Read izere aTitus 2 Bible Online

aTitus 2 - izere bible

aTitus 2

¹Amma wan, bo̱so̱p ánerawe ike̱ng iya i ta se gye̱r dim be katsak.

²Bo̱so̱p ásho̱n iren kuse tatan, á ra be kuyiik, á ra be kuyiir rice ne á se gye̱r kaye̱e̱r kuno̱o̱k katsak ba, be kushim kufe katsak ne kutsesek dide̱ng.

³Anong ne anyako, kubo̱so̱p ba'me ye á ra nye kusor kuri kuya ku ta tas kufe ányining áya a ta nye afikuus, sang a tu be imok ka áya a ta mak á so̱ ike̱re̱ ma a ta feng'e baꞌ, amma á ra bo̱so̱p ánerawe ike̱ng iya i ta nye katsak.

⁴Iyong ta sak ba ta kyem á bo̱so̱p ányining áya a ta ru nye nanamang nong á tà shim átek ba ne inoon ba,

⁵ne á yiir rice ba ne á sor zhe̱l ne á ni sak riye̱ na nasa ba, be kuse kutek ne á fok átek ba kuto, fan á bu te kye̱re̱ be rife̱ Adakunom.

⁶Anong ne ácam gip, ku bo̱so̱p ba'me ye á ra yiir rice ba.

⁷Kaye̱e̱r koakye wan sor ike̱ng ba tanin nye kumaas natoon'e be kunye ike̱ng iya i ta nye itek. Kaye̱e̱r kubo̱so̱p wan, nye be riye̱ rizining ne katsak,

⁸ne atuk ica katsak fan ákak bu shik. Be anong ne áya a tá ka rawan ta fok isum kamok á se̱ ike̱ng ikak imaan'e á tanin fe̱ natoon yir baꞌ.

⁹Tak ásam ye á ra fok átekasa ba kuto kaye̱e̱r koakye ne á nye ike̱ng iya ba tana fok kusas'e sang á tu ya kanu be ba baꞌ,

¹⁰ka á ta ka nye ba itsang baꞌ. Amma á ra ban á tonong ye ba se gye̱r ne á be katsak kaye̱e̱r koakye, nong ase̱ kaye̱e̱r koakye iren ba tà tonong ye kubo̱so̱p rife̱ Adakunom Aner Kashesh yir se yiik.

¹¹Kamok Adakunom tonong ritek wu nong ánerawe cice̱r ta se̱ kashesh.

¹²Ritek'e ti bo̱so̱p yir iren kufe̱ ye, wayo be kuse kuri kuya Adakunom ta shim baꞌ, ne amaan kushim ike̱re̱ kazatse, nong ta yiir yir rice yir, ne i se yir zhe̱l ne i be yir kuse kuri kufe Adakunom kaye̱e̱r izam iyuna.

¹³Yir sor yir anong nong tin tor yir agbang kunom kuya yir ta min te yir aye̱, nizen Adakunom yir ayiik'e ne Aner Kashesh yir aYeso Kiristi tana tonong kuyiik wu.

¹⁴aYeso ne no̱o̱k rice wu nong a tin sheshek yir kaye̱e̱r amaan kunye yir ne a ni kusu yir nong tá sor yir áfu ne i shim kunye yir ike̱ng iya i ta nye itek.

¹⁵Ka bo̱so̱p ba ike̱re̱ na. Ka tsesek ba ne i ka zhe̱e̱r ba be agbang kuto̱. Sang tu won akak ta ka zhe̱e̱sh baꞌ.