Read Traducción Kadosh Israelita Mesiánica იობი 14 Bible Online

იობი 14 - Traducción Kadosh Israelita Mesiánica bible

იობი 14

¹"ადამიანი, დედაკაცის ნაშობი, დღემოკლეა და სავსეა წუხილით.

²ყვავილივით გაიფურჩქნება და ჭკნება, ჩრდილივით გადაივლის და ქრება.

³და ასეთ კაცს უმზერ და მაინც სამსჯავროში მიგყავარ?

⁴უწმიდურისგან წმიდას ვინ გააჩენს? არავინ!

⁵აკი განსაზღვრულია მისი დღენი და მისი თვეების რიცხვი შენს ხელთაა, საზღვრები დაუდგინე და ვერ გადალახავს,

⁶დაეხსენი, რომ მოისვენოს, ვიდრე მოჯამაგირესავით დაამთავრებდეს თავის დღეებს.

⁷რადგან ხესაც აქვს იმედი: თუ მოჭრიან, კვლავ ამოხეთქავს, აყვავდება და ყლორტები არ მოაკლდება.

⁸თუ ფესვი დაუბერდა მიწაში და ღერო ჩაუკვდა მტვერში,

⁹როგორც კი წყლის სუნს იგრძნობს, კვლავ აყვავდება და ახალდარგულივით გამოიყრის ყლორტებს.

¹⁰მაგრამ კვდება კაცი, დაწვება და სულს განუტევებს, სადღაა იგი?

¹¹როგორც წყლები გაედინება ზღვიდან და მდინარე იწრიტება,

¹²ასევე ადამიანიც წვება და ვეღარ დგება, ვიდრე არ გაქრება ცანი ვერ გაიღვიძებს და ვერ გამოფხიზლდება ძილისგან.

¹³ნეტავ ქვესკნელში დაგემალე, დაგეფარე, ვიდრე გადაივლიდა შენი რისხვა, დროს დამიდგენდი და გამიხსენებდი.

¹⁴თუ მოკვდება კაცი, განა კვლავ იცოცხლებს? მთელი ჩემი ბრძოლის დღეებში დავიცდიდი, ვიდრე არ დადგებოდა ჩემი ხსნა.

¹⁵მომიხმობდი და გამოგეხმიანებოდი; მოგენატრებოდა შენს ხელთა ქმნილება,

¹⁶ნაბიჯებს დამითვლიდი, ჩემს ცოდვებს კი აღარ ჩაეძიებოდი;

¹⁷ჩანთაში დალუქავდი ჩემს დანაშაულს და ჩემს ბრალს წარხოცდი.

¹⁸მაგრამ როგორც ჩამოქცეული მთა იშლება და კლდე ცურდება თავისი ადგილიდან,

¹⁹როგორც ქვებს ცვეთს წყალი, როგორც ნიაღვრები წალეკავენ მიწას; შენც ასე ანადგურებ მოკვდავი კაცის იმედს.

²⁰სძლევ მას სამუდამოდ და მიდის, სახეს შეუცვლი და უშვებ.

²¹პატივში იქნებიან მისი შვილები - მან ეს არ იცის, დამცირდებიან ისინი - ის ვერ ხედავს.

²²მას მხოლოდ საკუთარი სხეული სტკივა და საკუთარ თავს გლოვობს იგი!”