Read Traducción Kadosh Israelita Mesiánica 2 მეფეთა 9 Bible Online

2 მეფეთა 9 - Traducción Kadosh Israelita Mesiánica bible

2 მეფეთა 9

¹თქვა დავითმა: "ხომ არ დარჩა ვინმე საულის სახლიდან, რომ სიკეთე ვუყო იონათანის გულისთვის?”

²საულის სახლს მსახური ჰყავდა, სახელად ციბა. მოიხმეს იგი დავითთან. უთხრა მეფემ: "შენა ხარ ციბა?” მიუგო: "გახლავარ, შენი მსახური”.

³ჰკითხა მეფემ: "ხომ არ დარჩენილა ვინმე საულის სახლიდან, რომ მოვექცე ღვთის სიკეთით?” უპასუხა ციბამ მეფეს: "ძე დარჩა იონათანს, ორივე ფეხით კოჭლი”.

⁴თქვა მეფემ: "სად არის?” მიუგო ციბამ მეფეს: "აჰა, მაქირ ყამიელის ძის სახლშია, ლოდებარს”.

⁵გაგზავნა დავითმა და მოაყვანინა იგი მაქირ ყამიელის ძის სახლიდან, ლოდებარიდან.

⁶მოვიდა მეფიბოშეთი, საულის ძის, იონათანის ვაჟიშვილი დავითთან, პირქვე დაემხო მის წინაშე და მიწაზე განერთხა. უთხრა დავითმა: "მეფიბოშეთ!” მიუგო: "აქა ვარ, შენი მსახური!”

⁷უთხრა დავითმა: "ნუ გეშინია, სიკეთეს გიზამ მამაშენის, იონათანის, გულისთვის, დაგიბრუნებ მამაშენის, საულის, მთელ მიწებს და მუდამ ჩემს სუფრაზე შეჭამ პურს”.

⁸ისევ განერთხა მიწაზე და თქვა: "ვინ არის შენი მსახური, რომ ყურადღების ღირსად ჩათვალე ჩემსავით მკვდარი ძაღლი?”

⁹მოუხმო მეფემ ციბას, საულის მსახურს და უთხრა: "საულისა და მისი სახლის მთელი ქონება მისი შვილიშვილისთვის, შენი ბატონისთვის, მიმიცია.

¹⁰დაუმუშავეთ მიწა შენ, შენმა შვილებმა და შენმა მსახურებმა და მიეცით მოსავალი, რომ ჰქონდეს შენი ბატონის შვილიშვილს, შენს ბატონს, თავისი საჭმელი პური. თუმცა მეფიბოშეთი, შენი ბატონის შვილიშვილი, მუდამ ჩემს სუფრაზე შეჭამს პურს”. თხუთმეტი ვაჟიშვილი და ოცი მსახური ჰყავდა ციბას.

¹¹უთხრა ციბამ მეფეს: "ყველაფერს ისე გააკეთებს შენი მსახური, როგორც მეფე ბატონმა უბრძანა თავის მორჩილს”. და ჭამდა მეფიბოშეთი პურს დავითის სუფრაზე, როგორც მეფის ერთი ძეთაგანი.

¹²პატარა ვაჟი ჰყავდა მეფიბოშეთს, სახელად მიქა. მეფიბოშეთის მსახურები გახდნენ ყველანი, ვინც კი ციბას სახლში ცხოვრობდნენ.

¹³იერუსალიმში ცხოვრობდა მეფიბოშეთი, რათა მუდამ დავითის სუფრაზე ეჭამა პური. ორივე ფეხით კოჭლი იყო იგი.