Read izere Ike̱ng a ta tonong aYohana 20 Bible Online

Ike̱ng a ta tonong aYohana 20 - izere bible

Ike̱ng a ta tonong aYohana 20

¹Ne mi di amaleka akak tá wuruk kaye̱e̱r kaza ta sen tiik kaben, be akarak ribong riya ri ta se tsik dar igak ame. A be kudun kutso̱m kugbang'e nubo̱k wu.

²Ayong a yiir kuwhen ame, kugbazen kuwhen ame, wu ne a ta nye Amaan Aner ka Ishetan ayi. Amaleka ame tú ku rosom ma aye̱ izungu izining.

³A tú ku barak kaye̱e̱r ribong ri ta se dar igak ame nong a tá whe̱e̱n kpa fan a bu se̱ iren kuwo̱ro̱k ánerawe kazatse ma aye̱ izungu izining gor. Nama aye̱ izungu izining'e gor, a tù ku bisik kaye̱e̱r nizen cie̱k tsek.

⁴Iyong mi di ítsik rigwo̱m whe̱re̱ iya áya a ta ma ka no̱o̱k ba kukyem kuto̱ ánerawe amok ta min sosok natoon'e. Ne mi di nabik áner aya a tá te̱se̱ng ace ba ye kamok ba tá yiir katsak natoon aYeso ne rife̱ Adakunom. Ba ne á gaar kuya kukewum ame iben ka ike̱ng iya a tá nye kyo̱ndi wu ne á gaar a tá ka tse̱k ba izizo̱ kukewum ame nanati ba ka nibo̱k ba ayi. Á bun á dorok be kutser nong á ta nye rigwo̱m mak be aKiristi aye̱ izungu izining.

⁵Iyu ne i nye kudorok ikom kufe ime̱se̱ng'e. (Ribir ánerawe áya a tá tsang á kus'e dorok be kutser baꞌ, ma nama aye̱ izungu izining'e tá gor.)

⁶Aner riye̱ rikan ne a nye áner aya a tin se kaye̱e̱r kudorok ikom kufe ime̱se̱ng'e ne á nye ázhe̱l'e. Riku rife̱ afa sen ka se̱ ba baꞌ, amma ba ne á tà te átsi Adakunom be áfe aKiristi, á ta nye rigwo̱m ba mak be wu ma aye̱ izungu izining.

⁷Nama aye̱ izungu izining'ong tá gor, a tà tun Ishetan naro̱ kaya a tú ku te nitso̱m,

⁸a tà wo̱ro̱k ánerawe cice̱r nikes kazatse inaas a ta yis ye aGok be aMagok. Ishetan tà ka tusung ba naro̱ kazining nong a tà ko̱n itsom. Rigwo̱m ánerawe'me ta se kyo̱ndi rize̱k isho̱ng.

⁹A ta naka tarak kaye̱e̱r kazatse ne a gorok áner Adakunom, kuwo̱p kuya wu ta shim.

¹⁰Ne amaan aner, aya a tá ka wo̱ro̱k ba ame, a tù ku barak kaye̱e̱r icen kuro̱ng kuya ku ta cishek dide̱ng ne itong ikan kyo̱ndi ife abindiga. A tù ku barak naro̱ kazining be kukewum ame ne áner kuzarap afe abo̱o̱s ame. Á tà so̱ risam azong kunom be katuk ma izen izen.

¹¹Iyong mi di agbang itsik rigwo̱m rikak rikan be aner akak natoon'e. Kaza be kaben wor ka wei, akak ba di baꞌ.

¹²Ne mi di áya a tá tsang a kus, áko̱k kasho̱o̱n be inoon, á tan nyeseng nasho̱o̱n itsik rigwo̱m ame. A karak afumung akak. Ne a bun a karak kufumung'e kukak kuya ku ta nye kufumung kutser. A to̱ ikom'e amok te̱re̱ be kunye ba, kyo̱ndi ike̱ng iya a tá zibir kaye̱e̱r afumung'e.

¹³Iyong ágbang adung be̱s be áner aya ba tá kus kaye̱e̱r ba. Riku be karo̱ kaya nabik áya a tá kus tú ku sor be̱s be afuba gip. A to̱ koangan amok te̱re̱ be kunye wu.

¹⁴Ayong a barak Riku ame ne karo̱ kaya nabik áya a tá kus tú ku sor kaye̱e̱r icen kuro̱ng ame. Iyuna ne i nye riku rife̱ afa.

¹⁵Koangan afe a ta se̱ riyerek wu kaye̱e̱r kufumung kutser'e baꞌ, a tú barak kaye̱e̱r icen kuro̱ng ame.