Read izere Ibrani 13 Bible Online

Ibrani 13 - izere bible

Ibrani 13

¹Ya yin kasho̱o̱n be ku naka shim kyo̱ndi aner be áronyining,

²Sang tu won kushashang yin átsen baꞌ, kamok be anong ákak ti shan ámaleka dar kuren ba.

³Yiring yin be áya a ta se nitso̱m, nye yin be ba kyo̱ndi yin se yin mak. Yiring yin be áya a ta sen ku no̱o̱k ba risam, nye yin be ba kyo̱ndi yin se yin mak.

⁴Koangan ra tor kuwe̱ne̱ng yiik, koangan ra tor kuwe̱ne̱ng wu zhe̱l'e, kamok Adakunom tà to̱ aner a tá nye rikuna be áya a nye kpe̱de̱ng amok.

⁵Kam yin be kuse kumak shim itso̱m, ne i ni fan yin nike̱ng iya yin ta be yin, kamok Adakunom fe̱ ye, “Mi ta ka won baꞌ, ko cie̱k mi ta ka barak nigaan'e baꞌ, ko cie̱k.”

⁶Iyong ne i sak yir ta kyem i fe̱ yir be riye̱ rizining ye, “Agwo̱m Ágwo̱m nye aner a tin tobok, mi ta fok inyim baꞌ. Anerawe tin nye ike̱ng ikak e̱?”

⁷Yiring yin be áko̱k kasho̱o̱n yin áya a ta ka tak yin rife̱ Adakunom. Ye̱re̱k yin kuri kusor kuya ba ta sor nong ta kuus yin kuno̱o̱k katsak ba.

⁸aYeso Kiristi afe kure be afe katuur ne afe izen izen se azining, a shishing nigaan'e baꞌ.

⁹Sang tu won yin kubo̱so̱p kuduk ta ko̱ro̱k aye̱ yin baꞌ. I se gye̱r aye̱ yir ta se̱ agap kaye̱e̱r ritek Adakunom sang be kukuus itsi kuya naya baꞌ. Kukuus itsi kuya naya ti barang áner aya a ta kuus itsi iyong ike̱ng ikak baꞌ.

¹⁰Yir be yir abagadi aya afe, afe a ta nye asidaka nubur tanan kyem á ya ike̱ng ikak azong baꞌ.

¹¹Agbang atsi no̱ be naso̱k ikewum kaye̱e̱r karo̱ ka ta nar kuse zhe̱l kamok rine̱n ánerawe, a shosh rinam ikewum'e nama kuwo̱p.

¹²Anong ne aYeso di risam nama kuwo̱p, nong a ta sak ánerawe wu ta te zhe̱l kamok naso̱k wu.

¹³kamok anong i wuruk yir nong ta be yir nufe nama kuwo̱p, nong ta fok yir isum kyo̱ndi wu tá fok.

¹⁴Yir be yir kuwo̱p kufe ku tana sor ma izen izen aze nazatse na baꞌ, amma yir min te yir riye̱ nuwo̱p kuya ku tana be̱.

¹⁵Kamok anong, won tu kerek yir Adakunom kaye̱e̱r aYeso be abom nanu yir. Iyong ta sor asidaka aya i tana no̱o̱k yir, tu ku kerek yir ne i tiyiik yir riyerek wu.

¹⁶Sang tu won ku naka tobok yin ne i naka nye yir ritek baꞌ, kamok riye̱ Adakunom kare̱p be asidaka kuri ayong.

¹⁷Kuus yin ike̱ng iya áko̱k kasho̱o̱n yin ta fe̱, ne i nye yin ike̱ng a ta fe̱ be yin, kamok ba ne a ti sak riye̱ natoon yin kamok a ta tak kuto̱ itomong ba katuk kakak. Ka fok yin ba kuto nong itomong ba ta ka be ba ifeng sang kyo̱ndi acer baꞌ. Ke itomong'e ta sor ba acer, iyong ta ka barang mo yin ike̱ng ikak baꞌ.

¹⁸Nye yin aduwa kamok yir. Kuto̱ro̱ng riye̱ yir se gye̱r, yir shim ta nye yir ike̱ng iya i ta se gye̱r kaye̱e̱r koakye iren.

¹⁹Mi shim yin ta nye yin aduwa ne i yiring yin be mi nong Adakunom bun a be̱ be mi nufe yin.

²⁰Won Adakunom aya a ta nyesek kameneng riye̱, aya a tá dorok aYeso nure̱k kamok naso̱k kushu kufas, won wu afe a ta nye afek atek,

²¹ta ka no̱o̱k yin koakye ike̱ng i ta nye itek, nong ta nye ike̱ng iya wu ta shim. Won wu tu nye ike̱ng iya i tu ku se gye̱r be yir kaye̱e̱r aYeso Kiristi. Won kuyiik tu sor kufu ma izen izen. Anong!

²²Kusuk yin ároneng, sok yin itabak mi ta ka zibir yin'e na be riye̱ ricaang kamok mi ta zibir yin'e cie̱k tsek.

²³Mi shim ta ka tak yin ye an tun aronyining yir aTimoti nitso̱m. Ke wu gum be̱, mi ta be̱ mak be wu nong ta ka di yin.

²⁴Ku nye shou yin áko̱k kasho̱o̱n yin, be azhe̱l'e cice̱r. Áfe a ta se niben Italiya ta nye yin ashou.

²⁵Ritek Adakunom se mak be yin cice̱r.