Read Traducción Kadosh Israelita Mesiánica იობი 16 Bible Online

იობი 16 - Traducción Kadosh Israelita Mesiánica bible

იობი 16

¹მიუგო იობმა და თქვა:

²"ამისთანები ბევრი მსმენია, უსუსური ნუგეშისმცემლები ხართ ყველანი!

³თუ აქვს დასასრული ქარიან სიტყვებს? რა გაიძულებთ, რომ ასე მპასუხობთ?

⁴მეც თქვენსავით ვილაპარაკებდი, თქვენს ადგილზე რომ ვყოფილიყავი. თქვენს საწინააღმდეგო სიტყვებს შევთხზავდი და თავის ქნევას დაგიწყებდით;

⁵ჩემი პირით გაგამაგრებდით და შეგიმსუბუქებდით ტანჯვას ჩემი ბაგის მოძრაობით.

⁶თუ ვილაპარაკებ, ტკივილი არ დამიამდება, თუ დავდუმდები განა გამშორდება?

⁷მაგრამ ახლა მომქანცა, მთელი ჩემი სახლეული გაუდაბურდა.

⁸შენ გამიჩინე ნაოჭები, რომლებიც მოწმობენ ჩემს წინააღმდეგ, წამოიმართა ჩემს წინააღმდეგ ჩემი სიმჭლევე, და იგი მოწმობს ჩემს წინააღმდეგ.

⁹მისი რისხვა მგლეჯს და მდევნის, კბილებს მიღრჭენს და თვალებს ილესავს ჩემზე მტერი,

¹⁰პირი აქვთ დაფჩენილი, მაგინებენ და სახეში მცემენ, მზაკვრულად შეითქვნენ ჩემს წინააღმდეგ.

¹¹უსამართლოს გადამცა ღმერთმა და ურჯულოთა ხელში ჩამაგდო.

¹²მშვიდად ვიყავი და დამამსხვრია, კისერში ჩამავლო ხელი და ნაგლეჯებად მაქცია, თავის სამიზნედ დამაყენა.

¹³გარს შემომერტყნენ მისი ისრები, მიგლეჯენ შიგნეულობას, არ მიბრალებს და მიწაზე ანთხევს ჩემს ნაღველს;

¹⁴დამლეწა, გვემა გვემაზე მოდის, მეომარივით გამორბის ჩემკენ.

¹⁵ჯვალო გადავიკერე კანზე და მტვერში ამოვგანგლე ჩემი რქა.

¹⁶ტირილისგან სახე ამელეწა და სიკვდილის აჩრდილია ჩემს წამწამებზე.

¹⁷თუმცა ძალადობა არ არის ჩემს ხელთ და სუფთაა ჩემი ლოცვა.

¹⁸მიწავ! ნუ დაფარავ ჩემს სისხლს და ადგილს ნუ ჰპოვებს ჩემი მოთქმა!

¹⁹აჰა, ცაშია ჩემი მოწმე და ჩემი დამცველი - მაღალთა შინა.

²⁰ჩემი მეგობრები აბუჩად მიგდებენ, ღმერთს შეჰქვითინებენ ჩემი თვალები,

²¹ოჰ, ნეტავ შეეძლოს ადამიანს ღმერთთან კამათი, როგორც კაცს - თავის მოყვასთან,

²²რადგან მოდის ჩემი წლების დასასრული და უკანმოუსვლელ გზას ვადგები!