Read izere Ibrani 10 Bible Online

Ibrani 10 - izere bible

Ibrani 10

¹Itsi nye nawu ike̱re̱ itek i tana be̱ tsek sang atuk kunik ike̱re̱'me baꞌ. Iyong ne isak asidaka aya a tá yiir nye'me koakye izen, aye̱ be aye̱ tá sak áya a ta be̱s kuya Adakunom iben ta te zhe̱l baꞌ.

²A fa fe̱ ye, Itsi ta kyem i sak ánerawe ta te zhe̱l, ke a ba nye asidaka'me akak baꞌ. Ke a re̱ng rine̱n ánerawe kazining tsek, ke aye̱ ba se gak natoon rine̱n ba baba baꞌ.

³Amma asidaka a tá nye'ong yiir iyiring ánerawe rine̱n ba koakye riye̱ tsek.

⁴Kamok naso̱k amung be izha ta kyem i kusu rine̱n nigaan'e baꞌ.

⁵Kamok anong, nizen iya aKiristi tá be̱ nazatse, a fe̱ ye, “Asidaka be kunyesek ike̱re̱ ne wan shim baꞌ, amma kuro̱m ne wan nye kanye̱k'e.

⁶Asidaka a ta shosh ne asidaka kukusu rine̱n, ne wan ti be riye̱ rikan baꞌ.

⁷Iyong mi fe̱ ye, ‘Mi na, Adakunom mi, mi m be̱ nong mi ta nye ike̱ng iya wan ta shim, kyo̱ndi i ta se ni izibir natoon'i, kaye̱e̱r Kufumung rife̱ Adakunom.’ ”

⁸Ni ime̱se̱ng'e, a fe̱ ye, “Asidaka be kunyesek ike̱re̱, ne asidaka kushosh be afe a ta nye kamok rine̱n, wan ti be riye̱ rikan baꞌ.” Itsi ne i fe̱ ye a ra nye anong.

⁹A bun a fe̱ ye, “Mi na, mi n be̱ ta nye ike̱ng iya wan ta shim.” Iyong tonong ye a won kushu kufe ime̱se̱ng'e nong a tú ku te kufe afa.

¹⁰Be kushim Adakunom ne yir n te yir azhe̱l'e be kuno̱o̱k aYeso Kiristi kyo̱ndi asidaka kutak kuzining tsek.

¹¹Koakye katuk atsi nye itomong wu, a nye asidaka ne a toos'e koakye kunom. Gip be anong iyong kyem i kusu rine̱n baꞌ.

¹²Amma aKiristi tá nye asidaka wu kutak kuzining kamok rine̱n ánerawe, a sonong nubo̱k riya Adakunom.

¹³Kum nizen iyong a sen tor ámudo̱n wu ta te ike̱ng kusak atak wu.

¹⁴Kamok a tá nye asidaka kutak kuzining, a sak áfe a ta te zhe̱l tà shining ma izen izen.

¹⁵Kabik Kazhe̱l'e fe̱ be yir anong gip natoon iyu. Ni ime̱se̱ng a fe̱ ye,

¹⁶“Adakunom fe̱ ye, iyu nye kushu mi tana nye be ba. Nama anong mi tà ka te ba Itsi mi kaye̱e̱r aye̱ ba ne mi bun i ka zibir ba'me naye̱.”

¹⁷A bun a ti barang ye, “Mi tà ba yiring be rine̱n ba be amaan kunye ba baꞌ.”

¹⁸Kum a tá mi n re̱ng yir rine̱n yir, asidaka bu kuse kamok rine̱n baꞌ.

¹⁹Kamok anong, ároneng, yir ta kyem i no̱ yir Naro̱ ka ta Nar Kuse Zhe̱l be riye̱ rizining kamok naso̱k aYeso.

²⁰Wu ti karak yir iren ifas iren kutser iya i ta gor ikarak alaple, iyong nye kuro̱m wu a tá no̱o̱k.

²¹Kum yir ta be yir agbang atsi nasa Adakunom,

²²Won tu be̱ yir bubarak be Adakunom be riye̱ rizining, be kuno̱o̱k katsak kamok aYeso ti mis naso̱k wu na agak aye̱ yir. A bun a kusu iro̱m yir be ashi a ta se zhe̱l.

²³Won yir tu yiir yir ike̱ng iya yir ta min te yir riye̱, iya i ta taas yir, kamok wu afe a ta fe̱ ye wu tin nye yir ike̱re̱ na shishing rife̱ wu baꞌ.

²⁴Kamok anong, won yir tu naka tobok yir ne i naka tonong yir kushim be kunye kutek.

²⁵Sang yir tu won dar i nyiis yir kyo̱ndi ákak tan me̱ ne á nye baꞌ. Amma i ban naka tsesek yir, ne i ni barang yir kunye anong kamok yin di yin Kunom'me nye ne kube̱ gbugbarak.

²⁶Asidaka akak ba bun a kuse kamok rine̱n yir ke yir ya kasho̱o̱n be kunye rine̱n nama a tá min tonong yir katsak'e baꞌ.

²⁷Igak'e ma nye ye, a tà tor amok Adakunom kaye̱e̱r ikap kutiim be kuro̱ng kufe ku tana ya ámudo̱n Adakunom.

²⁸Koangan afe a tá gaar kukuus Itsi aMusa ku sang a fok kuro̱ riye̱ wu baꞌ, kum ke aner afa ka ataar ayi fe̱ ye á nye rine̱n'e.

²⁹Ke itak'e se anong, akye̱ kuri ike̱ng ne yin di yin ye a tá nye be áner aya a ta zhe̱e̱sh Igon Adakunom ne á nye kpe̱de̱ng be naso̱k na tú ku kusu ba kyo̱ndi na se zhe̱l baꞌ, a fe̱ imaan'e natoon Kabik Kazhe̱l'e kafe ritek Adakunom e̱?

³⁰Kamok yir ren yir afe a ta fe̱ ye, “Ku kukarang ike̱ng nye kunaan; mi ne i tu ku karang.” A bun a fe̱ gbak ye, “Agwo̱m Ágwo̱m tà to̱ ánerawe wu amok.”

³¹I nye ike̱ng inyim dide̱ng anerawe tana kpa nubo̱k Adakunom afe kutser.

³²Yiring yin kaye̱e̱r inom kama nama, yin ta se̱ yin akanang Adakunom, yin tsesek yin dide̱ng, gip be risam i tá so̱ yin.

³³Izen ikak a ta te yin nisum nasho̱o̱n ánerawe ne a ka tabak yin. Izen ikak, yin shim a ta ka nye yin ike̱re̱ iyong mak be áya a ta sen ku tabak ba gip.

³⁴Yin tonong yin áya a ta se nitso̱m kuro̱ riye̱. Yin nye yin riye̱ rikan nizen iya a tin shan ike̱re̱ yin, kamok yin ren yin ye yin be yin ike̱re̱ i ta nar iyong ife i tana sor ma izen izen.

³⁵Kamok anong, ikap yin tu te gbe̱re̱k baꞌ kamok ishorong yin nye igbang'e.

³⁶Tsesek yin, ta se̱ yin ike̱ng iya Adakunom tá no̱o̱k kuto̱ ye a tà ka no̱o̱k ke yin nye yin ike̱ng iya wu ta shim.

³⁷A tu won cie̱k tsek, “Aya afe a ta saase tà be̱, a tà sok izen baꞌ.

³⁸Azhe̱l'e anaan tin sor natoon kuno̱o̱k katsak. Ke a tu bun kama, riye̱ mi tà beseng be wu.”

³⁹Yir nye yir kuri áya a tana kubun kama ne á wei baꞌ, amma yir min no̱o̱k yir katsak, a min shesh yir.