Read izere Ike̱ng a ta tonong aYohana 5 Bible Online

Ike̱ng a ta tonong aYohana 5 - izere bible

Ike̱ng a ta tonong aYohana 5

¹Mi di kufumung a ta min nye izibir cei abas afa nubo̱k riya aner aya a ta se nusonong natoon itsik ame. A rosom kpa be idun kanataar.

²Ne mi bun i di amaleka akak agbang'e, a sen fe̱ be agbang kuto̱ ye, “Angan kyem a ta bisik idun na nong a ta karak kukpa'me e̱?”

³Akak kuse, natoon kaza ka kaben ka kaye̱e̱r iben a tana kyem a karak kukpa'me shita a tana fa baꞌ.

⁴Iyong mi tos dide̱ng kamok a kyem a se̱ akak a tana kyem a karak kukpa shita a ta fa baꞌ.

⁵Ayong akak kaye̱e̱r áko̱k kasho̱o̱n ame fe̱ be mi ye, “Sang tu tos baꞌ, Di! Azaki kya [4] kaye̱e̱r áner aYahuda, kunik kasa aDauda, n canang kazatse. A kyem a ta karak kukpa ne a bisik idun kanataar'ong.”

⁶Ne mi bun i di Aturuk [5] akak kyo̱ndi an tse̱e̱r kuto̱'me nunyeseng natite karo̱ itsik rigwo̱m'e. Ike̱re̱ inaas ame be áko̱k kasho̱o̱n tú ku gorok. Aturuk'e be atom kanataar be anyisi kanataar. Ayong ne á nye nabik Adakunom kanataar naya á tá tom'e nazatse cei.

⁷Iyong Aturuk ame tseng nong a tá se sok kukpa nubo̱k riya aner a tan sonong ni itsik rigwo̱m ame.

⁸Nizen iya a ta sok kukpa, ikewum inaas ife kutser ame ne áko̱k kasho̱o̱n iso̱k ifa be anaas ame kpas kaben nasho̱o̱n Aturuk'me. Koangan be izom wu ne kakereng izinariya nafe name iko̱o̱n itek kaye̱e̱r'e. Name'me sor kyo̱ndi aduwa ázhe̱l'e.

⁹Iyong á bom abom afas ne á fe̱ ye, “Wan kyem ta sok kufumung'e, wan kyem ta bisik idun'e kamok a tà ka tse̱e̱r. A ta nyosong naso̱k wan nong i tin shan ánerawe a ta te afe Adakunom. Wan shan Adakunom ánerawe cice̱r kaye̱e̱r koakye irem ne koakye izere ne koakye kaben.

¹⁰Wan tú ku sak ba á ta te áner rigwo̱m wan be átsi nong a ta nye Adakunom yir itomong, á tin nye rigwo̱m natoon kazatse.”

¹¹Mi bun i di ne mi fok kuto̱ rigwo̱m ámaleka izungu natoon izungu whe̱re̱. Á gorok ikewum inaas ife kutser ame ne áko̱k kasho̱o̱n ame gip ne itsik rigwo̱m ame.

¹²Á tang i to̱ be agap ne á bom abom ye, “Kukyem nye kufe Aturuk a tá tse̱e̱r, a kyem a tu ku no̱o̱k rigwo̱m be kurum ne kukyem cei be agap ne nakerek be kuyiik ne ri ritek.”

¹³Ne mi bun i fok koakye ike̱re̱ i ta se natoon kaza be kaben cei be iya i ta se kaye̱e̱r kaben ne kaye̱e̱r ashi ne ife i ta se natoon'e cei tà ta kuto̱ na abom ye, “Nakerek be kuyiik be rigwo̱m ne agap nye kufe aya a ta sonong natoon itsik rigwo̱m'e be Aturuk'e gip ma izen izen.”

¹⁴Ne íkewum inaas ife kutser ame fe̱ ye, “Anong.” Ne áko̱k kasho̱o̱n ame kpas kaben a tú ku ya iben.