Read izere Ibrani 2 Bible Online

Ibrani 2 - izere bible

Ibrani 2

¹Kamok anong, i ni barang yir ku ni sak yir riye̱ natoon ike̱re̱ i tan fok yir fan i bu te yir titak ta won yir iren'e.

²Kamok ke rife̱ a ta shan nufe ámaleka be agap, koangan afe a ta shonong a gaar kufok'e tà so̱ risam kamok ike̱ng iya wu tá nye,

³yir tà nye yir ane̱ ta wher yir ke yir gaar yir kushan agbang kashesh kuri kuyu e̱? Agwo̱m Ágwo̱m yir be rice wu ne a taas itak kashesh na ni ime̱se̱ng'e. Áner áya a tú ku fok ti tonong yir ye i se anong be katsak.

⁴Adakunom gip a tonong ye i se anong be kunye ike̱re̱ azhing ne ife kukyem ne kunang Kabik Kazhe̱l'e tá kasap anerawe kyo̱ndi wu ta shim.

⁵Sang Adakunom sak ámaleka nong á tin nye rigwo̱m nizam iyu afe yir ta sen nife̱ yir na baꞌ.

⁶Naro̱ kakak, aner akak zibir kaye̱e̱r Kufumung rife̱ Adakunom ye, “Anerawe nye akye̱ wan tin daam ni wu e̱? Anerawe nye akye̱ wan tin sak riye̱ ni wu e̱?

⁷Wan tú ku nye a ti raar cie̱k na ámaleka, wan tú no̱o̱k rigwo̱m be kuyiik

⁸ne i ku sak a tin nye rigwo̱m natoon ike̱re̱ cice̱r.” Nizen Adakunom tú ku sak a tin nye rigwo̱m natoon ike̱re̱'me, a won dar a ku won ike̱ng ikak baꞌ. Gip be anong, yir di yir anerawe ti nye rigwo̱m natoon ike̱re̱ cice̱r kyo̱o̱rna baꞌ.

⁹Amma ike̱ng iya yir ta ye̱re̱k yir nye aYeso, aya a ta tsang a ni raar na ámaleka, amma kyo̱o̱rna a tu ku no̱o̱k kuyiik be rigwo̱m kamok a so̱ risam riku nong se ritek Adakunom ta fok risam riku kamok koangan.

¹⁰Adakunom ne a nye koakye, kamok wu ne koakye kuse. Kamok anong ke i nye ye Adakunom be̱e̱n inoon wu whe̱re̱ kuyiik, i ta se gye̱r a ta tiyiik ako̱k kasho̱o̱n kashesh ba. A nye anong be risam aYeso tá so̱.

¹¹Aya a ta se zhe̱l ne áya a tú ku sak ba tá te zhe̱l nye áner kasa kazining. Kamok anong, aYeso fok isum a tá ka yis ba ye áronyining wu baꞌ.

¹²A fe̱ ye, “Mi tà fe̱ itak riyerek wan nasho̱o̱n áronyining'i, mi tà ka kerek be abom, nasho̱o̱n rigwo̱m ánerawe wan.”

¹³A bun a fe̱ ye, “Mi tin fereng ni wan.” Ne a bun a fe̱ gbak ye, “Mi na mak be inoon Adakunom ta min no̱o̱k.”

¹⁴Kum inoon'e ta be rinam be naso̱k, wu gip a sok kuse rinerawe nong ase̱ kamok riku wu a ta yirik agap aya riku ta se nubo̱k wu, aner'e nye Ishetan

¹⁵ne a turung áya inyim riku ta ma ka te ba nitso̱m cice̱r.

¹⁶Katsak'e, sang ámaleka ne wu tú ku tobok ba baꞌ, amma kuri Ibrahim ne a tú ku tobok ba.

¹⁷Kamok anong ne wu te kyo̱ndi áronyining wu kaye̱e̱r koakye iren, nong ase̱ a tá te agbang atsi afe a ta be kuro̱ riye̱ ne a nye katsak ni itomong Adakunom. A nye asidaka'ong nong a tin sok rine̱n ánerawe.

¹⁸Wu be rice wu so̱ risam nizen a tú ku bo̱mo̱ng, kamok anong a kyem a ta tobok áya a ta sen ku bo̱mo̱ng ba cice̱r.