Read izere 1 aYohana 5 Bible Online

1 aYohana 5 - izere bible

1 aYohana 5

¹Koangan afe a ta no̱o̱k katsak ye aYeso nye aKiristi, nye igon Adakunom. Koangan afe a ta shim Ada'me, a tà shim igon'e gip.

²Ana ne yir ren yir ye yir shim yir inoon Adakunom, ke yir shim yir Adakunom ne yir bun i nye yir ike̱re̱ wu ta fe̱ ye i ra nye yir.

³Ana ne kushim Adakunom'me se, ke yir nye yir ike̱re̱ wu ta fe̱ ye i ra nye yir. Ike̱re̱ wu ta fe̱ ye i ra nye yir'e, ro̱ kunye baꞌ,

⁴kamok aner aya a ta nye igon Adakunom n canang kazatse. Ike̱ng i ta sak yir tan canang yir kazatse'me nye kuno̱o̱k katsak yir na aYeso.

⁵Angan ta kyem a canang kazatse'me e̱? Aya a ta no̱o̱k katsak ye aYeso ne a nye Igon Adakunom tsek.

⁶aYeso Kiristi ne a ne naza, a tú ku nye abatisma be ashi ne a nyosong naso̱k wu. I nye ashi tsek baꞌ, amma ashi be naso̱k. Ne Kabik Kazhe̱l'e ni tak yir ye i se anong, kamok wu ne a taas ánerawe katsak'e.

⁷Kamok anong, íren itaar kuse yir tana ren yir katsak natoon aYeso.

⁸Ife ime̱se̱ng'e nye Kabik Kazhe̱l'e, ife afa'me nye abatisma ashi a tú ku nye'me ne ife ataar nye naso̱k a tá nyosong riku wu. Ike̱re̱ itaar'ong tonong ike̱ng izining.

⁹Ke anerawe ti tak yir ike̱ng, yir ti no̱o̱k yir katsak. Amma ike̱ng Adakunom tá fe̱ nar ife ánerawe yiik kamok wu nye Adakunom. Kamok anong, ike̱ng wu tá fe̱ natoon Igon wu nye katsak.

¹⁰Koangan afe a ta no̱o̱k katsak ye aYeso ne a nye Igon Adakunom'me ren riye̱ wu ye ike̱ng Adakunom tá fe̱ nye katsak. Koangan afe a tin no̱o̱k katsak nike̱ng Adakunom tá fe̱'me baꞌ, a tonong ye Adakunom be abo̱o̱s kamok a ti no̱o̱k katsak nike̱ng Adakunom tá fe̱ natoon Igon wu baꞌ.

¹¹Ike̱ng'e se ye, Adakunom min no̱o̱k yir kutser kufe izen izen. Kutser'e se be Igon wu aYeso.

¹²Kamok anong, aya a tan te azining be Igon Adakunom'me be kutser kufe izen izen, aya a tan te azining be Igon'e baꞌ, a be kutser kufe izen izen baꞌ.

¹³Mi ta zibir yin'e aya i tin no̱o̱k yin katsak riyerek aYeso Igon Adakunom, nong ase̱ yin ta ren yin ye yin be yin kutser kufe izen izen.

¹⁴Yir tseng yir nasho̱o̱n Adakunom be riye̱ rizining, kamok ke yir tu rip yir koakye i ta nye kushim wu, a tin fok yir.

¹⁵Ke yir ren yir ye a ti fok yir, koakye ike̱ng i tu ku rip yir ne yir ren yir ye i ta se̱ yir.

¹⁶Ke akak di aronyining wu sen nye rine̱n riya ri tana tseng be wu riku baꞌ, ne wu ku nye aduwa ne Adakunom shesh aner'e. Mi fe̱ natoon aya afe a ta nye rine̱n riya ri tana won dar ka sak ba a ta kus. Amma rine̱n rikak kuse ri ta sak anerawe ta ku nabik. Sang mi fe̱ ye ma a ra nye aduwa kamok aner kuri ayong baꞌ.

¹⁷Koakye ike̱ng imaan'e anerawe ta nye nye rine̱n, amma sang koakye kuri rine̱n ne ri ta sak anerawe tà ku nabik baꞌ.

¹⁸Yir ren yir ye koangan afe a ta nye igon Adakunom ta ya kasho̱o̱n be kunye rine̱n baꞌ, kamok aYeso aya a ta nye Igon Adakunom tà fek aner'e. Ishetan ta kyem a ku nye ike̱ng ikak baꞌ.

¹⁹Yir ren yir ye yir nye yir inoon Adakunom ne Ishetan ninye rigwo̱m nazatse na.

²⁰Yir ren yir gip ye Igon Adakunom m be̱ nong a tin no̱o̱k yir kuren ike̱ng nong ta ren yir aya a ta nye katsak. Yir se yir kaye̱e̱r Adakunom a ta nye katsak, kamok yir se yir kaye̱e̱r Igon wu aYeso Kiristi. Wu ne a nye Adakunom afe katsak ne a nye kutser kufe izen izen.

²¹Kamok anong, inoon'i, yin aya mi ta shim, sor yin gugo̱k be ike̱re̱ ife i ta nye ife adakunom afe abo̱o̱s.