Read izere Ike̱ng a ta tonong aYohana 18 Bible Online

Ike̱ng a ta tonong aYohana 18 - izere bible

Ike̱ng a ta tonong aYohana 18

¹Nama anong, mi di amaleka akak ta wuruk naza a ta sen tisik kaben. Amaleka'me be kukyem dide̱ng ma kuyiik wu samang kaye̱e̱r kazatse cice̱r.

²A ta kuto̱ naza a tá fe̱ ye, “Kun kpa, ayiik kuwo̱p aBabila n kpa! Kun te karo̱ ítseng tu ku sor ne kasa koakye kuri amaan kabik be karo̱ kusor koakye kuri akpe̱rde̱k nanon naya na ta se kye̱re̱.

³Kamok ánerawe kazatse cice̱r n feng be ashi anap afe amaan rikuna wu. Ágwo̱m kazatse nye rikuna be wu. Ágbang ázhik kazatse na te árum kamok kushim kusas kusor kazatse wu.”

⁴Iyong mi fok kuto̱ kukak natoon kaza, ye, “Áner'i, wuruk yin kaye̱e̱r kuwo̱p'ong, fan rine̱n kuwo̱p'e bin ngarak natoon yin, fan i bu so̱ yin amaan risam mak be ba.

⁵Kamok rine̱n wu n rasak ma rin ngarak naza, Adakunom n yiring be rine̱n wu.

⁶Kamok anong, nye yin be wu kyo̱ndi wu tá nye, cice̱r ike̱re̱ wu tá nye ku karang yin kutak kufa. Ashi anap'e wu tá sak akak tá so̱, ku sak yin a ta so̱ kutak kufa.

⁷Ku no̱o̱k yin risam dide̱ng be riye̱ riwe te̱re̱ be kuyiik ne kushim kusas kusor kazatse wu tá shim kuno̱o̱k rice wu. Kaye̱e̱r riye̱ wu a yiir ya kuka ye, ‘Mi sor kyo̱ndi agwo̱m. Mi nye akumung baꞌ, mi ta wor i nye riyo̱m baꞌ.’

⁸Kamok anong, kaye̱e̱r kunom kuzining risam kuro̱k be riyo̱m ne izong tin be̱ ni wu. Kuro̱ng tù ku ya cei kamok Adakunom Agwo̱m Ágwo̱m ayiik'e tù ku to̱ amok.

⁹“Nizen iya ágwo̱m kazatse á ta nye rikuna be wu ne á ya kazatse mak be wu tana di itsing kuro̱ng ku ta sen ku ya, á tà tos ne á nye riyo̱m kamok wu.

¹⁰Á tà nyeseng gugo̱k kamok ba tá di risam ba, ne á fe̱ ye, “ ‘Wa tsek! Wa tsek, Wan agbang ayiik kuwo̱p aBabila, kuwo̱p aBabila ku ta be kukyem! Kaye̱e̱r awa azining a wor a tu to̱ amok.’

¹¹“Ágbang ázhik kazatse tù ku tos ne a nye riyo̱m kamok akak ba sen shan ike̱re̱ ife ba ta re̱e̱s baꞌ.

¹²Akak kuse a ta shashang izinariya ba ka azurfa ba ka iwe̱re̱ng ba i ta be kuyiik dide̱ng ne ares ba atek be aseng, ne ares ákak a ta yis ye asilik, ne iriri nakon nafe iko̱o̱n itek. Koakye kuri ike̱ng iya a ta nye be anyi izoom ne ikon i ta be itso̱m dide̱ng ne atso̱m a ta be agap be ata rino̱k akak atek.

¹³Ike̱re̱ ikak ife iko̱o̱n itek [12] ne amuur be aluban be ashi anap ne name nafar, ne ikpe alikama itek. Inyak be itsamang ne itsaap be atso̱m kutseng ba ta ko̱k be ásam ne kutser ánerawe.

¹⁴“Ázhik'e fe̱ be wu ye, ‘Ike̱re̱ itek wan ta min te riye̱ n gang cei. Kurum wan be ike̱re̱ izem wan n gang cei. Wan tà ba se̱ baꞌ.’

¹⁵Ágbang ázhik áya a tá re̱e̱s ike̱re̱ ba ne a ni se̱s ike̱ng ikak natoon'e tà ma nyeseng gugo̱k kamok risam'me. Á tà tos ne á nye riye̱ riwe,

¹⁶ne á fe̱ ye, “ ‘Wa tsek! Wa tsek, Agbang kuwo̱p na! Kuya ku ta tsang ku tes ares atek afe itso̱m, be ares aseng, be aya a ta nye aseng zhau, ne a naka zem be ares izinariya ne iwe̱re̱ng iya i ta se yiik.

¹⁷Kaye̱e̱r awa azining kurum'e wor ku te kpe̱de̱ng!’ “Iyong áko̱k kasho̱o̱n áfe kutsip akpara ashi ne áfe a tá no̱o̱s kaye̱e̱r'e be áfe a tá tsip be koangan afe a ta se̱ ike̱ng kunye azong tà nyeseng gugo̱k.

¹⁸Á tà tos nizen iya ba tá di itseng kuro̱ng ku ta sen ya kuwo̱p'e, á tà fe̱ ye, ‘Kuwo̱p kukak kun kuse ku tá be kuyiik kyo̱ndi agbang kuwo̱p na baꞌ.’

¹⁹Iyong á korok iben rice ne á tos ne á nye riye̱ riwe ne á tang ikun, ne á fe̱ ye, “ ‘Wa tsek! Wa tsek be agbang kuwo̱p na! Kuwo̱p kufe áfe agbang akpara ashi tin se̱ kurum kaye̱e̱r'e. Amma kaye̱e̱r awa azining, ku beseng cei.

²⁰Nye yin riye̱ rikan, yin áfe i ta se yin kaye̱e̱r kaza! Nye yin riye̱ rikan ázhe̱l'e be ámanzo ne áfe kuzarap, kamok Adakunom n to̱ aBabila amok natoon ike̱re̱ iya wu tá ka nye yin'e.’ ”

²¹Ne agbang amaleka akak a tá be agap sok agbang kuta kukak ku ta gaar kyo̱ndi agbang ku ta ako̱ nong a ta barak kaye̱e̱r agbang kudung ne a fe̱ ye, “Ana ne a tà barak agbang kuwo̱p aBabila be agap kaben, a tà ba di baꞌ.

²²A tà ba fok riwo̱ng izom ka abom ka asharuwa ka rife̱ rigba kaye̱e̱r wan baꞌ. A tà ba se̱ akak afe ike̱ng kunye kaye̱e̱r wan baꞌ. A tà ba fok akak ta sen ko̱ ako̱ kaye̱e̱r baꞌ.

²³Akanang ta ba ya kaye̱e̱r kuwo̱p'e baba baꞌ. A tà ba fok akak ta sen nye riye̱ rikan kuwe̱ne̱ng kufas baba baꞌ. Agbang ázhik wan ne á nye ágbang áner kaye̱e̱r kazatse. Wan ne i bun i wo̱ro̱k ánerawe kazatse be kubok wan.

²⁴Anong ne a ti to̱ kuwo̱p aBabila amok kamok naso̱k áner kuzarap ne nafe ázhe̱l'e áfe Adakunom ne nafe ánerawe á tá ka fe̱s ba nazatse.”