Read izere 1 aYohana 1 Bible Online

1 aYohana 1 - izere bible

1 aYohana 1

¹Yir sen ka zibir yin rife̱ na natoon aYeso Kiristi aya a ta nye Rife̱ Kutser. A tuse kum nizen iya a tá nye kazatse. Yir fok yir rife̱ wu ne yir ku di yir, yir tú ku ye̱re̱k yir be anyisi yir ne yir ku ras yir be ibo̱k yir.

²Wu ne a nye aya a ta nyesek kutser, a be̱ nufe ánerawe, yir tú ku di yir. Kamok anong yir sen ka taas yin rife̱ na natoon wu aya a ta nyesek kutser kufe izen izen. A se mak be Adakunom a ta nye Ada'me, amma Adakunom sak yir tú ku di yir.

³Yir sen ka taas yin rife̱ natoon aya yir tá di yir ne yir ku fok yir, nong ase̱ yir tà te yir kyo̱ndi aner azining ne kusor yir se kuzining be Adakunom a ta nye Ada'me ne Igon wu aYeso Kiristi.

⁴Yir tá zibir yin kufumung na nong ase̱ riye̱ rikan yir tà shining mumak dide̱ng.

⁵Rife̱ yir tá fok yir nufu ne yir sen ka taas yin ye; Adakunom nye akanang, awhi kuse kaye̱e̱r wu, ko cie̱k baꞌ.

⁶Kamok anong, ke yir fe̱ yir ye yir n gung yir rice be wu amma ne yir ra bun i sor yir kyo̱ndi áfe awhi, i nye ye yir be yir abo̱o̱s, i be yir katsak baꞌ.

⁷Amma ke yir tseng yir na akanang kyo̱ndi Adakunom ta nye akanang, ne i gung yir rice be koangan afikuus, ne naso̱k Igon wu aYeso ni kusu yir rine̱n yir nong tà te yir zhe̱l.

⁸Ke yir fe̱ yir ye yir be yir rine̱n baꞌ, i nye ye yir wo̱k yir rice yir, katsak kuse kaye̱e̱r yir baꞌ.

⁹Amma ke yir taas yir Adakunom rine̱n yir, a tin re̱ng yir'e kamok wu be katsak ne a be kuse kutek, ne a ni kusu yir kaye̱e̱r koakye ike̱ng imaan'e.

¹⁰Ke yir fe̱ yir ye yir n nye yir rine̱n baꞌ, i nye ye yir sok yir ye Adakunom be abo̱o̱s ne rife̱ wu kuse kaye̱e̱r aye̱ yir baꞌ.