Read Traducción Kadosh Israelita Mesiánica იობი 13 Bible Online

იობი 13 - Traducción Kadosh Israelita Mesiánica bible

იობი 13

¹"აჰა, ეს ყოველივე იხილა ჩემმა თვალმა, ისმინა ჩემმა ყურმა და შეიგნო.

²რაც თქვენ იცით, მეც ვიცი, თქვენზე ნაკლები არა ვარ.

³მაინც დაველაპარაკებოდი ყოვლადძლიერს, სურვილი მაქვს, რომ ვიდავო მასთან!

⁴თქვენ კი სიცრუის მთხზველნი და უსარგებლო მკურნალნი ხართ!

⁵ნეტავ სულ დადუმდებოდეთ, ეს იქნებოდა თქვენთვის სიბრძნე.

⁶ისმინეთ, გთხოვთ, ჩემი თავისმართლება და შეისმინეთ სამდურავი ჩემი ბაგისა.

⁷ნუთუ ღვთისთვის ილაპარაკებთ უმართლოდ და მისი გულისთვის იტყვით სიცრუეს?

⁸მიკერძოებას გამოიჩენთ მის მიმართ? ღმერთს გამოესარჩლებით?

⁹კარგი იქნება, თქვენც რომ გამოგიკვლიოთ; მასაც ისე მოატყუებთ, როგორც კაცი კაცს ატყუებს?

¹⁰უცილობლად გაგკიცხავთ, მალულადაც რომ პირმოთნეობდეთ.

¹¹ნუთუ მისი სიდიადე არ გაშინებთ და მისი შიშის ზარი არ დაგტყდომიათ თავზე?

¹²ნაცარივითაა თქვენი დარიგებანი და თიხასავით - საყრდენი თქვენი.

¹³დადუმდით ჩემ წინაშე, რათა ვილაპარაკო და მეწიოს, რაც იქნება.

¹⁴რისთვის მეკავოს ჩემი ხორცი კბილებით და სიცოცხლე ხელებით?

¹⁵აჰა, მკლავს, მაგრამ მაინც მას მივენდობი, და მაინც დავიცავ ჩემს გზებს მის წინაშე;

¹⁶და ეს იქნება ხსნა ჩემთვის, რადგან უღმერთო კაცი ვერ მივა მის წინაშე.

¹⁷გულდასმით მოისმინეთ ჩემი ნათქვამი და ყურად იღეთ ჩემი სიტყვა!

¹⁸აჰა, სამსჯავრო გავმართე და ვიცი, რომ გავმართლდები.

¹⁹შემომედავება ვინმე? მაშინ დავდუმდები და მოვკვდები!

²⁰მხოლოდ ორ რამეს ნუ მიზამ და არ დავემალები შენს სახეს.

²¹შენი ხელი მომარიდე და შენმა შიშის ზარმა არ შემაძრწუნოს!

²²მაშინ მომიხმე და გიპასუხებ; ან მათქმევინე და შენვე გამეცი პასუხი!

²³რა უმართლობა მაქვს და რამდენი ცოდვა? მაუწყე ჩემი ურჩობა და ცოდვა!

²⁴სახეს რად მიმალავ, რატომ მიმიჩნევ შენს მტრად?

²⁵ნუთუ მომწყდარ ფოთოლს აფრთხობ და გამხმარ ჩალას დევნი?

²⁶რადგან სიმწარეს წერ ჩემს წინააღმდეგ და ჩემი სიჭაბუკის ცოდვებს მაზღვევინებ.

²⁷ხუნდებს მადებ ფეხებზე, უდარაჯებ ყველა ჩემს გზას და ფეხდაფეხ მომყვები!

²⁸მე კი დამპალივით ვიხრწნები, ჩრჩილით შეჭმული სამოსელივით!