Read izere aYakub 2 Bible Online

aYakub 2 - izere bible

aYakub 2

¹Aroneng'i kyo̱ndi afe kuno̱o̱k katsak na aYeso Kiristi Agwo̱m Agwo̱m yir, afe kuyiik, tu tonong yin kushim rice baꞌ.

²Ke nye ye aner akak be naro̱ kanyim yin be nanarang nafe itso̱m dide̱ng ne ares atek, ne aner rizor akak gip be kaye̱e̱r'e be agye̱e̱r ares wu.

³Ke yin ti sak yin riye̱ na aner a ta te ares atek ame, ne fe̱ yin be wu ye, “Karo̱ kusonong katek na kamok wan,” amma ne yin fe̱ yin be aner rizor ame ye, “Wan nyeseng azong ka sonong kaben nasho̱o̱n'i.”

⁴Iyu tonong ye yin tonong yin kushim rice aꞌa? Yin to̱ yin amok be amaan kuto̱ aꞌa?

⁵Aroneng'i aya mi ta shim, wesek yin kuto, i se ye Adakunom kasa áfe rizor nasho̱o̱n kazatse na nong a ta te arum kaye̱e̱r kuno̱o̱k katsak ne aya a ta ya kutse rigwo̱m Wu ta nye kanye̱k'e natoon aya a tu ku shim aꞌa?

⁶Amma yin je̱e̱sh yin áfe rizor. Sang árum ne a ka mo̱o̱r yin ne á tsees be yin natu amok aꞌa?

⁷Sang ba ne á nye aya a ta beseng riyerek wu riyiik'e, riya a ta ka yis yin mo aꞌa?

⁸Ke yin sak yin agbang itsi iya i ta se kaye̱e̱r Kufumung Adakunom naye̱ ye, “Shim aner agbak wan kyo̱ndi rice wan.” I se gye̱r anong.

⁹Amma ke yin tonong yin kushim rice, i nye ye yin nye yin rine̱n, ne akak te̱n yin amok kyo̱ndi afe a ta shorop Itsi.

¹⁰Koangan ne a tin sak riye̱ nitsi, amma a ta won izining kaye̱e̱r'e, a shorop ribir'e cice̱r.

¹¹Kamok wu afe a ta fe̱ ye, “Sang tu nye rikuna baꞌ,” wu ne a bun a fe̱ ye, “Sang tu fe̱r akak baꞌ.” Ke wan nye rikuna baꞌ, amma wan fe̱r akak ko̱, i sor wan shorop Itsi.

¹²Fe̱ kanu ne i nye kyo̱ndi aya a tana ku to̱ ba amok be Itsi iya i tana be̱e̱n kusor ne̱k.

¹³Kamok koangan a ta se dar kuro̱ riye̱, Adakunom tu ku to̱ amok dar kuro̱ riye̱. Kuro̱ riye̱ be kusas riye̱ natoon amok.

¹⁴Aroneng, akye̱ se gye̱r azong e̱? Ke anerawe nye di wu n no̱o̱k katsak, a ra nye itomong i ta tonong kuno̱o̱k katsak'e baꞌ e̱? Kuno̱o̱k katsak'ong tu ku shesh a?

¹⁵Ke nye ye aronyining ka angasnyining akak se dar ares ne naya kuya.

¹⁶Ne akak yin fe̱ be wu ye, “Tseng, mi ta mok ritek, te ares ta joosh ne iya naya ta wha,” a ra nye ikeng ikak natoon kudaam wu baꞌ, i nye akye̱ itek ne wu nye e̱?

¹⁷Anong ne kuno̱o̱k katsak gip ke a ti barang be kunye itomong baꞌ, ne kuno̱o̱k katsak'e sor ikeng ikak baꞌ.

¹⁸Amma akak ta fe̱ ye, “Wan be kuno̱o̱k katsak; mi be kunye itomong.” Ni tonong kuno̱o̱k wan dar kunye itomong, nong mi ta ka tonong kuno̱o̱k katsak'i be itomong'a mi ta nye.

¹⁹Wan no̱o̱k katsak ye Adakunom azining ne a kuse a? I se gye̱r! Amaan nabik gip a ti no̱o̱k katsak anong ne inyim.

²⁰Wan afunam akak, wan shim a ta ka tonong ye kuno̱o̱k katsak dar kunye itomong sor ikeng ikak baꞌ a?

²¹Adakunom sok atukop yir Ibirahim ye a nye ajel'e kamok ikeng iya wu tá nye nizen a ta sen no̱o̱k igon wu Ishaku natoon abagadi aꞌa?

²²yin di yin kuno̱o̱k katsak wu, be itomong wu, ta tseng mak, ne kuno̱o̱k katsak wu shining be ikeng iya wu ta nye.

²³Ne rife̱ Kufumung Adakunom shining riya ri ta fe̱ ye, “Ibirahim ti no̱o̱k katsak na Adakunom yong kuno̱o̱k katsak wu sak a tu di jel, ne a ku yis ye aferime̱ Adakunom.”

²⁴yin di yin anerawe ye a se gye̱r kamok ikeng iya wu ta nye, sang I se kamok kuno̱o̱k katsak wu tsek baꞌ.

²⁵Anong ne a di aRahap a ta nye inyak agwo̱m gip ye a se gye̱r kamok ikeng iya wu ta nye nizen a ta no̱o̱k atom karo̱ kuko̱s ne a ku tun ba niren ikak ze̱e̱r a?

²⁶Kamok anong, kyo̱ndi kuro̱m ta se dar isong nye kukom, anong ne kuno̱o̱k katsak dar kutonong itomong nye kukom'e.