Wan, aTitus, igon'i kafe katsak kaye̱e̱r kuno̱o̱k katsak yir ta be yir cice̱r yir. Ritek be kameneng riye̱ Adakunom a ta nye Ada yir be aYeso Kiristi Aner Kashesh yir se mak be wan.

⁵Mi tá won na aKirit nong ase̱ wan ta gang itomong iya i ta rusek dar kugang ne i te áko̱k kasho̱o̱n ikilisiya kaye̱e̱r koakye kuwo̱p kyo̱ndi mi tá ka tak.

⁶Ako̱k kasho̱o̱n ikilisiya ra nye aner aya a se gye̱r nasho̱o̱n ánerawe, aner a ta be abining azining, inoon wu ra nye afikuus sang á tu se kpe̱rde̱k ka á tu shonong baꞌ.

⁷Kum ako̱k kasho̱o̱n ta nye aner itomong Adakunom, a ra nye aner aya sang a tana ku se̱ be ike̱ng ikak imaan'e baꞌ. Sang a tu nye aner aya a ta kok rice naza baꞌ, ka afe riye̱ rife ka aner a ta so̱ kugbe̱re̱ ma a ta feng'e, ka aner a ta shim kuren ka aner aya a ta ma ka shim itso̱m baꞌ.

⁸A ra ban a nye aner aya a ta shan átsen ibo̱k ifa dim, ne a shim ku nye ike̱ng iya i ta se gye̱r ne a yiir rice wu ne a be katsak ne a se zhe̱l, ne a mees rice wu.

⁹Ako̱k kasho̱o̱n ikilisiya ra nye aner aya a tana yiir rife̱ Adakunom riya a tu ku tak be agap kyo̱ndi a tu ku bo̱so̱p'e nong a tin tsesek ákak be awazi ne kubo̱so̱p kufe katsak, ne a gaar áya a ta raba kubo̱so̱p'e.

¹⁰Áfe kushonong kuse whe̱re̱ ne áfe kufe̱ kpe̱de̱ng kuse ne áya a ta wo̱ro̱k ánerawe, abanang áner aya a ta kuus kubo̱so̱p áner aYahuda baꞌ.

¹¹Wan ta roon áfe kubo̱so̱p kuri kufe abo̱o̱s'ong dim, kamok á tsang á beseng ánerawe na nasa ba be kubo̱so̱p ike̱ng iya i ta se gye̱r ke ba bo̱so̱p ánerawe'me baꞌ, nong á ta se̱ ike̱ng iya ba ta shim tsek.

¹²Ei, aner aKirit, akak kaye̱e̱r áner kuzarap ba ne a ku fe̱ ye, “Áner aKirit'e be abo̱o̱s, á se kyo̱ndi ámaan ikewum, á yo̱mo̱ng ne á mak á yas dide̱ng.”

¹³Rife̱'ong nye katsak. Kamok anong ku zhe̱e̱r ba be agap, ne kuno̱o̱k katsak ba ta kpa agap,

¹⁴nong á tà won kufoos atin afekasho̱o̱n áner aYahuda ne ku kuus itsi ánerawe áya a ta gaar katsak.

¹⁵Koakye se zhe̱l nufe áner aya a ta sok ye i se ázhe̱l'e. Amma ike̱ng ikak se zhe̱l nufe áya a be katsak ka áya a ta be agak riye̱ baꞌ, kamok kuto̱ro̱ng ba ne aye̱ ba se zhe̱l baꞌ.

¹⁶Áner kuri ayong fe̱ ye ba ren Adakunom amma kunye ba tonong ye ba ren Adakunom baꞌ. Kunye ba se kye̱re̱, á shonong, á kyem á nye ike̱ng ikak itek baꞌ.