Read Traducción Kadosh Israelita Mesiánica იობი 17 Bible Online

იობი 17 - Traducción Kadosh Israelita Mesiánica bible

იობი 17

¹"სული ჩემი შემუსვრილია, მინავლებულია ჩემი დღენი, საფლავი მზად არის ჩემთვის.

²განა მქირდავნი არ არიან ჩემ გარშემო და ჩემი თვალი მათ დაცინვას არ უმზერს?

³დამიცავი, გევედრები, თავდებად დამიდექი შენს წინაშე, სხვა ვინ მიქომაგებს?

⁴შენ დაუკავე მათ გულებს გონიერება, ამიტომაც არ აღაზევებ მათ ამის მერე.

⁵ვინც ანგარებით გასცემს მეგობრებს, მისი ძეების თვალები დაბნელდება.

⁶ხალხის საიგავოდ გამხადე და პირში საფურთხებლად შევიქენი.

⁷მწუხარებისგან თვალთ დამიბნელდა და აჩრდილს დაემსგავსნენ ჩემი სხეულის ასოები.

⁸აღშფოთდებიან წრფელნი ამის გამო და აუმხედრდებიან მართალნი უკეთურთ.

⁹მართალი თავის გზას ჩაეჭიდება და ხელწმიდა უფრო განმტკიცდება.

¹⁰თქვენ კი, მობრუნდით, მოდით ყველანი, ბრძენს მაინც ვერ ვიპოვი თქვენ შორის.

¹¹განვლეს ჩემმა დღეებმა, დაიმსხვრა ჩემი განზრახვები და სურვილები ჩემი გულისა.

¹²ღამეს დღედ აქცევენ, ამბობენ: ახლოა ნათელი ბნელთან!

¹³თუ ველი შავეთს, როგორც ჩემს სახლს, თუ წყვდიადში გავიმზადებ სარეცელს.

¹⁴თუ ჩავძახებ სამარეს: მამა ხარ ჩემი! მატლს - დედა ხარ ჩემი და დაი ხარ ჩემი!

¹⁵სადღაა ჩემი იმედი? და ჩემს სასოებას ვინ იხილავს?

¹⁶თან ჩამომყვება შავეთში? ნუთუ ერთად განვისვენებთ მტვერში?”