Read Traducción Kadosh Israelita Mesiánica იობი 12 Bible Online

იობი 12 - Traducción Kadosh Israelita Mesiánica bible

იობი 12

¹მიუგო იობმა და თქვა:

²"ჭეშმარიტად, ხალხი მხოლოდ თქვენა ხართ და სიბრძნეც თქვენთან ერთად მოკვდება.

³მეც თქვენსავით მაქვს გონება და არც მე ვარ თქვენზე ნაკლები ვინ არ იცის ეს ყოველივე?

⁴დასაცინი შევიქენი მეგობრებისთვის, ღმერთს მოვუხმობდი მე და ის პასუხს მცემდა; სამასხროდ შევიქენი მართალი და უბიწო.

⁵ფეხდასასხლეტად გამზადებული კაცი, მოძულებული ჩირაღდანივითაა უდარდელი კაცის ფიქრებში;

⁶აყვავებულია მოძალადეთა კარვები, უშიშრად არიან ღმერთის განმარისხებელნი, თითქოს თავისი ხელით ატარებენო ღმერთს.

⁷აბა, ჰკითხე მხეცებს და გასწავლიან, ცის ფრინველთ და გეტყვიან.

⁸ან მიწას დაელაპარაკე და ის გასწავლის, ყველაფერს გეტყვიან ზღვის თევზები.

⁹ვინ არ იცის მათ შორის, რომ ეს ყოველივე ღვთის ხელმა შეჰქმნა?

¹⁰მის ხელთაა ყოველი სულდგმულის სიცოცხლე და ყოველი ძეხორციელის სუნთქვა.

¹¹განა ყური არ განარჩევს სიტყვებს და სასა - საჭმლის გემოს?

¹²ასაკი - სიბრძნეა, და ხანგრძლივი სიცოცხლე - გონიერება.

¹³ღმერთთანაა სიბრძნე და ძალა, მას ეკუთვნის რჩევა და გაგება.

¹⁴აჰა, დაანგრევს და ვეღარ აშენდება, კაცს დაატუსაღებს და ვეღარ გამოიხსნება.

¹⁵აჰა, შეაჩერებს წყლებს და დაშრებიან, გამოუშვებს მათ და გათელავენ მიწას.

¹⁶მასთანაა ძალა და სრული სიბრძნე, ცდუნებულიც მისია და მაცდუნებელიც.

¹⁷შიშველი ფეხით დაატარებს მრჩევლებს და მსაჯულებს აბრიყვებს.

¹⁸მეფეებს ბორკილებს ხსნის და სარტყელს არტყამს წელზე;

¹⁹მღვდლებს შიშველი ფეხით დაატარებს და ძლიერებს ამხობს;

²⁰თავდაჯერებულთ მეტყველებას ართმევს და უხუცესებს - გაგების უნარს.

²¹დიდებულებზე დამცირებას გადმოღვრის და მძლავრთა სარტყელს ასუსტებს;

²²წყვდიადიდან ამჟღავნებს საიდუმლოებებს და ნათელს ჰფენს უკუნეთის სიღრმეებს;

²³გაამრავლებს ერებს და ანადგურებს, განავრცობს ერებს და წარუძღვება მათ.

²⁴გონებას ურევს დედამიწის ხალხთა მთავრებს და უდაბნოში ახეტიალებს უგზოუკვლოდ.

²⁵უსინათლოდ დადიან ბნელში და მთვრალებივით დაბორიალებენ!