Read izere Ike̱ng a ta tonong aYohana 12 Bible Online

Ike̱ng a ta tonong aYohana 12 - izere bible

Ike̱ng a ta tonong aYohana 12

¹Ayong agbang ike̱ng azhing ikak wuruk natoon kaza. Ike̱ng'e nye abining akak a tá sok kunom a tin nye ares ne kufe̱n nabas atak wu. Ribong rigwo̱m wu nye ádar kuso̱k be afa.

²Abining'e se be kafa yong a yiir tos be kuro̱'me kamok izen kutes wu tsang i nye.

³Kuke̱ng kukak bun ku wuruk naza gbak. Kuke̱ng'e nye kukewum kukak kuseng ku ta se zhirim kyo̱ndi Kuwhen [9] ku be ace kanataar be atom kuso̱k be abong rigwo̱m kanataar natoon ace'me.

⁴Kurum'e re̱ng ádar kaza abas azining kaye̱e̱r ataar a tá korok kaye̱e̱r kazatse. Ne Kuwhen ame nyeseng nasho̱o̱n abining ame a tan be̱ barak a ta tes nikum a ta wor a wo̱no̱ng igon abining'e nizen iya a tana tes.

⁵Abining'e tes igon kamitek'e aya a tana nye rigwo̱m natoon ánerawe kazatse cei. A tà nye rigwo̱m'e be ishe̱n kutso̱m. Amma a ti shan igon'e zhar a tà tseng'e naza nufe Adakunom naro̱ itsik rigwo̱m wu.

⁶Ayong abining'e teng a tá no̱ katse naro̱ Adakunom ta tsang a ku sak'e nong a tù ku fek ma inom izungu izining be iso̱k inyak ifa be iso̱k igataar (1,260).

⁷Ayong a kpaan itsom naza, aMakel be Ámaleka wu ko̱n itsom be Kuwhen ame, ne Kuwhen'e be ámaleka afu ko̱n be ba gip.

⁸Amma agap Kuwhen'e raar yong á ta ya ba ni itsom'e ne á ku ro ba kaye̱e̱r kaza.

⁹Ayong a barak Kuwhen ame kaben. Wu ne a nye kuwhen kugbazen'e ame a ta yis ye Amaan Aner ka Ishetan ayi. Wu ne a wo̱k kazatse cice̱r nong kazatse ta wei. A tu barak kaben mak be ámaleka wu ame.

¹⁰Iyong mi fok kuto̱ kukak kanang natoon kaza ku ta fe̱ ye, “Kyo̱o̱rname, kashesh be kukyem ne rigwo̱m Adakunom yir ne kukyem aKiristi wu m be̱. Kamok an barak aner aya a tá tsees kukun áronyining yir kaben, wu aya a ta yiir nye kukun áronyining yir nasho̱o̱n Adakunom katuk be kunom.

¹¹Áronyining yir tú ku canang kamok naso̱k Aturuk'e ne kamok ike̱ng ife ba tá fe̱, kamok á tú ku teng riku baꞌ.

¹²Kamok anong, nye yin riye̱ rikan naza ne áya a ta sor kaye̱e̱r'e. Amma awo̱ be kazatse ne agbang adung, kamok Amaan Aner n tiik kaye̱e̱r yin. Riye̱ wu kun fuus kamok a ren ye izen wu ba gop baꞌ.”

¹³Nizen iya Kuwhen'e tá di a tu barak kaben, iyong a tikup na abining'e afe a tá tes igon kamitek'e ame.

¹⁴Amma Adakunom no̱o̱k abining'e agbang afabak afa kuri afe agbang akim nong a tin dorok naza fan kukewum ame nong a tá tseng naro̱ a tá mu ku sak'e kaye̱e̱r katse. Azong ne a tin sak riye̱ ni wu ma aye̱ ataar be ribir.

¹⁵Iyong Kuwhen ame kos ashi nanu wu kyo̱ndi ashi isho̱ng nong a tá wo̱k ye nong a tá se̱ ashi'me tá sok abining'e.

¹⁶Amma kaben tobok abining'e. Kaben'e karak kanu ka tá wo̱no̱ng ashi aya Kuwhen'e tá kos.

¹⁷Iyong riye̱ Kuwhen ame ti barang kubeseng be abining'e dide̱ng, iyong a tseng a ta se ko̱n itsom be ribir afe iri abining'e áya a ta kuus Itsi Adakunom ne á yiir itak natoon aYeso.

¹⁸Iyong Kuwhen ame tseng ku ta se nyeseng natoon rize̱k nanu agbang kudung ame.