Read izere Ibrani 12 Bible Online

Ibrani 12 - izere bible

Ibrani 12

¹Kamok anong, kum ánerawe áfe á ta kuus rife̱ yir kuse whe̱re̱ á ta min gorok yir na, won i tu ku barak yir koakye ike̱ng i tanin te̱ne̱ng yir, be koakye kuni rine̱n ri ta kyem ri tin te yir afartak zizirik. I naka tsesek yir ta teng yir itsi iya i ta se nasho̱o̱n yir.

²Won tin sak yir anyisi na aYeso wu ne a ta nye ritin kuno̱o̱k katsak yir ne a nye aner aya a tana sak kuno̱o̱k katsak yir tanan mumak. A tsesek kaye̱e̱r risam riku wu kamok ike̱ng riye̱ rikan i ta se nasho̱o̱n. A fok isum riku wu natoon kukon baꞌ. Kyo̱o̱rna a se nusonong nubo̱k riya itsik rigwo̱m Adakunom.

³Ye̱re̱k yin tá di yin kuri risam riya a tá so̱ nubo̱k ánerawe a ta nye áfe rine̱n fan a ba ka te yin gbe̱re̱k ne yin ni tun yin riye̱.

⁴Izaan yin ta nye yin be rine̱n, yin n nye yin ma yin min nyosong yin naso̱k baꞌ.

⁵Ka yin n tiburum yin be rife̱ kutsesek yin kuya Adakunom ta nye, a ta ka yis yin ye inoon wu a? Ye, “Igon'i, tu zhe̱e̱sh kunees kuya Agwo̱m Ágwo̱m ta ka nye'me baꞌ. Ke a ta tigba, a ta ka te gbe̱re̱k baꞌ,

⁶kamok Agwo̱m Ágwo̱m nees koangan afe wu ta shim, ne a nees koangan afe wu ta sok ye a nye igon wu.”

⁷Na ka tsesek yin risam yin ta sen so̱ yin'e kamok kaye̱e̱r risam ne a ta ka nees yin. Be anong ne Adakunom nye be yin kyo̱ndi inoon wu. Igon kanyaka ne atek wu tu ku nees ba e̱?

⁸Ke a ta nees yin kyo̱ndi a ta nees inoon baꞌ, i nye ye yin nye yin inoon rikuna sang atuk inoon kasa'me baꞌ.

⁹Yir be yir áda yir áfe kuro̱m áya a tin nees yir, iyong ne i sak yir ta ka di yir ba yiik. Fa gye̱ ke yir tiyiik yir Ada yir afe Kabik a ta be kutser ne i nar yir aꞌa?

¹⁰Áda yir áfe kuro̱m ti nees yir nizen cie̱k niren iya ba ta di i se gye̱r. Amma Adakunom ti nees yir nong ase̱ kunees'e tin se̱ mo yir tà se̱ yir kanu kafe yir kaye̱e̱r kuzhe̱l wu.

¹¹Koakye kunees ro̱ nizen a ta nye kunees'e, amma nigang'e áner á ta ka nees ba'me sor kusor kutek ne á te zhe̱l.

¹²Kamok anong, won ikap yin be akuur yin tu te gbugbong.

¹³“Kuus yin iren itek nong fan kutak kuya sang kuta nye kutser baꞌ” bu te kukun'e.

¹⁴Nye yin koakye ike̱ng yin tana kyem a nye yin nong ta sor yin caang be ánerawe cice̱r ne i sor yin zhe̱l kamok aner akak ta kyem a di Agwo̱m Ágwo̱m baꞌ, sang ke a se zhe̱l baꞌ.

¹⁵Sak yin riye̱ fan akak bu ni wei ni ritek Adakunom. Sang tu won yin akak tin wuruk kaye̱e̱r yin be amaan kuse nong a ta sak ákak ta wei baꞌ.

¹⁶Sang tu won yin akak tu kuus ányining kpe̱de̱ng ka a tu se dar inyim Adakunom kyo̱ndi Isuwa tá sok risho̱n wu a tá re̱p acek wu'me kamok naya kakereng kazining baꞌ.

¹⁷Nama a tá nye anong, a shim atek tú ku te kuce̱ ma be nanyisi, a se̱ baꞌ, kyo̱ndi yin ta ren yin. Kamok a shim a tá shishing ike̱ng iya wu tá nye, a ra kyem'me baꞌ.

¹⁸Yin n se̱ yin rifan a tana kyem a ra be kubo̱k baꞌ, ka kuro̱ng kuya ku ta ya dide̱ng, ka karo̱ te whi ne ane̱n nyim whi,

¹⁹ka rigba, ka kuto̱ ku ta fe̱ kanu. Kuto̱ ku tá fe̱ kanu'ong sak áfe a tá fok nye izong ye sang a tú ba fe̱ be ba baꞌ.

²⁰Á kyem á tsesek be ike̱ng iya a tá fe̱ be ba baꞌ ye, “Ko a fa fe̱ ye ikewum ne i ra rifan'e, a ta ra barak be ata.”

²¹Ike̱ng iya ba tá di'me se zhirim ma aMusa fe̱ ye, “Kuro̱m'i tiim be inyim.”

²²Amma yin n se̱ yin rifan aSihiyona ri ta nye aUshalima afe kaza, agbang kuwo̱p Adakunom afe kutser ne kanyim riye̱ rikan ámaleka whe̱re̱re̱.

²³Yin n be̱ yin kaye̱e̱r áfikuus, áya a ta nye inoon nafe ife ime̱se̱ng'e áya ayerek ba ta se nuzibir kaye̱e̱r kaza. Yin n be̱ yin nufe Adakunom aya a tana to̱ ánerawe cice̱r amok ne nufe nabik áner aya a ta se zhe̱l, áya a ta shining gye̱r.

²⁴Yin n be̱ yin nufe aYeso a ta igaas kushu kufas, ne nufe naso̱k a ta mis na ta be ritek ne na nar naso̱k aHabila.

²⁵Sak yin riye̱, tu rayin aner a ta fe̱ rife̱ na baꞌ. Ke á kyem á wher nizen ba tá raba aner aya a tá ka tigba ba nazatse baꞌ, yir ta nye yir ane̱ ta wher yir ke yir ti nang yir kama ni wu afe a tin tigba yir naza e̱?

²⁶Nizen iyong, Kuto̱ Adakunom zuur kazatse. Amma kyo̱o̱rna a bun a no̱o̱k kuto̱ ye, “Mi ta bun i zuur kazatse kutak kuzining gbak, sang kazatse tsek baꞌ, amma cei be kaza gip.”

²⁷Rife̱ a ta fe̱ ye, “kutak kuzining'ong” tonong ye, a ta turung ike̱re̱ iya a ta zuur'me; i ta nye ike̱re̱ iya Adakunom tá nye, kamok ike̱re̱'me ikak iya sang a tá kyem á zuur baꞌ, kuse.

²⁸Kamok anong kum yir tanan no̱ yir kaye̱e̱r rigwo̱m riya sang a tana zuur baꞌ, won i tu tonong yir riye̱ rikan, ne iya yir Adakunom iben kyo̱ndi wu ta shim, be kuyiik ne ikap kutiim,

²⁹kamok “Adakunom nye kuro̱ng ku ta ya naro̱.”