Read izere Ibrani 11 Bible Online

Ibrani 11 - izere bible

Ibrani 11

¹Kuno̱o̱k katsak nye ku ni te riye̱ dim ye yir ta se̱ yir ike̱ng iya yir ta min te yir riye̱ dim, iya sang yir ta di yir baꞌ.

²Iyong ne i sak a tá kerek áner agbugbang.

³Natoon kuno̱o̱k katsak ne yir ti ren yir ye a nye kazatse be rife̱ Adakunom. Kamok anong, a nye ike̱re̱ yir tá di yir kaye̱e̱r kazatse na be ike̱re̱ iya sang yir ta di yir be anyisi yir baꞌ.

⁴Natoon kuno̱o̱k katsak ne aHabila ti nye Adakunom asidaka afe a tá nar afe aKayinu. Be anong ne a se̱ kushim Adakunom ye wu nye aner atek nasho̱o̱n Adakunom kamok a shan asidaka wu. aHabila n ku, amma kamok kuno̱o̱k katsak wu a ru fe̱ kanu ma kyo̱o̱rna.

⁵Natoon kuno̱o̱k katsak ne a ti sok aEnok be kutser, a di riku baꞌ. A tú tse̱r, amma a tú ku se̱ baꞌ, kamok Adakunom tú sok. A tú ku kerek ye a nye akak kaye̱e̱r áfe a tá kare̱p Adakunom riye̱ nizham a tá ra ku sok.

⁶Akak ta kyem a kare̱p Adakunom riye̱ dar kuno̱o̱k katsak baꞌ, kamok koangan ne a be̱ nufu ma a ti no̱o̱k katsak ye wu kuse, ye a nyesek aya a tu ku tse̱r be katsak ishorong ba.

⁷Natoon kuno̱o̱k katsak ne aNuhu ti kpa inyim izhe̱l'e nizen iya a tú ku ko̱ro̱k kuto natoon ike̱re̱ wu tan di baꞌ. A no̱k kukpara ashi a tin shesh áfekari wu. Kuno̱o̱k katsak aNuhu sak a tak kazatse rine̱n ba, aNuhu tà sor aya kutse kamok a se gye̱r nasho̱o̱n Adakunom, kuya a ta se̱ natoon kuno̱o̱k katsak.

⁸Natoon kuno̱o̱k katsak ne Ibrahim ti fok kuto̱ Adakunom a tá tseng naro̱ kaya wu tá ren baꞌ, nizen iya a tá fe̱ be wu ye a ra tseng naro̱ ka tana te kafu nasho̱o̱n.

⁹Natoon kuno̱o̱k katsak ne a ti sor kyo̱ndi aner atsen naro̱ kaya Adakunom tá fe̱ ye a tú ku no̱o̱k, niben ikak. A sor nubur mak Ishaku ne aYakub áfe a tá te áya kutse ike̱ng iya Adakunom tá fe̱ ye a tú ku no̱o̱k ba.

¹⁰Kamok wu tsang a ni te riye̱ nuwo̱p kuya Adakunom tá barak ribor'e a tá bun a no̱k be rice wu.

¹¹Natoon kuno̱o̱k katsak ne Ibrahim ti se̱ igon be rikop wu gip, be aSaratu a tá kun tes baꞌ. A ti no̱o̱k katsak ye Adakunom aya a tá tsang a fe̱ ye a tú ku no̱o̱k, a tu ku no̱o̱k igon.

¹²A san'e be aner azining tsek, afe a ta se kyo̱ndi aner aya a tan ku, kyo̱o̱rna an te ánerawe whe̱re̱ kyo̱ndi adar a ta se naza ka rize̱k kanu agbang isho̱ng ayi.

¹³Áner na kus cice̱r kaye̱e̱r kuno̱o̱k katsak ba. Ba shan ike̱ng iya Adakunom ta fe̱ be ba ye á ta ka no̱o̱k ba be rice ba baꞌ. Igak á ta di gugo̱k tsek ne á nye riye̱ rikan. Á shim ye ba nye átsen nazatse.

¹⁴Ánerawe áfe a ta fe̱ ike̱re̱ kuri iyuna tonong kanang ye ba shim kaben kafe rice ba.

¹⁵I fa fe̱ ye á ru to̱ itak kaben kaya ba tú ku ne, ke á fe̱ á tú ku bun.

¹⁶Á tsang á ni te riye̱ ba natoon kaben katek, kafe kaza. Kamok anong, Adakunom fok isum a tú ku yis ye Adakunom ba baꞌ, kamok a ma ka no̱k ba kuwo̱p.

¹⁷Natoon kuno̱o̱k katsak ne Ibrahim ti no̱o̱k Ishaku a tá sor asidaka nizen Adakunom tú ku bo̱mo̱ng. Wu afe a tá shan ike̱ng iya Adakunom tá tsang a fe̱ be wu ye a tú ku nye'me, a bun a sen sok asuze̱r igon wu'me a tin nye asidaka.

¹⁸Adakunom tsang a fe̱ be wu ye, “Wan ta se̱ nabon whe̱re̱ be Ishaku.”

¹⁹Ibrahim ren ye Adakunom tá kyem a dorok kukom, kamok anong, yir ta kyem i fe̱ yir ye a se̱ Ishaku nama a ta ku.

²⁰Natoon kuno̱o̱k katsak ne Ishaku ti te aYakub be Isuwa kuce̱ natoon kusor ba.

²¹Natoon kuno̱o̱k katsak ne aYakub ti te inoon aYusufu kuce̱ nizen a tana ku, a ti fereng natoon ishe̱n wu nong a tá ya Adakunom iben.

²²Natoon kuno̱o̱k katsak ne aYusufu ti fe̱ itak kuwuruk inoon Isarela niben aMasar nizen iya a tá be̱ barak a tá ku. A fe̱ ike̱ng ikak natoon ikup wu.

²³Natoon kuno̱o̱k katsak ne atek aMusa tú ne̱r ma ife̱n itaar nama a tú ku tes, kamok a di igon'e tá kam be ribir'e. Á tú ku teng rigwo̱m gum baꞌ.

²⁴Natoon kuno̱o̱k katsak ne aMusa ti rawu a tú ku yis ye igon angas aFiruna nizen iya a tá te agbang'e.

²⁵A nar kushim a tá so̱ risam be áner Adakunom ingya be a tana fok kusas rine̱n kaye̱e̱r kaban izen cie̱k.

²⁶A nar kushim a tá fok isum kamok aKiristi be a tana sor kaye̱e̱r kurum aMasar, kamok a tsang a ni te riye̱ nishorong wu.

²⁷Natoon kuno̱o̱k katsak ne a ti dorok na aMasar dar inyim riye̱ kubeseng agwo̱m. A tsesek kamok a ye̱re̱k aya sang anyisi tu kudi baꞌ.

²⁸Natoon kuno̱o̱k katsak ne wu ti yiring be aPasova be kumis naso̱k fan amaleka afe a tana fe̱s inoon ime̱se̱ng'e ta fe̱s nafe áner Isarela.

²⁹Natoon kuno̱o̱k katsak sak áner Isarela tar agbang isho̱ng iseng niben ikoor. Nizen áner aMasar tá shim á tá nye anong ashi tseng be ba.

³⁰Natoon kuno̱o̱k katsak ne abar aZheriko kpas nama áner Isarela tá gorok kuwo̱p'e kaye̱e̱r kuko̱s kanataar.

³¹Natoon kuno̱o̱k katsak ne a fe̱r aRahap a tá nye inyak agwo̱m mak be ribir áner á tá shonong baꞌ. Kamok a tá shan áner aya a tá tsang á ye̱re̱k kuwo̱p'e kyo̱o̱n.

³²Akye̱ ne mi tà bun i fe̱ gbak e̱? Izen kuse mi tana fe̱ ike̱ng ikak natoon aGidiyon [3] be aBarak ne aSamson be aZheta ne aDauda ne aSamela be áner kuzarap baꞌ.

³³Kuno̱o̱k katsak sak a tá ko̱n ne a ya ánerawe iben ze̱r ze̱r nitso̱m. A to̱ ánerawe amok gye̱r, ne á shan ike̱ng iya Adakunom tá fe̱ ye a ta no̱o̱k. Á whe̱e̱n nanu ázaki,

³⁴á riming icen kuro̱ng, awe̱n ti nye ike̱ng ikak natoon ba baꞌ. Á kirik kuyo̱mo̱ng ba ku tá te agap, á kpa agap naro̱ itso̱m á tá ro̱ ámudo̱n ba.

³⁵Kuno̱o̱k katsak sak ányining ákak bun a se̱ áner ba á tan kus be kutser. Ákak so̱ risam makiyi, á shim nong á ta ka won ba baꞌ nong ase̱ á tà ka dorok ba be kutser ku tà nar kutek.

³⁶Á nye kye̱re̱ be ákak ne a ka whereng ba, á rosom ákak a tá ka te ba nitso̱m.

³⁷A barak ákak be ata, ne a te̱se̱ng ákak ba abir'e be azarto, ne a fe̱s ákak be awe̱n atsor. Ákak tes akpa itsamang ne afe izha iwe, ne á tsang a tseng. Á te afe rizor ne a nye be ba kye̱re̱ ne a ku tabak ba.

³⁸Kazatse tas karo̱ kusor ba baꞌ. Á tsang a tseng nafan be atas ne a no̱o̱s nibong a tá rum kaben.

³⁹Adakunom kerek áner na cice̱r kamok kuno̱o̱k katsak ba. Gip be anong á shan ike̱ng iya Adakunom tá tsang a fe̱ ye a tà ka no̱o̱k ba baꞌ.

⁴⁰Adakunom tsang a nye kanye̱k ike̱ng ikak kamok yir nong ase̱ mak be yir ne ba tà shining.