Read izere aFilimon 1 Bible Online

aFilimon 1 - izere bible

aFilimon 1

¹Mi, aBulus, aya a tin te nitso̱m kamok aYeso Kiristi ne aronyining yir aTimoti ne i ta zibir wan kufumung na aFilimon, agbang aferime̱ yir ne i bun i nye aferime̱ itomong yir.

²Kufumung'e nye kufe yin mak be ángasnyining yir Afiya ne Akipus áya a ta nye asozha aKiristi be ribir áfikuus áya a ta nyiis kari wan.

³Ritek be kameneng riye̱ Adakunom a ta nye Ada yir ne Agwo̱m Ágwo̱m yir aYeso Kiristi se mak be yin.

⁴Mi tonong Adakunom riye̱ rikan ye̱r ye̱r ke mi sen nye aduwa ne i yiring be wan.

⁵Mi fos kuri kuno̱o̱k katsak wan ta be natoon Agwo̱m Ágwo̱m yir aYeso ne kuri kushim wan tá shim ázhe̱l'e cei.

⁶Aduwa mi se ye wan tin barang ifeng ni itaas itak natoon kuno̱o̱k katsak wan, nong ase̱ wan ta ren koakye kuri ike̱ng itek yir ta be yir kaye̱e̱r aYeso Kiristi.

⁷Kushim wan ta be ti kare̱p riye̱ dide̱ng ne kuni tsesek dide̱ng kamok wan aroneng, wan sak aye̱ ázhe̱l'e ta men.

⁸Kamok kuri kushim afe wan ta shim áfikuus ne mi kyem i ros riye̱ kaye̱e̱r aKiristi nong tá fe̱ be wan ye wan ri nye ike̱ng iya i ta tas ke wan nye.

⁹Amma kamok mi ta ka shim, mi shim ta ka nye akusuk, mi aBulus, mi tá nye asho̱n ne i bun i se nitso̱m kyo̱o̱rna kamok aYeso Kiristi.

¹⁰Mi ta nye izong kamok igon'i aOnesimus, aya a tá shan aKiristi nizen iya mi ta se nitso̱m.

¹¹Gbugbang a tsang a be itomong nufuan baꞌ, amma kyo̱o̱rna a be itomong nufuan be nunaan dide̱ng.

¹²Mi bun i sen ku tom nufuan, wu aya a ta nye itsam riye̱ mi.

¹³Mi shim ke wan ku yiir nong a ta sor mak be mi nong ase̱ a ta ka shishing ne a ni se̱ mo ne i nye ike̱re̱ ne mi se nurosom kamok kutaas Rife̱ Ritek Adakunom.

¹⁴Amma mi shim ta nye ike̱ng ikak dar kushim wan baꞌ, nong ase̱ koakye kuri ritek wan tanin nye'me ta se be kushim riye̱ wan sang kyo̱ndi a ta te mo agap baꞌ.

¹⁵Kashim ike̱ng i ta sak wu ta kam be wan kaye̱e̱r kaban izen cie̱k nye nong ase̱ wan ta bun i ku se̱ nong ta sor yin mak ma izen izen.

¹⁶Sang kyo̱ndi asam baba baꞌ, amma áner aya a ta nar ásam, kyo̱ndi aronyining wan aya wan tá shim dide̱ng. Mi ren wan ku shim dide̱ng ne i ni nar kyo̱ndi anerawe be aronyining kaye̱e̱r Agwo̱m Ágwo̱m yir.

¹⁷Kamok anong ke wan ti sok ye mi nye afudang itomong wan, to̱, kushan ibo̱k ifa kyo̱ndi wan tanin shan mi.

¹⁸Ke a mak ka nye ike̱ng ikak wan tá fok kusas'e baꞌ, ka wan tu be kuta ike̱ng ikak ayi ne wan ni won'e.

¹⁹Mi, aBulus, ne i sen ka zibir kufumung na be kubo̱k'i, ye mi ta ka karang. Sang tu fe̱ i tak kutser kufas wan tá se̱ kamok mi baꞌ.

²⁰Aroneng, mi mok ye mi ta se̱ ritek nufuan kamok Agwo̱m Ágwo̱m. Kusuk, ni tsesek.

²¹Mi ti no̱o̱k katsak ye wan tà kuus ike̱ng iya mi ta fe̱. Mi ta ka zibir kufumung na ne mi ren tse̱ng tse̱ng ye, wan ta nye ike̱ng ife i ta nar iya mi ta fe̱ be wan ye wan ra nye.

²²Ike̱ng ikak izining mi ta shim ke wan ren gbak nye, nye kutu átsen kamok mi, kamok mi n te riye̱ kube̱ nufe yin ke Adakunom fok aduwa yin a tin won.

²³Abafaras afudang'i, i ta se yir nitso̱m mak kamok aYeso Kiristi, ta nye yin ashou.

²⁴Anong ne áfudang itomong'i, aMarkus be Aristakus ne aDemas be aLuka ta nye yin ashou gip.

²⁵Ritek Agwo̱m Ágwo̱m yir aYeso Kiristi se mak be kabik yin.