Read izere 1 aYohana 2 Bible Online

1 aYohana 2 - izere bible

1 aYohana 2

¹Inoon'i, yin aya mi ta shim, mi tá zibir yin ike̱re̱ na fan yin bu nye yin rine̱n. Amma ke akak yin bun a nye rine̱n, Adakunom tu ku re̱ng'e kamok yir be yir akak a tana nyeseng rice yir nasho̱o̱n Adakunom a ta nye Ada'me. Wu ne a nye aYeso Kiristi aya a ta se zhe̱l nasho̱o̱n Adakunom.

²Wu ne a nye asidaka kure̱ng rine̱n yir. Kamok yir tsek baꞌ, amma ánerawe kazatse cei.

³Ke yir nye yir ike̱re̱ Adakunom tá fe̱ ye i ra nye yir, iyong ne i ta tonong ye koangan yir ren Adakunom.

⁴Ke akak fe̱ ye wu ren Adakunom a ra nye ike̱re̱ iya Adakunom'me tá fe̱ ye a ra nye baꞌ, i nye ye a be abo̱o̱s, katsak kuse riye̱ wu baꞌ.

⁵Amma koangan ne a nye ike̱re̱ iya Adakunom'me tá fe̱, i nye ye a shim Adakunom be katsak riye̱ wu. Be anong ne yir ta ren yir ye yir sor yir kaye̱e̱r Adakunom.

⁶Aner aya a ta fe̱ ye wu sor kaye̱e̱r Adakunom ta sor kyo̱ndi aYeso tá sor dim.

⁷Aro̱, ike̱ng mi ta sen ka zibir yin'e na nye itsi ifas baꞌ i nye iya Adakunom tá tsang a fe̱ be yin, iya yin tá fok yin kum ni ime̱se̱ng'e. Itsi na nye rife̱ Adakunom riya yin tá kun fok yin.

⁸Gip be anong i bun i te ifas. A ta kyem a di katsak itsi na nuse aYeso ne a di nuse yin. Kamok awhi'me nye ne a wei, ne akanang'e afe katsak n san kuya gip.

⁹Koangan ne a fe̱ ye wu se kaye̱e̱r akanang'e, amma ne a rawu aronyining wu afikuus, i nye ye a rusek na awhi.

¹⁰Aner aya ne a shim aronyining wu afikuus, i nye ye aner'e se na akanang. Ike̱ng ikak kuse i tana ku sak nong a tana won iren'e baꞌ.

¹¹Amma aner aya a ta rawu aronyining wu afikuus a se na awhi, a tseng na awhi. Kamok anong a ren karo̱ wu tu ku be baꞌ, kamok awhi'me tu ku whe̱e̱n anyisi.

¹²Mi ta zibir yin'e, aya i ta ru nye yin inoon nabik kamok a ma ka re̱ng yin rine̱n yin, kaye̱e̱r riyerek aYeso.

¹³Mi ta zibir yin'e, aya i tan kyem yin ánerawe nabik kamok yin n ren yin aKiristi'me. A se kum ni ime̱se̱ng'e. Mi ta zibir yin'e aya i ta ru nye yin acam nabik, kamok yin n canang yin Ishetan a ta nye Amaan Aner. Mi ta zibir yin'e, aya i ta ru nye yin inoon nabik kamok yin ren yin Adakunom aya a ta nye Ada yir.

¹⁴Mi ta zibir yin'e, aya i tan kyem yin ánerawe nabik kamok yin ren yin aKiristi'me aya a tá se kum ni ime̱se̱ng'e. Mi ta zibir yin'e, aya i ta ru nye yin acam nabik kamok yin be yin agap nikuus Adakunom ne rife̱ Adakunom'me kuse naye̱ yin. Yin n canang yin Ishetan a ta nye Amaan Aner.

¹⁵Sang tu shim yin kazatse ka ike̱re̱ kazatse'me baꞌ. Koangan afe a ta shim kazatse, to̱, kushim Ada'me kuse kaye̱e̱r riye̱ wu baꞌ.

¹⁶Kamok koakye ike̱ng iya i ta se kaye̱e̱r kazatse na, kyo̱ndi; kushim ike̱re̱ kuro̱m, be iya anyisi ta wo̱k aner be kuni tsor kafok be ike̱re̱ iya yir ta be yir — , ike̱re̱ kuri iyong nes nufe Ada baꞌ, amma kaye̱e̱r kazatse ne iwuruk.

¹⁷Kazatse na, be amaan kushim ike̱re̱ i ta se kaye̱e̱r kazatse'me ta gang, amma aner aya a ta nye ike̱re̱ Adakunom ta shim a tà sor ma izen izen.

¹⁸Inoon'i, yin aya mi ta shim, won ta ka tak yin, inom na nye izen gang'e. Kyo̱ndi yin tá fok yin ye ámudo̱n aYeso Kiristi tà be̱, kyo̱o̱rna gip ámudo̱n'e m be̱ whe̱re̱. Kamok anong yir ren yir ye inom igang'e m be̱ bubarak.

¹⁹Ámudo̱n'e se kaye̱e̱r yir nizham a tá ra wuruk, ba kun se mak be yir nigaan'e baꞌ. Ke a fa nye ye ba nye afikuus be yir katsak'e, ke a sor mak be yir. Kukam ba be yir tonong ye ba nye afe yir baꞌ.

²⁰Amma yin, yin se̱ yin Kabik Kazhe̱l'e kamok Adakunom tá ka kasa yin. Kamok anong cice̱r yin, yin ren yin ike̱re̱ i ta nye katsak.

²¹Sang mi ta zibir yin'e ye kamok yin ta dun yin katsak'e baꞌ, hiir, amma kamok yin ta ren yin katsak'e ne i bun i ren yin ye a gung abo̱o̱s be katsak baꞌ.

²²Angan ne a bo̱ agbang abo̱o̱s e̱? Aner aya a ta ton'e ye sang aYeso nye aKiristi. Aner kuri ayong ne a nye amudo̱n aYeso, a rawu Ada'me be Igon'e.

²³Akak kuse a tana rawu Igon Adakunom ne a te azining be Ada'me baꞌ. Aner aya a ta shan Igon'e, a shan Adakunom a ta nye Ada'me gip.

²⁴Kamok anong, mi fe̱ be yin ye i ra yiir yin rife̱ yin tá fok yin kum ni ime̱se̱ng'e. Ke yin nye yin anong, yin ta te yin azining be Igon Adakunom'me ne Adakunom a ta nye Ada'me.

²⁵Ke yin nye yin anong, yin tà se̱ yin kutser kufe izen izen kuya aYeso tá tsang a no̱o̱k kuto̱ ye wu tin no̱o̱k yir.

²⁶Mi ta zibir yin ike̱re̱ na natoon áner á ta shim á ta ka wo̱ro̱k yin nong ta won yin ikuus.

²⁷Amma yin, yin n se̱ yin Kabik Kazhe̱l'e nufe aYeso kaya ka ta sor be yin koakye izen. Kamok anong yin ba tse̱r yin aner akak a tana ka bo̱so̱p yin'e baꞌ. Kabik wu tà ka bo̱so̱p yin ike̱re̱'me ife katsak cei. Kukasa wu tin kasa yir nye katsak, ku nye kufe abo̱o̱s baꞌ. Kyo̱ndi a tá ka bo̱so̱p yin'e ye i ra sor yin kaye̱e̱r aYeso.

²⁸Kyo̱o̱rna inoon'i, yin aya mi ta shim, sor yin kaye̱e̱r aYeso nong ase̱ izen iya a tana bun a be̱, yir ta fok yir inyim ka isum nasho̱o̱n wu baꞌ.

²⁹Ke yin ren yin aYeso nye azhe̱l'e. To̱, yin ta ren yin ye koangan a ta nye ike̱re̱ i ta se gye̱r nasho̱o̱n Adakunom gip a tà sor igon Adakunom nabik.