Read izere Ibrani 8 Bible Online

Ibrani 8 - izere bible

Ibrani 8

¹Rice rife̱ yir tin fe̱ yir se ye, yir be yir agbang atsi akak kyo̱ndi ayong afe a tá sonong nubo̱k riya itsik rigwo̱m Adakunom ayiik'e kaye̱e̱r kaza.

²A nye itomong wu naro̱ itomong atsi kazhe̱l'e kufe katsak, kuya Adakunom tá nye sang anerawe baꞌ.

³A sak koangan agbang atsi ni itomong nong a ta shosh asidaka ike̱re̱ be ife ikewum. Iyong ne i sak i ta se gye̱r ayu gip a ta tse̱r ike̱ng ikak a ta no̱o̱k.

⁴A fa fe̱ ye a rusek nazatse, ke a sor atsi baꞌ, kamok áner ákak kuse á ta nye asidaka kyo̱ndi itsi aMusa tá fe̱.

⁵Nizen iya a ta nye itomong naro̱ kaya ka ta nar kuse zhe̱l, a maas ne a kuus nawu ike̱ng iya a ta nye kaye̱e̱r kaza tsek. Iyong ne i sak a tá kpam aMusa nizen iya a tá tse̱r a tá tar kubur a tanin ya Adakunom iben ye, “Sak riye̱ nong ta nye koakye ike̱ng kyo̱ndi mi ta ka tonong natoon rifan.”

⁶Itomong aYeso tá nye se yiik ne i nar ifuba cei, kyo̱ndi kushu kufas wu tin no̱ natite ánerawe be Adakunom ta nar kuse yiik. Ike̱re̱ Adakunom tá fe̱ ye a ta nye nar kunye itek gip.

⁷A fa fe̱ ye ike̱ng ikak won dar i te titeng be kushu kufe ime̱se̱ng'e baꞌ ke a bun a nye kufe afa'me baꞌ.

⁸Adakunom di ánerawe tá taam. Ayong a fe̱ ye, “Izen saase mi tana ya kushu kufas be áner Isarela be kasa áner aYahuda.

⁹Iyong ta se kyo̱ndi kushu mi tá nye be átukop ba nizen iya mi tá ka ko̱ro̱k ba kubo̱k i tá ka tun ba niben aMasar baꞌ, kamok ba yiir kushu mi tá nye be ba be katsak baꞌ. Kamok anong Agwo̱m Ágwo̱m fe̱ ye, Mi ta ka kirik ba kama.

¹⁰Kushu kuya mi tana nye be kasa áner Isarela na: Agwo̱m Ágwo̱m fe̱ ye nama izen iyong, mi tà ka te ba Itsi kaye̱e̱r aye̱ ba ne i bun i zibir naye̱ ba. Mi tà te Adakunom ba ne ba te ánerawe mi.

¹¹Akak tà ba bo̱so̱p afegbak wu'me baꞌ. Akak tà ba bo̱so̱p aronyining wu'me ne a fe̱ ye, ‘Ren Adakunom’ baꞌ, kamok koangan tin ren, inoon'e ba asho̱n'e cei.

¹²Mi tà ka re̱ng ba rine̱n ba, mi tà ba yiring be rine̱n ba baꞌ.”

¹³Kum Adakunom tá fe̱ ye rife̱ kushu na nye “Kufas,” kufe ime̱se̱ng'e te kuzen. Ike̱ng iya i tan te izen ta gor ne i gang.