Read izere 2 aBitrus 2 Bible Online

2 aBitrus 2 - izere bible

2 aBitrus 2

¹Kyo̱ndi áner kuzarap áfe abo̱o̱s tú ku se kaye̱e̱r ánerawe Adakunom'me gbugbang, anong ne áner kubo̱so̱p áfe abo̱o̱s ákak tà wuruk kaye̱e̱r yin. Á ta be̱s be kubo̱so̱p kukak kyo̱o̱n, á ta bo̱so̱p ánerawe abo̱o̱s ma á tù ku beseng ba ma ánerawe tà gaar Agwo̱m Ágwo̱m aya a tá ka shesh ba. Ku nye anong ta sak ba be rice ba ta kpa zizirik.

²Ánerawe whe̱re̱ tà kuus akpe̱de̱ng kuse ba. Kamok kunye ba, ánerawe'me ákak tà te be iren katsak'e fe̱re̱.

³Kamok kuye̱re̱k ba, á tà ka wo̱ro̱k yin nong á ta ka mo̱o̱r yin be rife̱ re̱m re̱m. Amma kum gbugbang Adakunom ma ka te̱n ba amok riku. Amok ba ku se a sen ka tor ba.

⁴Ko ámaleka agbugbang, nizen á tá nye rine̱n, Adakunom tá won ba kyo̱o̱n baꞌ, a tú ku barak ba kaye̱e̱r ribong kuro̱ng. A tú rosom ba kaye̱e̱r ibong i tá se tsik ne i se whi. Á ta tor kunom amok.

⁵Nizen agbugbang, áner aya a tá nye anyas gip, Adakunom tú ku won ba baꞌ. Adakunom tu ku fe̱s ba be amaan ashi nizen aNuhu. Amma a shesh aNuhu, aner a nye awazi katsak be ribir ánerawe kanataar ne a gaar tsek.

⁶Adakunom shosh agbang iwo̱p aSodom be aGomora ma i te itong. Iyong tonong kuri ike̱ng i tana se̱ áya a ta nye anyas.

⁷Wu ne a shesh aLot, aner aya a tá nye azhe̱l'e, aya a tá daam natoon amaan kunye áner aSodom á tá gaar kukuus Itsi Adakunom.

⁸aLot nye aner katsak gye̱rtatan, amma a sor natite amaan ánerawe, ne a ye̱re̱k kuri amaan kunye ba koakye kunom ne a foos amaan rife̱ ba, ma a yiir nye riye̱ riwe kaye̱e̱r riye̱ wu kamok ba tá gaar ku kuus Itsi.

⁹Kamok anong, ike̱re̱ kuri iyuna ne i sak yir ta ren yir ye Adakunom ta kyem a shesh áner aya ta se kaye̱e̱r iriri kubo̱mo̱ng áner aya a ta se gye̱r nasho̱o̱n wu ne a won áya a ta be amaan kunye nong á ta ya kasho̱o̱n be risam ma katuk a tana to̱ kazatse amok.

¹⁰Amok na ta nar natoon áner aya a tá shim ike̱re̱ kuri ife rinerawe ne á zhe̱e̱sh rigwo̱m. Áner kubo̱so̱p áfe abo̱o̱s na, a be isum, ko cie̱k baꞌ. Á kok rice naza dide̱ng. Á fok inyim akak ba, ma á a kas áfe a ta se nasho̱o̱n Adakunom.

¹¹Ámaleka'me be rice ba á ta be agap be kukyem ne á nar áner kubo̱so̱p áfe abo̱o̱s'e sang á fe̱ ike̱ng ikak imaan'e natoon áfe a ta se nasho̱o̱n Adakunom baꞌ.

¹²Amma áner na fe̱ rimaan'e natoon ike̱ng iya sang ba ta se̱ rikpa'me baꞌ. Á se kyo̱ndi amaan ikewum iya i ta kuus ike̱ng iya riye̱ ba tu ku no̱o̱k ba tsek. A tú tes ba kyo̱ndi amaan ikewum nong a ta yising ne a fe̱s tse̱k, á tà kus kyo̱ndi ikewum'e.

¹³A tà ka karang ba be risam kamok ba no̱o̱k ákak risam. Ba fok kusas'e kunye ike̱re̱ isum kyo̱ndi agabu natite kunom. Kusor ba be yin nye ike̱ng isum ne ku nye amaan ike̱ng, á yas mak be yin gye̱rtatan nama anong ne á nye ike̱re̱ isum'ong.

¹⁴Á shim ku tse̱se̱k ányining dide̱ng, ma á ro̱n be kunye rine̱n baꞌ. Á tsang á wo̱ro̱k áner aya sang á tan nyeseng be agap baꞌ. Á mak á be kuye̱re̱k dide̱ng. Iri ba ne Adakunom ma ka fiming ba.

¹⁵Á won iren itek nong á ta ban á kuus akpe̱de̱ng iren aBalam [1] igon aBeyo, afe a tá shim a ta se̱ ishorong natoon amaan kunye wu.

¹⁶Amma a tú ku tigba kamok amaan kunye wu. Azhaki akak a tá kun fe̱ kanu baꞌ, a fe̱ kanu be kuto̱ anerawe nong a tá tigba aner kuzarap'ong kamok kuririm wu.

¹⁷Áner kubo̱so̱p afe abo̱o̱s na se kyo̱ndi ribong riya sang ri ta be ashi baꞌ, ne a se kyo̱ndi ane̱n kuwun ta fe̱se̱m. Adakunom n nye karo̱ ka ta be amaan awhi kamok ba.

¹⁸A ya aduk kuka be rine̱n ne á wo̱ro̱k áya a ta ra won kunye rine̱n'ong tsek be ike̱re̱ iya kuro̱m ta shim.

¹⁹Á fe̱ be ánerawe ye ba ta se̱ kusor ne̱k, amma ba be rice ba nye ásam kusor kpe̱de̱ng. Kamok anerawe nye asam nufe koakye ike̱ng i tin nye rigwo̱m ni wu.

²⁰Ke áner kubo̱so̱p abo̱o̱s'ong wher nubo̱k amaan ike̱re̱ kazatse kamok ba tá ren Agwo̱m Ágwo̱m yir Aner Kashesh, aYeso Kiristi, amma ke á ra bun á won amaan ike̱re̱ kazatse'me tú ku karam ba ma i nar agap ba, á tu ku bun á ta te amaan'e ne á nar izen iya ba tá tsang á ren aYeso baꞌ.

²¹I nar ke ba fa tsang á ren iren katsak'e baꞌ ingya, be á tana ren ne á ra bun a won Itsi Adakunom izhe̱l'e a tá tsang a ka no̱o̱k ba.

²²Ike̱re̱ ba tá nye'ong se kyo̱ndi kare̱e̱r rife̱ a ta fe̱ ye, “Agabu kos ne a bun a re̱s rikos wu.” Kare̱e̱r rife̱'me kakak bun ka fe̱ ye, “A so álade ne a bun a kubun a ta se biring kaye̱e̱r ame̱re̱sh.”