Read izere Ibrani 3 Bible Online

Ibrani 3 - izere bible

Ibrani 3

¹Kamok anong, ároneng azhe̱l'e, yin áya i tin se yin kaye̱e̱r kuyis kufe kaza na, to̱, yin tsik natoon aYeso, a ta nye Amanzo ne Agbang Atsi niren yir ta min no̱o̱k yir katsak.

²aYeso tonong katsak kaye̱e̱r itomong aya a tú ku kasa, kyo̱ndi aMusa ta nye katsak ni itomong wu kaye̱e̱r ánerawe Adakunom.

³aYeso be kuyiik ne a nar aMusa kyo̱ndi aner rino̱k ta be kuyiik ne a nar rino̱k'e.

⁴Koakye kasa anerawe ne a no̱k, amma Adakunom ne a nye koakye ike̱ng.

⁵aMusa tonong katsak kaye̱e̱r itomong wu ife asam kaye̱e̱r anerawe Adakunom, nong i ta sor asheda ike̱re̱ iya i tana be̱ nasho̱o̱n.

⁶Amma aKiristi tonong katsak kyo̱ndi igon a tu ku no̱o̱k kukyem a tanin sak riye̱ natoon ánerawe Adakunom cice̱r. Yir ne i nye yir ánerawe'me, ke i ya yir kasho̱o̱n be ku naka tsesek ne ku ni te riye̱ kuya i tin tsor yir kafok natoon'e ma nigang'e.

⁷To̱, kyo̱ndi Kabik Kazhe̱l'e ta fe̱ ye, “Katuur, ke yin fok yin kuto̱ wu,

⁸tu shonong yin baꞌ, kyo̱ndi yin tá shonong yin nizen iya yin tá bo̱mo̱ng yin Adakunom kaye̱e̱r katse.

⁹Azong ne áda yin ti maas ne a ni bo̱mo̱ng, aye̱ iso̱k inaas ne á ye̱re̱k ike̱re̱ iya mi tá nye.

¹⁰Iyong ne i sak riye̱ mi ta beseng be izam iyong ma mi fe̱ ye, ‘Aye̱ ba se gugo̱k be mi koakye izen, a ren íren'i baꞌ.’

¹¹Kaye̱e̱r riye̱ kubeseng, mi nye kushu ye, ‘Sang ba tà se̱ iren á tana no̱ naro̱ kufan'i baꞌ ko cie̱k.’ ”

¹²Ároneng, sak yin riye̱ fan akak yin bu nye amaan kuto̱ro̱ng ne a won dar a ni no̱o̱k katsak, nong a ta won kukuus Adakunom afe kutser.

¹³Amma yiir i naka tsesek yin kunom. Ni nye yin itomong be koakye izen iya a ta yis ye, “katuur”, nong fan rine̱n bu wo̱k akak yin nong ta shonong.

¹⁴Yir ta te yir azining be aYeso ke i yiir yir katsak yir ta be yir kum ni ime̱se̱ng'e kpa ma nigang'e.

¹⁵Kyo̱ndi a tan fe̱ ye: “Katuur, ke yin fok yin kuto̱ Adakunom, tu shonong yin baꞌ, kyo̱ndi yin tá te yin ma i te yin shaam.”

¹⁶Ángan ne á fok kuto̱ Adakunom ne á bun shonong e̱? Cice̱r áner aya aMusa tá ka tun ba niben aMasar.

¹⁷Riye̱ Adakunom beseng be ángan ma aye̱ iso̱k inaas e̱? Riye̱ wu beseng be áner a tá nye rine̱n, áfe a tá kus kaye̱e̱r katse.

¹⁸Be ángan ne Adakunom shu ye sang á ta no̱ kaye̱e̱r nawu kufan wu baꞌ e̱? Mi fe̱ ka be áya a ta nye rine̱n e̱?

¹⁹Kamok anong, yir ren yir ye á kyem á no̱ baꞌ, kamok kuwon dar kuno̱o̱k katsak ba.