Read izere Ike̱ng a ta tonong aYohana 22 Bible Online

Ike̱ng a ta tonong aYohana 22 - izere bible

Ike̱ng a ta tonong aYohana 22

¹Ayong amaleka'me ti tonong isho̱ng i ta be ashi kutser, i se zhe̱l kyo̱ndi agilas. Ashi'me wuruk naro̱ itsik rigwo̱m Adakunom be ife Aturuk'e,

²ne a wo̱k natite agbang iren i ta se kaye̱e̱r kuwo̱p'e. Kakon kutser tuse ka ta nyeseng nukim isho̱ng'e nabas afa, ka ta tes kutak kuso̱k be afa koakye riye̱. Kakon'e tes koakye kufe̱n. Afumung kakon'e nye rikan nufe ánerawe kazatse cei.

³Adakunom tà ba fiming ike̱ng ikak baꞌ. Itsik rigwo̱m Adakunom be itsik rigwo̱m Aturuk'e tà sor kaye̱e̱r kuwo̱p'e ne ásam wu ku nye itomong.

⁴Ba tà di kanyisi wu ne riyerek wu se ninati ba.

⁵Karo̱ ba sen te katuk baꞌ. Ánerawe tà ba tse̱r akanang kunom ka apitila nong a tin di karo̱ baꞌ, kamok Adakunom, Agwo̱m Ágwo̱m ne a tà nye akanang ba. Á tà nye rigwo̱m ma izen izen.

⁶Ayong amaleka'me fe̱ be mi ye, “Rife̱ na nye katsak, i nye ike̱ng iya a tana kuus. Adakunom, Agwo̱m Ágwo̱m aya a ta no̱o̱k afe kuzarap kabik wu, tom amaleka wu nong a ta tonong ásam wu ike̱re̱ iya i tana nye sang be kubeseng izen baꞌ.”

⁷“Di yin, Mi saase kyo̱o̱rna! Aner riye̱ rikan ne a nye aner aya a ta kuus kuzarap ku ta se kaye̱e̱r kufumung na.”

⁸Mi aYohana, mi fok ne i dis ike̱re̱ na. Mi tá fa gang ku foos ne ku ye̱re̱k'e cei ne mi kpa natak amaleka ame nong tú ku ya iben, wu aya a tin tosong ike̱re̱'me.

⁹Amma amaleka'me fe̱ be mi ye, “Sang tu nye anong baꞌ. Mi nye asam afudang wan, kyo̱ndi ribir áronyining wan áner kuzarap Adakunom cei be ribir ánerawe áya a tin sak riye̱ nufumung a ta zibir na. Ya yin Adakunom iben!”

¹⁰Ayong a fe̱ be mi ye, “Sang tu whe̱e̱n kuzarap kaye̱e̱r kufumung na baꞌ, kamok izen'e m be̱ barak.

¹¹Won wu aya a ta nye amaan ike̱re̱ tu ya kasho̱o̱n be amaan kunye wu, aner aya a ta nye ike̱re̱ isum ra ya kasho̱o̱n be kunye anong. Aner aya a ta be kuse kutek ra ya kasho̱o̱n be kuse kutek wu. Aner aya a ta sor zhe̱l ra ya kasho̱o̱n be kusor zhe̱l.”

¹²“Di yin, Mi saase kyo̱o̱rna! Ishorong yin se nunaan, mi tà karang koangan tite̱re̱ be ike̱ng ife wu tá nye.

¹³Mi ne i nye Alfa [14] ne aOmega, Ime̱se̱ng'e be Igang'e, Nasan'e ne i nye Igang'e.

¹⁴“Aner riye̱ rikan ne a nye áner aya a tan kusu akpiin ba nong ase̱ á ta se̱ iren kuya kutse kakon kutser, ne á kuus kanukutu nong á ta no̱ kaye̱e̱r kuwo̱p'e.

¹⁵Áfe a tana sor nufang'e ne á nye áner aya kunye ba ta tas kufe ágabu, áfe a ta nye kubok, áfe a ta nye rikuna be áfe kufe̱s ánerawe ne áfe kuya ike̱re̱ iduk iben be áfe a ta shim kubo̱s abo̱o̱s.

¹⁶“Mi, aYeso ne i tom amaleka mi nong a tá ka tak kutom na nong yin ta tak yin áfikuus. Mi ne i nye Kunik aDauda ne I nye Aner kasa'me. Mi ne i nye Adar Kusetson, aya a ta se kanang.”

¹⁷Kabik be Abining Afas'e fe̱ ye, “Be̱!” Aner a ta fok rife̱ na ra fe̱ ye, “Be̱.” Aner a ta fok kuto̱ kukoor ne a tse̱r ashi kuso̱, a ra be̱ a ta so̱ ashi kutser warak.

¹⁸Mi aYohana ne i fe̱ be yin be agbang kuto ye, koangan afe a ta fok rife̱ kuzarap riya ri ta se kaye̱e̱r kufumung na: Aner aya ne a tin barang ike̱ng ikak natoon'e, to̱, Adakunom tù ku barang mo amaan risam wu gip riya a ta zibir kaye̱e̱r kufumung na.

¹⁹Aner aya a ta te̱e̱k ike̱ng ikak kaye̱e̱r ike̱ng iya a ta zibir kaye̱e̱r kufumung kuzarap na, Adakunom tà sok ishorong kanu kafu kaye̱e̱r kakon kutser ne kaye̱e̱r kuwo̱p kuzhe̱l'e ame, aya a ta fe̱ itak'e kaye̱e̱r kufumung na.

²⁰Wu aner aya tin taas ike̱re̱ na, fe̱ ye, “Ei, Mi saase kyo̱o̱rna.” Anong. Be̱, Agwo̱m Ágwo̱m yir, aYeso.

²¹Ritek Agwo̱m Ágwo̱m yir aYeso ra sor mak be áner á ta nye áfe Adakunom. Anong!