Read izere Ike̱ng a ta tonong aYohana 3 Bible Online

Ike̱ng a ta tonong aYohana 3 - izere bible

Ike̱ng a ta tonong aYohana 3

¹“Zibir amaleka ikilisiya aSardis'e ye: Rife̱ na ne nufe aner aya a ta be nabik Adakunom kanataar ne a yiir ádar kanataar nubo̱k wu. Mi ren kunye wan. Ánerawe ta di kyo̱ndi wan nye atser aser wan nye kukom'e.

²Dorok, ni barang agap nike̱ng i ta rusek i tan be̱ barak i ta ku, kamok mi di kunye wan shining nasho̱o̱n Adakunom baꞌ.

³Kamok anong, yiring be ike̱ng iya wan ta fok i ta shan. Kuus nong ta shishing kuse wan. Amma ke wan dorok baꞌ, mi tà be̱ kyo̱ndi akpatang, wan tà ren izen iya mi tana be̱ baꞌ.

⁴Amma gip be anong, yin be yin ánerawe cie̱k kaye̱e̱r yin na aSardis áya a tan riir ares ba be rine̱n baꞌ. Á ta te ares akan nong á ta tseng mak be mi kamok ba kyem á ta tseng mak be mi.

⁵Aner aya a ta canang kazatse, a tù ku te ares akan kyo̱ndi ba. Mi tà birik riyerek wu a ta zibir kaye̱e̱r Kufumung Kutser baꞌ. Nizen iya mi tana nyeseng nasho̱o̱n Ada mi ne ámaleka wu, mi tà fe̱ ye aner na nye anaan.

⁶Aner aya a ta be ato kufok a ra fok ike̱ng iya Kabik ta fe̱ be ikilisiya.

⁷“Zibir amaleka ikilisiya aFiladefiya'me ye: Rife̱ na ne nufe aner aya a ta se zhe̱l ne a be katsak, wu ne a be agbang akarak aDauda. Ike̱ng iya wu ta karak akak ta kyem a whe̱e̱n baꞌ, ike̱ng iya wu ta whe̱e̱n akak ta kyem a karak baꞌ.

⁸Mi ren kunye wan. Di, mi ma ka won kanukutu kuye̱ kaya sang akak tana kyem a whe̱e̱n baꞌ. Mi ren wan mak i be agap baꞌ, gip be anong wan kuus rife̱ mi sang wan min ton baꞌ.

⁹Mi tà sak áner Ishetan, áya a tá fe̱ ye ba nye áner aYahuda, amma sang á ra nye baꞌ, á be abo̱o̱s, mi tà ka sak ba á ta be̱ kpas natak wan ne á ren ye mi ta shim.

¹⁰Kum wan ta kuus rife̱ mi natoon kutsesek, mi tà ka fek nizen kubo̱mo̱ng kuya ku tana be̱ natoon kazatse cice̱r, nizen iya a tana bo̱mo̱ng ánerawe kazatse.

¹¹Mi saase kyo̱o̱rna. Kamok anong yiir kuno̱o̱k katsak wan kpa fan akak bin shan ribong ishorong wan.

¹²Aner aya ne a canang kazatse mi tù ku sak a ta sor itsik agbang kutu kuya Adakunom mi iben. A ta won karo̱'ong baꞌ, ko cie̱k. Mi tà zibir riyerek Adakunom mi natoon wu be riyerek agbang kuwo̱p Adakunom'i a ta yis ye aUshalima afas, a tana wuruk naza nufe Adakunom mi. Mi ta bun i zibir riyerek'i rifas natoon wu gip.

¹³Aner aya a ta be ato kufok a ra fok ike̱ng iya Kabik ta fe̱ be áfikuus.

¹⁴“Zibir amaleka ikilisiya aLaudikiya'me ye: Rife̱ na nye rife̱ aner a ta yis ye, ‘Anong.’ Wu ne a tonong katsak Adakunom kaye̱e̱r katsak, be wu ne Adakunom nye koakye ike̱ng.

¹⁵Mi ren kunye wan, wan shirim baꞌ, wan zhoosh baꞌ. Wan fa shirim ka i zhoosh ayi ke i nar.

¹⁶To̱, kamok wan ta se mumo̱k, wan shirim baꞌ wan zhoosh baꞌ, mi m be̱ barak ta ka titu.

¹⁷Wan fe̱ ye, ‘Mi nye arum mi be kurum dide̱ng, mi ba tse̱r ike̱ng ikak baꞌ.’ Wan ra ren baꞌ, wan n te riye̱ riye̱, wan be rizor, wan n te ike̱ng kuro̱ riye̱, wan nye akpato̱o̱n'e ne i se ica'me gip.

¹⁸Mi tà ka no̱o̱k ibo̱ro̱ng, shan izinariya aya a tan shirik be kuro̱ng nunaan nong ta te árum kaye̱e̱r kabik, be ares akan nong tin kis kuro̱m wan fan i bu fok isum. Shan rikan anyisi nong tà di karo̱ gye̱r.

¹⁹Áner aya mi ta shim ne mi tu zhe̱e̱r ba ne i ku te nunyi. Kamok anong, dorok be katsak, shishing kuse wan.

²⁰Di, mi na nunyeseng ne i ca kanukutu. Aner aya a fok kuto̱ mi, a ti karak'e ne mi no̱ ta ya mak be wu ne wu ya be mi gip.

²¹Aner aya a tà canang kazatse, mi tù ku sak a ta sonong mak be mi natoon itsik rigwo̱m mi kyo̱ndi mi tá canang kazatse ne i sonong mak be Ada mi natoon itsik wu.

²²Aner aya a ta be ato kufok a ra fok ike̱ng iya Kabik ta fe̱ be ikilisiya.”