Read izere Ike̱ng a ta tonong aYohana 16 Bible Online

Ike̱ng a ta tonong aYohana 16 - izere bible

Ike̱ng a ta tonong aYohana 16

¹Iyong mi fok kuto̱ kukak be agap ku tá yis kaye̱e̱r agbang kutu kuya Adakunom iben'e, ku ta sen fe̱ be ámaleka kanataar ame ye, “Tseng yin ta se korok yin kazatse nakereng kanataar nafe riye̱ kubeseng Adakunom na.”

²Ayong amaleka afe ime̱se̱ng'e tseng a ta se korok ike̱ng iya i ta se kaye̱e̱r kakereng kafu kaye̱e̱r kazatse'me. Ayong amaan ifor i ta ro̱ dide̱ng ti wuruk niro̱m áner á ta be izizo̱ kukewum ame be áya a tá ya ike̱ng iya i tú ku tas iben.

³Amaleka afe afa tseng a tá se korok ike̱ng i ta se kaye̱e̱r kakereng kafu kaye̱e̱r agbang kudung, yong ashi'me kirik a tá te kyo̱ndi naso̱k aner aya a tan ku, ne ike̱re̱ iya i tá sor kaye̱e̱r ashi'me kus cei.

⁴Amaleka afe ataar'e tseng a tá se korok ike̱ng iya i ta se kaye̱e̱r kakereng kafu kaye̱e̱r isho̱ng ne ninaro̱ ashi tu ku wuruk. Ayong ashi'me te naso̱k gip.

⁵Iyong mi fok amaleka aya a tin sak riye̱ nashi tá fe̱ ye, “Amok na áya wan tan te̱n se gye̱r, wan afe i ta se gbugbang ne i bun i ku se kyo̱o̱rna. Wan nye Azhe̱l'e, kamok wan tá to̱ amok gye̱r.

⁶Kamok ba tan nyos naso̱k ázhe̱l'e be áfe kuzarap wan, yong wan tú no̱o̱k ba naso̱k nong a tá so̱ te̱re̱ be kunye ba.”

⁷Ne mi fok kuto̱ kukak kaye̱e̱r abagadi ame ta fe̱ ye, “Ei, Adakunom Agbang Agwo̱m Ágwo̱m afe kukyem cei, amok wan se gye̱r ne a nye katsak.”

⁸Amaleka afe anaas'e tseng a ta se korok ike̱ng iya i ta se kaye̱e̱r kakereng kafu natoon kunom. Ayong a no̱o̱k kunom kukyem a tanin shosh ánerawe be kuro̱ng.

⁹Iyong kuzhoosh kunom ame ya ánerawe ma á fiming riyerek Adakunom aya a ta be agap ku te̱ne̱ng amaan risam na. Amma á gaar kushishing kuse ba nong a tú ku tiyiik.

¹⁰Amaleka afe atoon tseng a tá se korok ike̱ng iya i ta se kaye̱e̱r kakereng kafu ni itsik rigwo̱m kukewum ame yong awhi whe̱e̱n rigwo̱m kukewum'me cei. Ánerawe ros irem ba be kuro̱'me,

¹¹ayong á fiming Adakunom afe a ta se kaye̱e̱r kaza kamok kuro̱'me be ifor i ta se niro̱m ba. Gip be anong, a gaar kushishing kuse.

¹²Amaleka afe igataar se korok ike̱ng iya i ta se kaye̱e̱r kakereng kafu na agbang isho̱ng a ta yis ye aYufiretis. Ashi'me gang cei nong a tá nang ágwo̱m a tana wuruk nabas kuwuruk kunom iren.

¹³Ne mi di amaan nabik nataar kyo̱ndi ákpabor tá wuruk nanu kuwhen ame, be nanu kukewum ame ne nanu aner kuzarap afe abo̱o̱s.

¹⁴Ámaan nabik'e nye ítseng i tá nye ike̱re̱ azhing. Á tsees nufe ágwo̱m kazatse na cice̱r nong a ta ka tusung ba naro̱ kazining kamok itsom a tana ko̱n katuk agbang kunom Adakunom afe kukyem cice̱r.

¹⁵“Di yin, mi saase kyo̱ndi akpatang. Aner riye̱ rikan ne a nye aner aya a ta sor be kanye̱k, ne a sor be ares wu bubarak fan a bu tseng ica'me ne a fok isum kaye̱e̱r ánerawe.”

¹⁶Iyong ítseng ame tusung ágwo̱m ame cice̱r naro̱ kakak a ta yis nirem áner Ibrani ye Amagedon. [11]

¹⁷Amaleka afe kanataar tseng a ta se misik ike̱ng iya i ta se kaye̱e̱r kakereng kafu natoon kaza. Iyong kuto̱ kukak wuruk be agap kaye̱e̱r agbang kutu kuya Adakunom iben naro̱ itsik rigwo̱m wu ye, “An gang!”

¹⁸Iyong karo̱ kpaan ku gye̱se̱m berep berep kyo̱ndi iza ta tarang karo̱, be kutasak ne akparam, ne kaben zuur dide̱ng. Kum Adakunom tá nye anerawe, kaben kun zuur anong baꞌ, kuzuur kaben'e wor ka nar agap.

¹⁹Agbang kuwo̱p ame kabak abas ataar ne ágbang iwo̱p kazatse kpas ze̱r ze̱r. Adakunom to̱ro̱ng be agbang kuwo̱p aBabila. Ayong a no̱o̱k aBabila'me kures ashi anap kufe agbang riye̱ kubeseng wu.

²⁰Koakye rizik ri ta se natite ashi be nawhanang cei titei.

²¹Agbang rikarang riya ri ta gaar dide̱ng wuruk naza ri ti kpas natoon ánerawe ma ánerawe fiming riyerek Adakunom kamok amaan risam rikarang'e ta nar agap.