Read izere 1 aYohana 3 Bible Online

1 aYohana 3 - izere bible

1 aYohana 3

¹Ye̱re̱k yin ta di yin kuri kushim Adakunom tin shim yir ma a ti yis yir ye inoon wu. Ike̱ng yir ta nye yir'ong! Kazatse ti ren yir baꞌ, kamok ba tu ren baꞌ.

²Aro̱, kyo̱o̱rna yir nye yir inoon Adakunom. Yir ren yir ike̱ng yir tana te yir nasho̱o̱n baꞌ. Amma yir ren yir ye izen iya aYeso tana bun a be̱, yir tà te yir kyo̱ndi wu ne i di yir kuse wu.

³Kamok anong, koangan a tin te riye̱ wu ye wu ta se kyo̱ndi aYeso ne a won kunye rine̱n nong a ta sor zhe̱l kyo̱ndi aYeso'me.

⁴Koangan afe a ta yiir nye rine̱n tonong ye a rawu itsi Adakunom. Kunye rine̱n nye kuwon dar kukuus itsi Adakunom.

⁵Amma yin ren yin ye ike̱ng i tá sak aYeso tá be̱ nye, nong a ta sok rine̱n yir. A nye rine̱n baꞌ.

⁶Aner akak kuse a ta se kaye̱e̱r aYeso ne a bun a yiir inye rine̱n baꞌ. Aner akak kuse a ta yiir nye rine̱n, ne a fe̱ ye wu ren aYeso ka wu kun ku di aYeso baꞌ.

⁷Inoon'i, yin aya mi ta shim, sang tu won yin akak ta ka wo̱ro̱k yin baꞌ. Aner a ta nye ike̱re̱ i ta se gye̱r ne a se gye̱r nasho̱o̱n Adakunom kyo̱ndi aYeso ta se.

⁸Amma aya a ta yiir nye rine̱n nye afe Ishetan kamok Ishetan n me̱ ne a nye rine̱n kum ni ime̱se̱ng'e. Iyu ne i sak Igon Adakunom'me tá be̱ nong a tà yirik ike̱re̱ Ishetan'e tá nye cei.

⁹Akak kuse a ta nye igon Adakunom ne a bun a yiir nye rine̱n baꞌ, kamok kuse Adakunom kuse kaye̱e̱r wu. A ta bun a ya kasho̱o̱n be rine̱n baꞌ, kamok a nye igon Adakunom.

¹⁰Ana ne yir tà ren yir áya a ta nye inoon Adakunom be inoon Ishetan. Koangan afe a ta nye ike̱ng i ta se gye̱r baꞌ, ka aya a ta shim aronyining wu afikuus baꞌ, a nye igon Adakunom baꞌ.

¹¹Rife̱ yir tá fok yir kum ni ime̱se̱ng'e se ye i ra naka shim yir.

¹²I tuse yir kyo̱ndi aKayinu baꞌ. A tá nye afe Ishetan ma a fe̱r aronyining wu. Akye̱ sak a tá fe̱r aronyining e̱? Kamok kunye wu nye kumaan'e ne kufe aronyining se gye̱r nasho̱o̱n Adakunom.

¹³Ároneng, tu te yin zhing baꞌ ke kazatse ta rayin.

¹⁴Yin ren yin, yir tsang i nye yir ikom'e cice̱r nabik, amma kyo̱o̱rna yir be yir kutser kamok yir shim yir áronyining yir. Aner aya afe a ta shim aronyining wu baꞌ, a nye kukom'e nabik.

¹⁵Koangan a ta rawu aronyining wu se kyo̱ndi aner a ta fe̱s ánerawe. Yin ren yin ye akak kuse a ta fe̱s ánerawe a ta be kutser kufe izen izen baꞌ.

¹⁶Yir ren yir ye kushim kufe katsak se ana, aYeso Kiristi no̱o̱k kutser wu kamok yir. Yir gip, yir tà no̱o̱k yir kutser yir kamok áfikuus áfudang yir.

¹⁷Ke akak kuse a ta be ike̱ng ne a di aronyining wu áfikuus a be ike̱ng ikak baꞌ, a se nudaam, amma a ro̱ riye̱ wu nong a tu ku nye ike̱ng ikak baꞌ. Ane̱ ne wu ta tonong ye kushim Adakunom kuse riye̱ wu e̱?

¹⁸Inoon'i, yin aya mi ta shim, kushim yir tuse ni nanu tsek baꞌ, amma i nye yir ike̱ng iya i tana tonong ye yir naka shim yir be katsak.

¹⁹Kunye yir anong ta tonong ye yir nye yir áfe katsak. Yir tà se̱ yir kameneng riye̱ nasho̱o̱n Adakunom gip, nizen iya aye̱ yir

²⁰tin to̱ yir amok. Kamok Adakunom ren aye̱ yir ne a ni nar yir ne a ren koakye.

²¹Aro̱, yin aya mi ta shim, ke aye̱ yir ti tonong yir ye yir n nye yir imaan'e baꞌ, to̱, i tu fok yir inyim nasho̱o̱n Adakunom baꞌ.

²²Adakunom tin no̱o̱k yir koakye yir tu ku rip yir, kamok yir kuus yir rife̱ wu ne i nye yir ike̱re̱ wu ta shim.

²³Ike̱ng Adakunom tá fe̱ ye i ra nye yir'e nye ye, i rin no̱o̱k yir katsak ni Igon wu aYeso Kiristi ne i naka shim yir kyo̱ndi aYeso tá fe̱ be yir.

²⁴Koangan afe a ta kuus ike̱ng iya itsi Adakunom tá fe̱ a se kaye̱e̱r Adakunom'me ne Adakunom se kaye̱e̱r wu. Yir ren yir ye Adakunom se mak be yir be Kabik Kazhe̱l'e a tin no̱o̱k yir.