Read izere 1 aBitrus 2 Bible Online

1 aBitrus 2 - izere bible

1 aBitrus 2

¹Kamok anong, kam yin be koakye kuri amaan kuse, be abo̱o̱s ne akardak kuse be rishishim be kpe̱de̱ng rife̱ cei.

²Se yin kyo̱ndi inoon nazhizhe̱k'e na ta shim kuso̱ ribasang. Anong ne yin gip be yin ifeng rife̱ Adakunom, kamok be anong ne yin tà rasak yin nong ta se̱ yin kashesh yin.

³Kyo̱o̱rna yin tan fok yin ritek Agwo̱m Ágwo̱m.

⁴Be̱ yin nufu, wu aya a ta se kyo̱ndi kuta rino̱k kutser. Wu ne a nye kuta kuya ánerawe tá raba, amma Adakunom tú ku kasa ne a ku sok yiik.

⁵Yin gip, ma te yin kyo̱ndi kuta rino̱k kutser a tanin no̱k kasa kuri kafe kabik nong yin ta nye yin itomong ritsi rizhe̱l'e. Yin ta nye yin asidaka kabik azong kuri aya Adakunom ta shim kamok aYeso Kiristi.

⁶Kamok i se ni izibir ye: “Di yin mi n kasa ayiik kuta, kuya ku ta nye itsik ritin kasa mi. Mi sak kaye̱e̱r aSihiyona. Koangan afe a tin fereng nuta na, a tà ba fok isum baꞌ, ko, cie̱k.”

⁷Kyo̱o̱rna yin áya i tin no̱o̱k yin katsak, kuta na be kuyiik nufe yin. Amma áya a ta gaar ku nino̱o̱k katsak, i tù ku sor ba kyo̱ndi a tá fe̱ ye, “Kuta kuya áfe rino̱k tá raba, n te ayiik kuta ribor.”

⁸I bun i se ni izibir naro̱ kakak ye, “Kuta'me sak ánerawe ta tu atak, ku sak ánerawe ta kpas!” Ánerawe'me ti tu atak kamok ba raba kukuus rife̱ Adakunom. Kamok anong ne Adakunom tsang sak afe a tá gaar kukuus rife̱ wu'me.

⁹Amma yin, yin nye yin kuri kuya Adakunom tá kasa, be rice wu. Yin nye yin atsi Adakunom a ta nye Agwo̱m, yin nye yin ánerawe áya a ta nye azhe̱l'e, ánerawe áya a ta nye afu. A tá ka yis yin kaye̱e̱r awhi nong tà no̱ yin kaye̱e̱r akanang afe katsak nong tà taas yin ayiik itomong wu ife azhing.

¹⁰Gbugbang yin tsang i nye yin ánerawe Adakunom baꞌ, amma kyo̱o̱rna yin nye yin ánerawe Adakunom. Gbugbang yin tsang i se̱ yin kuro̱ riye̱ Adakunom baꞌ, amma kyo̱o̱rna yin n se̱ yin.

¹¹Áfo̱ yin, áya mi ta shim, mi ta nye yin akusuk, kum yin ta nye yin átsen kaye̱e̱r kazatse na, yin be yin kasa aze baꞌ, ye i ra kam yin be kudi ike̱ng kuri kufe rinerawe. Kuse kuri kuyong ko̱n itsom be kabik yin.

¹²Sor yin kusor kutek kaye̱e̱r áya sang á ta nye afikuus baꞌ. Ba yiir kunye kukun yin gye̱rtatan, amma ke ba di koakye itek yin ta nye yin ánerawe'me, á ta tiyiik Adakunom katuk a tana be̱ to̱ kazatse amok.

¹³Kuus yin koakye kuri rigwo̱m kaye̱e̱r kazatse na kamok Agwo̱m Ágwo̱m. Kuus yin rife̱ agbang agwo̱m yin kamok wu ne a ti nye rigwo̱m natoon koangan.

¹⁴Kuus yin ike̱ng iya ágwomna yin ta fe̱ be yin kamok ako̱k kasho̱o̱n kaben yin ne á tu sak ba nong á ta nees aya a ta nye rine̱n ne a kerek áya a ta nye ike̱ng itek.

¹⁵Kamok Adakunom shim yin tu nye yin katsak fan aner aya a ta be akpe̱de̱ng kuto̱ natoon yin bu se ike̱ng rife̱.

¹⁶Sor yin kyo̱ndi áner aya a ta se ne̱k, sang tu sok yin kusor ne̱k'e nong tin nye yin amaan kunye baꞌ. Amma sor yin kusor kuya ku tana tonong ye yin nye yin ásam Adakunom.

¹⁷No̱o̱k yin koangan kuyiik wu, shim yin áfikuus afudang yin, fok yin inyim Adakunom, te yiik yin ako̱k kasho̱o̱n kaben yin.

¹⁸Yin ásam, kuus yin ike̱ng iya átekasa yin ta fe̱ be yin ne i ku no̱o̱k yin ba kuyiik koakye izen. Sang be áya a ta se gye̱r ne á be kuse kutek tsek baꞌ, amma cice̱r be áya a ta se hash gip.

¹⁹Kamok ise gye̱r ke anerawe so̱ risam natoon ike̱ng iya sang i ta nye rine̱n wu baꞌ, ke a nye anong kamok wu ren ye iyong ne i nye kushim Adakunom, i nye ike̱ng nakere.

²⁰Ke á ta whereng yin natoon rine̱n riya yin ta nye yin, ko yin tsesek kaye̱e̱r'e, yin be yin ishorong ike̱ng ikak natoon'e baꞌ. Amma ke yin so̱ yin risam'me kamok kunye kutek, ne i tsesek yin Adakunom tà ka te yin ritek.

²¹Kamok kuri risam'ong ne Agwo̱m Ágwo̱m tá yis mo yin. aKiristi gip a so̱ risam kamok yin. Be anong ne a tá won mo yin ane̱ wu nong tà kuus yin.

²²“Wu kun nye rine̱n ike̱ng ikak baꞌ. A kun fok abo̱o̱s nanu wu baꞌ.”

²³Nizen iya ánerawe tú ku barak ritok, a tú ku karang baꞌ, nizen a tá so̱ risam a fe̱ ye wu tú ku karang baꞌ, a ban a ti te riye̱ na Adakunom aya a tana to̱ amok afe katsak ingya.

²⁴A sok rine̱n yir nuro̱m wu be rice wu, nizen a tú ku tigak nukon nong ase̱ a tin kam yir be rine̱n ne i sor yir kusor kuzhe̱l'e. Yin n te yin atser kamok ifor wu.

²⁵Kamok yin tsang i se yin kyo̱ndi itsamang iya i ta te shaam, amma kyo̱o̱rna yin mu ku bun yin nufe Afek ne Ako̱k Kasho̱o̱n kutser yin.