Read izere Ike̱ng a ta tonong aYohana 21 Bible Online

Ike̱ng a ta tonong aYohana 21 - izere bible

Ike̱ng a ta tonong aYohana 21

¹Ne mi di kaza kafas be kaben kafas, kamok kaza kafe ime̱se̱ng'e ne kaben kafe ime̱se̱ng wei, agbang adung ashi tu ku se baꞌ.

²Mi bun i di Agbang Kuwo̱p Kuzhe̱l'e a ta yis ye aUshalima afas. Ku wuruk naza nufe Adakunom ku ta sen tisik kaben. An te ares kususas'e kyo̱ndi abining afas a ta be nasa amitek wu.

³Ne mi fok kuto̱ kukak tá wuruk be agap naro̱ itsik rigwo̱m ame ye, “Di yin, Karo̱ kusor Adakunom n tiik kaben mak be ánerawe, ka tà sor mak be ba. Ba tà te ánerawe wu ne Adakunom be rice wu se mak be ba ne a bun a sor Adakunom ba.

⁴A tà ka re̱ng ba nanyisi cei. Riku ka riye̱ riwe ka kanak ka kuro̱'me ba sen kuse baꞌ, kamok ike̱re̱ kazatse izen cice̱r tà wei.”

⁵Ayong afe a tá tsang a sonong natoon itsik rigwo̱m ame fe̱ ye, “Di yin, mi sen nye koakye ifas!” A bun a fe̱ be mi ye, “Zibir rife̱ na, kamok rife̱'me nye katsak ne ri nye ike̱ng iya a tana kuus.”

⁶A bun a fe̱ be mi ye, “An gang! Mi ne i nye Alfa [13] ne aOmega. I ta sor ye mi ne i nye ime̱se̱ng'e ne i nye igang'e. Koangan afe a ta fok kuto̱ kukoor, mi tì ku no̱o̱k ashi a ta wuruk kaye̱e̱r itop ashi ife kutser nawarak nong a tà so̱.

⁷Aner aya ne a canang kazatse ne mi tù ku no̱o̱k iren nong a tà ya kutse ike̱re̱ na cei. Mi tà sor Adakunom wu ne wu sor igon'i.

⁸Áner aya a tá fok inyim be áfe a tá gaar kuno̱o̱k katsak ne áfe amaan kunye ne áfe kufe̱s ánerawe be áfe kunye rikuna be áfe a tá ya kukur, be áfe a ta ya ike̱re̱ iduk iben cei be áfe abo̱o̱s, karo̱ kusor ba se kaye̱e̱r icen kuro̱ng be itong ikan i ta se kyo̱ndi ife abindiga. Iyu ne i ta nye riku rife̱ afa.”

⁹Ayong amaleka azining kaye̱e̱r ámaleka kanataar a tá be nakereng na tá be amaan risam kanataar nafe igang ame be̱ a tá fe̱ be mi ye, “Be̱ mi tà ka tonong abining afas Aturuk ame tan sok.”

¹⁰Ayong a ti sok kaye̱e̱r kabik a tá tseng be mi natoon agbang kawhanang kakak ka ta se ring ring nong a ta sen tonong Agbang Kuwo̱p Kuzhe̱l'e, a ta yis ye aUshalima. Ku se be kuwuruk kaye̱e̱r kaza nufe Adakunom, ku ta sen tiik kaben.

¹¹Kuwo̱p'e gye̱se̱m be kuyiik Adakunom, kugye̱se̱m'me se kyo̱ndi kufe iwe̱re̱ng ikak a ta yis ye aZhaspa. Kuwo̱p'e se kanang kyo̱ndi agilas.

¹²Kuwo̱p'e be agbang kubar kukak ku ta se garang dide̱ng be nanu kutu kuno̱o̱s kuso̱k be afa be amaleka azining a tan nyeseng nasho̱o̱n koakye kanukutu'me. A tin zibir ayerek izo̱ro̱k áner Isarela kuso̱k be afa ni nanu kutu'me.

¹³Nanu kutu'me se nataar nabas kuwuruk kunom, nataar nabas rikpa kunom ne nataar nataar ribir ikes kazatse ifa.

¹⁴A barak ribor kubar'e natoon ata kuso̱k be afa. A ti zibir ayerek ámanzo Aturuk ame kuso̱k be afa natoon'e.

¹⁵Amaleka afe a tá fe̱ kanu be mi ame be ishe̱n a tin maas ike̱ng, a tá nye be izinariya nong a tin maas kuwo̱p'e ne nanu kutu'me be kubar'e.

¹⁶Abar'e se te̱re̱ abas akak nar afudang baꞌ, kuso̱p'e be kusaa'me se tite̱re̱'e. Nizen iya amaleka'me tá maas kuwo̱p'e be ishe̱n wu, yong a se̱ kuwo̱p'e se kyo̱ndi akilomita izungu ifa be iso̱k inyak ifa (2,200). Kuso̱p'e be kusa'me ne kugarang'e se tite̱re̱'e.

¹⁷Amaleka ame tá fa maas kukpakarak kubar'e, yong a se̱ ku se kyo̱ndi amita iso̱k igataar be igataar. Amaleka'me maas kyo̱ndi ánerawe ta maas ike̱re̱ ba.

¹⁸A no̱k kubar'e be iwe̱re̱ng ikak i ta gye̱se̱m a ta yis ye aZhaspa. A no̱k kuwo̱p'e be izinariya zhe̱l, i ta se kanang kyo̱ndi agilas.

¹⁹A zem abor'e be koakye kuri iwe̱re̱ng. Kuta ribor kufe ime̱se̱ng'e nye iwe̱re̱ng a ta yis ye aZhaspa, kufe afa'me a yis ye aSafaya, kufe ataar nye Agat ne kufe anaas nye aEmeral,

²⁰kufe atoon'e a yis ye aOnis, kufe igataar a yis ye aKaneliya, kufe kanataar'e a yis ye aKirisolat, kufe ikara a yis ye aBeril, kufe katonbo̱k a yis ye aTopas, kufe kuso̱k a yis ye aKirisopuras, kufe kuso̱k be azining a yis ye aZhasi ne kufe kuso̱k be afa'me a yis ye Ametis.

²¹Nanu kutu kuso̱k be afa'me a nye be iwe̱re̱ng ikak i ta gye̱se̱m kususas'e, a nye koakye kanukutu'me be iwe̱re̱ng'e izining. A nye agbang iren kaye̱e̱r kuwo̱p'e be izinariya zhe̱l kyo̱ndi agilas a ta se kanang.

²²Mi di agbang kutu kuya Adakunom iben kaye̱e̱r agbang kuwo̱p'e baꞌ, kamok Ada Adakunom ayiik'e ne Aturuk'e ne a nye agbang kutu kuya Adakunom iben'e.

²³Agbang kuwo̱p'e tse̱r akanang kunom ka kufe̱n baꞌ, kamok kuyiik Adakunom ne kunye akanang'e ne Aturuk'e ne a nye apitila'me

²⁴Ánerawe kazatse ti tseng kaye̱e̱r akanang agbang kuwo̱p'e ne ágwo̱m kazatse be̱s be kuyiik ba nufu gip.

²⁵A tà whe̱se̱ng nanu kutu kuwo̱p'e nigaan'e baꞌ, kamok katuk tuse azong baꞌ.

²⁶Á tà be̱s be ike̱re̱ itek ife kusaas ne kurum ánerawe kazatse na cei kaye̱e̱r kuwo̱p'e.

²⁷Amma ike̱re̱ iya ita se zhe̱l baꞌ, tà no̱ kaye̱e̱r kuwo̱p'e baꞌ. Áfe a tá nye ike̱re̱ isum be áfe a tá wo̱ro̱k ánerawe sen no̱ kaye̱e̱r kuwo̱p'e baꞌ. Awan áya a tá zibir ayerek ba nufumung kutser Aturuk'e ne á tà no̱ kaye̱e̱r tse̱k.