Read izere Ike̱ng a ta tonong aYohana 10 Bible Online

Ike̱ng a ta tonong aYohana 10 - izere bible

Ike̱ng a ta tonong aYohana 10

¹Ne mi bun i di agbang amaleka akak ne naza a sen tisik kaben. A mu ku kis be ane̱n be itsereng natoon rice wu. Kanyisi wu se kyo̱ndi kunom ne atak wu seng kyo̱ndi atse̱n kuro̱ng.

²Kukpa izibir kukak kuhiir'e se nukarak nubo̱k wu. A nyeseng be kutak riya natoon ashi, kufe rimen se niben ikoor.

³Ne a ta kuto be agap kyo̱ndi azaki ta muus. Nizen iya wu ta tar ne kuto̱ akparam kanataar ame shim.

⁴Nizen akparam kanataar'e tá fe̱ kanu, mi shim ta zibir rife̱'me, amma mi fok kuto̱ kukak naza ye, “Sang tu zibir ike̱re̱ iya akparam'e tá fe̱ baꞌ.”

⁵Ayong amaleka aya mi tú ku di nunyeseng kutak kuzining natoon ashi ne kufe afa niben ikoor ame sok kubo̱k riya wu naza.

⁶Ayong a shu be riyerek wu aya a ta se ma izen izen, afe a tá nye kaza be koakye ike̱ng i ta se kaye̱e̱r'e. Wu aya a tá nye kazatse be koakye ike̱ng i ta se kaye̱e̱r'e, wu afe a ta nye ágbang ísho̱ng be ike̱re̱ i ta se kaye̱e̱r'e cei, yong amaleka'me fe̱ ye, “A ta ba beseng izen baꞌ.

⁷Amma nizen iya amaleka afe kanataar tana fe̱e̱p rigba rifu, nizen iyong ne Adakunom ta taas koakye ike̱ng wu ta tsang a fe̱ be áner kuzarap wu.”

⁸Iyong mi bun i fok kuto̱ kuya mi ta tsang i fok naza ame. Ku fe̱ be mi ye, “Tseng, ta se shan kukpa izibir ku ta se nubo̱k amaleka a ta nyeseng be kutak kukak natoon ashi ne kukak niben ikoor.”

⁹Iyong mi tseng nufe amaleka'me i tá fe̱ be wu ye a rin no̱o̱k ikpis kukpa izibir'e. Ayong a fe̱ be mi ye, “Se sok'e ta ya, wan ta fok kurereng'e nafa wan amma ku se kyo̱ndi ritong nanu wan.”

¹⁰Iyong mi se sok kukpa izibir'e nubo̱k amaleka'me i ta ya. Mi fok ku tá ta kyo̱ndi ritong nanu mi, nama mi tá wo̱no̱ng ne mi fok kurereng'e nafa mi.

¹¹Ayong a bun a ti tak ye, “Wan ta bun i zarap natoon ánerawe whe̱re̱ be iwo̱p whe̱re̱ ne írem ze̱r ze̱r ne ágwo̱m ze̱r ze̱r.”