Read izere Ike̱ng a ta tonong aYohana 9 Bible Online

Ike̱ng a ta tonong aYohana 9 - izere bible

Ike̱ng a ta tonong aYohana 9

¹Amaleka afe atoon fe̱e̱p rigba rifu ne mi di adar aya a ta se naza tá kpa kaben. A no̱o̱k adar'e akarak nong a tin karak ribong rikak ri ta se tsik dar igak [8] ame.

²Nizen iya adar'e tá karak ribong'e iyong itsing wuruk kaye̱e̱r'e kyo̱ndi itsing kuro̱ng a ta kas nagbang karo̱. Itsing ribong'e sak kunom be kaza te map.

³Ne kubep wuruk kaye̱e̱r itsing ame ku tá no̱ kaye̱e̱r kazatse, a tú ku no̱o̱k ba agap nong a ta tang ánerawe kyo̱ndi inye̱ng.

⁴A fe̱ be kubep'e ye sang a tu beseng agam ka nakon baꞌ, amma igak ánerawe áya a ta be izizo̱ Adakunom nanati ba baꞌ.

⁵A ta ka no̱o̱k ba agap á tin fe̱s ánerawe baꞌ, igak á tu ku no̱o̱k ba risam rife̱ ife̱n itoon tsek. Risam'me ta se kyo̱ndi inye̱ng tà ta anerawe

⁶kaye̱e̱r inom iyong ánerawe ta tse̱r riku, á tà se̱ baꞌ. Á tà shim ke á kus amma riku ta be̱ baꞌ.

⁷Kubep'e se kyo̱ndi ítsaap a tan sak a tin tseng nitso̱m. Á be ike̱re̱ ikak nace ba kyo̱ndi abong izinariya afe rigwo̱m, nanyisi ba se kyo̱ndi nafe ánerawe.

⁸Nakuyo̱ng ba se kyo̱ndi nakuyo̱ng rice anyining ne anyi ba se kyo̱ndi afe azaki.

⁹Á kis nafok ba be ike̱ng ikak kyo̱ndi íkpaar kutso̱m. Nawor atse̱n ba se kyo̱ndi nawor ítsaap atso̱m kutseng i ta teng i be naro̱ itsom.

¹⁰Á be arum á tin tang ánerawe kyo̱ndi inye̱ng. A ta kyem no̱o̱k anerawe risam be arum ba'ong ma ife̱n itoon.

¹¹Agwo̱m ba nye amaleka aya a tú ku no̱o̱k kukyem natoon ribong riya ri ta be igak baꞌ ame. Riyerek amaleka'me nirem áner Ibrani nye Abadon, nirem áner aHeleni nye Apoliyon, i ta sor ye, “Aner a ta beseng ike̱re̱.”

¹²Risam rife̱ ime̱se̱ng'e gor'ong, a tu ku won rifa riman'e.

¹³Amaleka afe igataar'e fe̱e̱p rigba wu ne mi fok kuto̱ kukak tá wuruk nikes inaas ife abagadi izinariya ame nasho̱o̱n Adakunom.

¹⁴Kuto̱'me fe̱ be amaleka afe igataar'e, ye, “Bisik ámaleka anaas ame áya a ta ma ka rosom ba nisho̱ng aYufiretis.”

¹⁵Ayong a bisik ámaleka anaas ame áya a tá tsang a ku sak ba kamok izen'e ne kunom'e be kufe̱n'e ne riye̱'me nong á tá fe̱s ánerawe, abas azining kaye̱e̱r ataar.

¹⁶Rigwo̱m ásozha ba'me áya a tá ko̱n natoon itsaap'e ta se kyo̱ndi aMiliyo̱n iso̱k inyak ifa (200,000,000).

¹⁷Ítsaap'e be áner aya a tá ko̱n natoon itsaap'e mi tá di kaye̱e̱r ike̱ng iya Adakunom tin tonong'e be íkpaar atso̱m iseng ni nafok ba, ife ákak se shim shim ne ife ákak se kyo̱ndi ashi aruron. Ace ítsaap'e se kyo̱ndi áfe azaki, kuro̱ng be itsing ne ike̱ng ikak kyo̱ndi itong abindiga wuruk ni nanu ítsaap'e.

¹⁸Be risam na ne a ti fe̱s ánerawe abas azining kaye̱e̱r ataar, be kuro̱ng'e ne itsing ne ike̱ng ikak kyo̱ndi itong abindiga tá wuruk ni nanu ba.

¹⁹Agap ítsaap'e se ni nanu ba ne arum ba kamok arum ítsaap'e se kyo̱ndi íwhen be ace a tin te̱m ánerawe.

²⁰Ribir ánerawe áfe sang á ta ka fe̱s ba be amaan ike̱re̱'ong baꞌ, gaar kushishing kuse ba nong á tà kam be ike̱re̱ ba tá nye be ibo̱k ba. Á ya kasho̱o̱n be kuya amaan nabik iben ne ike̱re̱ ba ta nye be izinariya ne azurfa be atso̱m ne ata be ikon ba tá nye be ibo̱k ba. Ike̱re̱'ong di karo̱ baꞌ, i fok kuto baꞌ, i kyem i tseng baꞌ.

²¹Á gaar kushishing kuse ba kufe kufe̱s ánerawe be kukur be rikuna ne itsang ba ta nye.