Read izere aYakub 3 Bible Online

aYakub 3 - izere bible

aYakub 3

¹Aroneng, tu te yin afe kubo̱so̱p anerawe'me wher baꞌ, kamok yin ren yin ye yir afe i ta bo̱so̱p ánerawe'me, yir ne a tin to̱ yir amok be agap ne nar.

²Yir cei i taam yir niren ze̱r ze̱r, ke akak taam nikeng iya wu ta fe̱ baꞌ, i nye ye wu se ryong, a ta kyem a nisak riye̱ rice wu cei.

³Nizen iya ne yir tin te yir atso̱m nanu itsaap nong se i tin fok yir kuto. Yir ta kyem nye yir ikeng iya yir ta shim yir be itsaap'e.

⁴ninye yin kumaas be kukpara ashi, ku nye kugbang'e dide̱ng gye̱rtatan, kuwun ku tosom be agap, amma be kaban kutso̱m kakak aner kutsip'e ti kirik, ne a tseng'e naro̱ wu ta shim.

⁵Anong ne irem se, i nye ihiir'e kaye̱e̱r ikap kuro̱m. Amma i ta kyem i fo rigwo̱m. To̱, a ta kyem a shosh agbang kuci be kaban kurong.

⁶Irem gip i nye kurong, i nye ritin amaan kunye kaye̱e̱r ikap kuro̱m, i beseng aner, i te kutser anerawe kaye̱e̱r kasa kurong. Wu be rice wu i tana ka te kaye̱e̱r kasa kurong.

⁷Peer iriri ikewum, nanon, ikeng i ta tseng be nafa be ike̱re̱ kaye̱e̱r ashi te caang, a ma ka sak ba a ta te caang dar inyim anerawe.

⁸Aner akak ta kyem a nees irem wu baꞌ, i nye amaan ikeng dar kuro̱n, i be amaan nado̱m.

⁹Be irem'e ne yir ti tiyiik yir Adakunom yir, be wu ne yir bun i fiming yir anerawe, aya a ta ma ka nye ba di Adakunom.

¹⁰Kanu kazining a tin kerek be kanu'me ne a ti fiming. Aroneng'i, i tu se anong baꞌ.

¹¹ashi atek ne ashi ito̱k ta kyem a wo̱k nisho̱ng izining a?

¹²Aroneng, ritin atafo ta kyem rites ica rifar a? Ka ritin anap ta kyem ri tes agba atafo e̱? Anong ne itop ashi ito̱k ta kyem turung ashi atek baꞌ.

¹³Angan ne a be kukyem ne a ren ikeng kaye̱e̱r yin e̱? Won a tu tonong be kuse wu kutek, be kunye kutek ne kumees rice riya ri ta ne kaye̱e̱r kukyem.

¹⁴Amma ke wan yiir amaan rishishim ne kushim rice kaye̱e̱r riye̱ wan, tin nye kuka natoon'e ka ta ton katsak'e baꞌ.

¹⁵“Kukyem” kuyu ne naza baꞌ. amma kazatse, kuse jel baꞌ, kunye kufe amaan kabik.

¹⁶Kamok karo̱ a ta se rishishim be kushim rice, azong ne wan ta se ashangam be amaan kunye.

¹⁷Amma kukyem ku ta ne naza, nime̱se̱ng'e cice̱r se jel ne kushim kutek be kuto akak, ne kumees rice, be kuro̱ riye̱ kunye kutek kufe katsak dar kushim rice.

¹⁸Áfe a ta be̱ be kusor acaang, aya a ta tuus kaye̱e̱r acaang ne a ta nye ishamang ijel'e.