Read izere aYakub 1 Bible Online

aYakub 1 - izere bible

aYakub 1

¹aYakubu asam Adakunom ne afe Agwo̱m agwo̱m yir aYeso Kiristi, mi nye ánerawe irem kuso̱k be afa aya a ta te shaam kaye̱e̱r kazatse ashou.

²Aroneng, sok yin be riye̱ rikan, izen iya yin no̱ yin ni iriri kubo̱mo̱ng.

³Kamok yin ren yin ye, kubo̱mo̱ng kuno̱o̱k katsak yin ta sak yin tin barang yin Ku naka tsesek.

⁴Ku naka tsesek yin ta tseng ma nigang'e, nong ase̱ yin ta shining yin, ne kyem yin sang ta raar yin nikeng ikak baꞌ.

⁵Ke akak yin be kukyem kuren ikeng baꞌ, a ra rip Adakunom, afe a ta no̱o̱k koangan washak. A tu ku no̱o̱k be riye̱ rizining sang be aye̱ afa baꞌ.

⁶Amma izen iya ne a rip, a ra no̱o̱k katsak dim dar agak riye̱, kamok aner aya a ta be agak riye̱ se kyo̱ndi agung ashi isho̱ng kuwun ta kap.

⁷Aner ayong tu di ye wu ta se̱ ikeng ikak nufe Adakunom baꞌ.

⁸A nye aner a ta nye ikeng be riye̱ gak, a be kuto̱ro̱ng kuzining natoon koakye wu ta nye baꞌ.

⁹Aroneng aya a ta se ni mees rice, a ra nye riye̱ rikan ni itsik igbang'e wu tin se.

¹⁰Amma aner aya a ta nye arum, a ra nye riye̱ rikan kaye̱e̱r itsik ihiir'e wu tin se.

¹¹Kunom tar ne ku joosh ne ku sak naya koor, ne ato'me kpas ne kusas'e gang. Anong ne arum ta kpa nizen ife a ta tsang a tseng ne a tse̱r kutser wu.

¹²Aner awe̱ng nye aner aya a tana tsesek kaye̱e̱r kubo̱mo̱ng, kamok ke a na ka tsesek kaye̱e̱r kubo̱mo̱ng'e, a ta se ribong kutser riya Adakunom ta tsang a nisak natoon áfe a tu ku shim.

¹³Izen iya ne wan no̱ nubo̱mo̱ng, sang tu fe̱ ye, “Adakunom sen ni bo̱mo̱ng baꞌ,” kamok a bo̱mo̱ng Adakunom be imaan'e baꞌ, ka wu bo̱mo̱ng akak baꞌ.

¹⁴Amma koangan ne a no̱ nubo̱mo̱ng, ke a ti te riye̱ wu na amaan ike̱re̱ wu ta shim, ne ike̱re̱'me sok riye̱ wu.

¹⁵To̱, izen iya ne kushim riye̱ wu nyeseng be agap, a ta yiir nye rine̱n, ke ri rasak dide̱ng, ri ta be̱e̱n be riku.

¹⁶Aroneng'i, tu won a ta ka wo̱ro̱k yin baꞌ.

¹⁷Koakye kuri ritek ne kuno̱o̱k kutek kuya ku ta ne naza se gye̱r nufe Ada afe a ta be akanang aya a ta be kaben, aya afe sang a ta shishing kyo̱ndi nawu ta sesek baꞌ.

¹⁸Wu ne a di a tin kasa yir a tin tes yir kaye̱e̱r rife̱ katsak, nong yir ta se yir kyo̱ndi kutes kufe ime̱se̱ng'e kaye̱e̱r ike̱re̱ wu ta nye.

¹⁹Aroneng'i atek, yiring yin iyu; koangan ra se gbashak nufok rife̱, amma ne se whiwhe̱ nife̱ kanu, be kubeseng riye̱.

²⁰Kamok kubeseng riye̱ be̱e̱n kusor kujel'e Adakunom ta shim baꞌ.

²¹Kamok anong, kam yin be ike̱re̱ kurisik ne iriri anyas nong ta mees yin rice ta shan yin rife̱ a tan tuus naye̱ yin, riya ri tana ka shesh yin.

²²Tu foos yin rife̱'me tsek ne i wo̱k yin rice yin baꞌ, amma ninye yin itomong.

²³Aner aya ne a foos yin rife̱'me amma a ti nye itomong baꞌ, a se kyo̱ndi aner aya a ta ye̱re̱k kanyisi wu kaye̱e̱r amadobi.

²⁴Nama a ta naka ye̱re̱k ne a tseng ne a wor a tiburum be kuse kanyisi wu.

²⁵Amma aner aya ne a ye̱re̱k itsi iya i ta se gye̱r ife i ta be̱e̱n kusor ne̱k, ne a yiir kunye anong, a tiburum ikeng wu ta fok baꞌ, amma a yiir nye'me, a tu ku te awe̱ng natoon ikeng wu ta nye.

²⁶Ke akak sok rice wu ye wu ren Adakunom ne a ra kyem a yiir kanu wu baꞌ, a wo̱k rice wu, i nye ye kuren Adakunom wu sor ikeng ikak baꞌ.

²⁷Kuren katsak Adakunom kuya Ada yir Adakunom ta sok ye kunye kujel'e nye, ku nisak riye̱ ni nakpiin be akumung kaye̱e̱r risam ba, ne i yiir rice wan fan kazatse ba ka sak ta wondar I se jel.