Read izere Ibrani 7 Bible Online

Ibrani 7 - izere bible

Ibrani 7

¹aMakizadek [1] na ne a nye agwo̱m aSalim, a nye atsi Adakunom Agbang Agwo̱m Ágwo̱m. A nyim be Ibrahim nizen a tá ne ni iya ágwo̱m ákak nitso̱m, yong a tú te kuce̱.

²Ibrahim tú no̱o̱k ike̱ng izining kaye̱e̱r koakye ike̱ng kuso̱k a tá ya naro̱ itso̱m'e. Ife ime̱se̱ng'e, riyerek wu nye “Agwo̱m katsak.” Riyerek wu a ta yis ye “Agwo̱m aSalim'ong” sor ye, “Agwo̱m kusor caang.”

³A be ada ka ango̱ baꞌ, akak ren izen a tú ku tes ka izen iya a tá ku baꞌ. A se kyo̱ndi Igon Adakunom a ta nye atsi ma izen izen.

⁴Di yin kuri kuyiik a tá be, ma atukop yir Ibrahim tú ku no̱o̱k izining kaye̱e̱r koakye ike̱ng kuso̱k wu tá ya nitso̱m.

⁵Itsi aMusa fe̱ ye kuri aLawi aya a ta te átsi, ta shan izining kaye̱e̱r koakye ike̱ng kuso̱k ánerawe, áronyining ba gip. Ba nye kuri Ibrahim gip gye̱rtatan.

⁶aMakizadek'e nye kunik kasa aLawi baꞌ. Gip be anong, a shan izining kaye̱e̱r koakye ike̱ng kuso̱k nufe Ibrahim ne a ku te kuce̱, wu afe Adakunom tá fe̱ ye a tú ku nye ike̱ng ikak.

⁷Katsak'e, aner aya a ta te akak kuce̱ se yiik ne a ku nar aya a tu ku te'me.

⁸Nabon aLawi naya na ta shashang izining kaye̱e̱r koakye ike̱ng kuso̱k'ong kus kyo̱ndi ribir ánerawe. aMakizadek shashang izining kaye̱e̱r koakye ike̱ng kuso̱k gip, rife̱ Adakunom ra tak ye a ku baꞌ.

⁹Aner ta kyem a fe̱ ye aLawi afe a ta shashang ike̱ng izining kaye̱e̱r koakye ike̱ng kuso̱k'ong karang nubo̱k Ibrahim.

¹⁰Kamok nizen iya aMakizadek tá nyim be Ibrahim, a tsang a tes aLawi baꞌ.

¹¹Ke itomong ritsi kuri ife aLawi ta kyem i sak aner ta te zhe̱l (Kamok atsi ne a nye itsi) to̱, akye̱ sak a bun a shim ke a se̱ atsi akak a ta se kyo̱ndi aMakizadek sang aHaruna baꞌ e̱?

¹²Kamok ke a shishing atsi, ne a shishing itsi gip.

¹³Aya afe a tin fe̱ ike̱re̱ na natoon wu a wuruk nuri kukak ze̱e̱r kuya sang akak ba ta kun nye itomong naro̱ kushosh asidaka baꞌ.

¹⁴Katsak'e nye aYeso Agwo̱m Ágwo̱m yir wuruk kaye̱e̱r kuri aYahuda kuya sang aMusa ta kun nife̱ ike̱ng ikak natoon ba ni itomong ritsi baꞌ.

¹⁵Ike̱ng iya yir tin fe̱ yir min barang kute kanang, atsi akak kyo̱ndi aMakizadek n wuruk.

¹⁶Aya a ta te atsi sang natoon igo̱o̱n átukop wu baꞌ, amma natoon kukyem kutser kufe ku tana sor ma izen izen.

¹⁷A fe̱ ye, “Wan nye atsi ma izen izen kyo̱ndi aMakizadek.”

¹⁸A won igo̱o̱n ife ime̱se̱ng'e kamok i be agap ike̱ng ikak baꞌ.

¹⁹Itsi aMusa kyem i ta sak ike̱ng ikak ta te zhe̱l baꞌ, iyong ne i sak yir nye yir kanye̱k ike̱ng itek iya yir tin te yir riye̱ natoon'e nong ta se yir bubarak be Adakunom.

²⁰Adakunom nye anong be kushu wu. Ribir átsi no̱ kaye̱e̱r itomong ba dar kushu.

²¹Amma aYeso te atsi be kushu nizen Adakunom tá fe̱ be wu ye, “Agwo̱m Ágwo̱m n shu, a ta bun a shishing riye̱ wu baꞌ. ‘Wan nye atsi ma izen izen.’ ”

²²Kamok kushu Adakunom na, aYeso tonong ye kushu'me nye katsak ne ku nar ribir'e cei.

²³Átsi tuse whe̱r gbugbang kamok riku ta ka roon ba kuya kasho̱o̱n be itomong.

²⁴Amma aYeso tà sor ma izen izen, kamok ritsi wu tà gang ze̱e̱r baꞌ.

²⁵Kamok anong, a ta kyem a shesh koangan a ta gor nufu a ta tseng nufe Adakunom, a ta sor ma izen izen ne a yiir nye aduwa kamok ba.

²⁶Atsi kuri ayong ne a tin re̱ng yir rine̱n yir. A se zhe̱l dar rine̱n, a be narik baꞌ, a tú kam ze̱e̱r be áfe rine̱n, a tú ku tiyiik a ta tseng kaye̱e̱r kaza.

²⁷A se kyo̱ndi ribir ágbang atsi baꞌ, a nye asidaka koakye katuk kamok rine̱n wu ni ime̱se̱ng'e nizham a ta ra nye kamok ánerawe baꞌ. Amma a nye asidaka kamok rine̱n ánerawe cice̱r kutak kuzining nizen iya a tá no̱o̱k rice wu.

²⁸Itsi aMusa sak ánerawe á tá raar tá te agbang atsi, amma kushu kufe ku tá be̱ nama itsi sak Igon'e a ta se zhe̱l te atsi ma izen izen.