Read izere Ibrani 1 Bible Online

Ibrani 1 - izere bible

Ibrani 1

¹Gbugbang, Adakunom fe̱ kanu be átukop yir ni iren ze̱r ze̱r ne nizen ze̱r ze̱r be aner kuzarap.

²Amma kaye̱e̱r inom igang'e na, a fe̱ kanu be yir be Igon wu, aya a tú ku sak a ta te a ya kutse ike̱re̱ cice̱r. Mak be wu ne a nye koakye.

³Igon'e ne ka nye akanang kuyiik Adakunom, a tas Adakunom kyo̱o̱n. A yiir koakye ike̱ng be kukyem rife̱ wu. Nama a tá sak yir ta te yir zhe̱l kaye̱e̱r rine̱n yir, yong a sonong nubo̱k riya Aya a ta nye a yiik'e kaye̱e̱r kaza.

⁴Kamok anong ne wu nar ámaleka be kuyiik kyo̱ndi riyerek a tu ku te'me ta nar rifuba.

⁵Kamok amaleka akak kuse Adakunom tá kun fe̱ be wu ye, “Wan nye Igon'i, katuur mi n te Ada wan” baꞌ. Ka ye, “Mi tà te Ada wu, ne wu ma te Igon'i” baꞌ.

⁶Nizen iya Adakunom tá tom igon wu kafe ime̱se̱ng'e kaye̱e̱r kazatse, a bun a fe̱ ye, “Won ámaleka cice̱r tu ku ya iben.”

⁷Natoon ámaleka, Adakunom fe̱ ye, “Adakunom sak ámaleka sor kyo̱ndi kuwun ne a sak ásam wu tá sor kyo̱ndi rigyem kuro̱ng.”

⁸A fe̱ natoon Igon'e ye, “Itsik rigwo̱m wan, Adakunom, tà sor ma izen izen. Katsak ne ka ta nye ishe̱n rigwo̱m wan.

⁹Wan shim katsak ne i rawan amaan kuse kamok anong Adakunom, a ta nye Adakunom wan, tá kasa a ta ka korok name rice. A tá sak wan ta se̱ kuyiik ku ta nar kufe áfudang wan.”

¹⁰A bun a fe̱ ye, “Kum ni ime̱se̱ng'e, Agwo̱m Ágwo̱m, wan ne i barak ribor kazatse, kaza nye itomong ibo̱k wan.

¹¹Ike̱re̱'ong cice̱r tà gor, amma wan tà sor ma izen izen. Ike̱re̱'ong tà kop kyo̱ndi ares.

¹²Wan tà ka kunung ba kyo̱ndi ares, a tà yiir ku shishing kyo̱ndi ares. Amma wan shishing baꞌ, aye̱ wan be igak baꞌ.”

¹³Ámaleka anyaka ne Adakunom kun fe̱ be wu ye, “Sonong nubo̱k riya mi, ma mi sak ámudo̱n wan te ike̱ng kusak atak wan e̱?”

¹⁴Ámaleka cice̱r nye nabik naya na ta nye áner á ta se̱ kashesh itomong.